1 Nimukoranire hamwe, mwebwe nyene nimwiyegeranirize hamwe,

yemwe mwa bantu b’ihanga ritagira isoni.

2 Mwegerane imbere y’uko itegeko ritangura kuja mu ngiro,

imbere y’uko uwo musi ushika ukabatumura

nk’uko umuyaga mwinshi utumura umuguruka,

imbere y’uko ishavu rihambaye ry’Imana

ribashikako,

imbere y’uko umusi w’uburake bw’Uhoraho

ubashikira.

3 Nimurondere Uhoraho, yemwe abaciye bugufi bo muri iki gihugu,

mwebwe mukora ivyo ategetse.

Rondera ubugororotsi, rondera ukwicisha bugufi;

kumbure muzozigamwa

ku musi w’ishavu ry’Uhoraho.

4 Gaza hazotabwa,

na Ashikeloni hacike umusaka.

Ashidodi hazokwamburwa abaho ku murango,

Ekuroni na ho harandurwe.

5 Muzobona ibara mwebwe muba ku nkengera z’ikiyaga,

mwebwe Bakereti;

Ijambo ry’Uhoraho rirabagiriza,

yewe Kanani, intara y’Abafilisitiya.

Rivuga ngo: "Nzobatikiza,

nta n’umwe azosigara."

6 Intara yegereye ku kiyaga, izohinduka uburagiro,

habe ibinogo vy’amazi y’abungere

n’impongore z’imikuku.

7 Ico gihugu, kizokwegukira

amasigarira y’abo mu muryango wa Yuda,

aho ni ho bazoronka uburagiro.

Mw’ijoro bazoruhuka

baruhukire mu mazu yahebwe n’ab’i Ashikeloni.

Uhoraho Imana yabo azobitaho,

abasubize amatungo yabo.

8 "Narumvise ibitutsi vy’Abanyamowabu,

hamwe n’agacokoro c’Abamoni,

abatutse abantu banje,

batera uruhagarara igihugu cabo.

9 None rero ndahiye ukubaho kwanje,"

ni ko Uhoraho Mushoboravyose avuze,

Imana ya Isirayeli,

"Ni ukuri, i Mowabu hazoba nk’i Sodomu,

Abamoni na bo babe nk’ab’i Gomora;

ahantu huzuye ivyatsi n’ibinogo vyimbwamwo umunyu,

ahantu hatazigera hasubira kugira abahaba.

Amasigarira y’abantu banje azobasahura;

abazorokoka mu gihugu canje bazokwegukira igihugu cabo."

10 Iyo ni yo mpera bazohabwa kubera ukwishira hejuru kwabo,

kuko bacokoye bagashinyagurira

abantu b’Uhoraho Mushoboravyose.

11 Uhoraho azobahindisha agashitsi

niyasangangura ibigirwamana vyo muri ico gihugu.

Amahanga yose yo ku nkengera z’ikiyaga azomusenga,

bamwe bose mu gihugu cabo.

12 "Kandi namwe abo muri Etiyopiya,

inkota y’Uhoraho izobasogota."

13 Azoramvura ukuboko kwiwe agwanye abo mu buraruko,

arandure Ashuri,

Ninewe ahasige ari umusaka,

hagadutse nko mu bugaragwa.

14 Imikuku n’amasho ni ho bizoryama

n’ibikoko vy’ubwoko bwose.

Ibihuna vyo mu bugaragwa n’ibindi bihurira,

vyose bizokwibera ku nkingi zaho.

Uguhurira kwavyo kuzokwumvikanira mu madirisha yaho,

mu miryango yaho hazoba ibibomoke,

n’ibisenge vyubatswe mu masederi bizosigara bigaragara ata kibipfutse.

15 Ico ni ca gisagara cishira hejuru,

cahoze gitekaniwe.

Wahoze wishima uvuga uti: "Ndi uwuhambaye kurusha abandi!

Nta gisagara na kimwe cogereranywa nanje."

Mbega ukuntu habaye umusaka,

hasigaye hibera inyamaswa zo mw’ishamba.

Abahaca bose bavuza uruhwa,

bakahamama amashi.