1 Bwulus, Kirisiti Yeisu tnutnuloyi, dna n Shekwoyi əyi Gnyiyi ɓəgbetu, ɓədo n Kirisiti Yeisui, əyi awyetu.

2 Kwo lo da Timoti nu əmi əɓyi hnihnii dna n gaiciyaganunui.

Shebmyashi, snusnugye n bwugbafui n ɓa kwnu n Shekwoyi əyi Dada aba jesnu n Kirisiti Yeisui əyi Dagayi.

3 Shi mi ɓə ga ho əgbe əsa n mi ɓə lo Makidoninya nyi, la dna n Afyisus nabai ha ga azaho ɓəgbetu nge, ɓa to je nyawukpokəloi kwocedna nyawu m, 4 kwo ge ɓa kwu əɓahni ga fyi n asita n abyétnui tnacezhi nya. Aɓo ye pya nu ɓe n aɓəmwi aɓəgwnukpeaje nyai, a fa ədo n ɓa ɓa ɓe n Shekwoyi tnutnu abyegyii, n a zhni kwo dna n gaiciyaganunui nu nyi. 5 Yeyewu nu zhni ɓətukwo ɓəgbetu ye nya, n kwo gbmiɓe n ədu tnadodnai ɓədo n tukwovnyi manaii, jesnu n gaiciyaganunui hnihnii. 6 Azaho ɓa kwu aɓo ye fa jesnu ɓa kwu lofyi n ɓəda da tnatukwogyii. 7 Ɓa ncei pma ɓa kwu zè owa anyawuyi, ama ɓa ta kpe əɓo əye lo n ɓa da, kwo n ɓa zhi ɓai gbmi əkwo əɓo n agwumyii jesnu n əgbei myimyii m.

8 Yi kpəlo nge owa bmyalo ndei n əza wa zhniapma n kwoi dna n ofye. 9 Njesnu yi kpəlo nge a to n owai zhni gnyi ntu aɓəfyeceyi ɓo nu m, ama ntu owa agnaznuyi ɓo ɓədo n atukwognanakwoyii, atna shekwodnawoyi n aleifyizhniyii, atnagyigyiyi n azai n ɓa to n shekwoznashni ofyei knyiknyii lo m. Ntu aza yi ɓo n ɓa wu əɓa adada kwo əɓa aya nyi, jesnu ntu azawuyi ɓo. 10 Ntu asisiɓozhniyi ɓo, ntu azanugbai ɓo n ɓa wnagye n ajei, ntu afyenu aɓwazeyi ɓo n akataceyii. Jesnu ntu nyahonyahoi ɓo n kwo to wulo cewo n gaiciyanyawu kpokəloi m, 11 ədo n kwo lodolo n nabagyi manai, ntu latu Shekwoyi anabəlikada nya ɓo; ədo n wo ɓə la fnyi mi əɓwa nyi.

12 Mi ga Kirisiti Yeisu əyi Dagayi amisa lo, əza n wo la kalá ga mi, wo ɓə gye mi kwnuce lo; waa mi knyi dna n əwo tnutnu. 13 Kwo shikwonyi mi ɓə zhni tukwopmiɓədayi nu n wyesnugbegye aɓo wu yi, jesnu n ɓəgalazhniyii. A ɓə kwu snusnugye wu mi ntuge mi ɓə zhni ce dna n abaɓwi nu jesnu dna n tnagaiciyaga. 14 A ɓə la shebmyashi Dagayi nya zepwi mi n mwa n kwnusnu n gaiciyaganunui n yeyewui n ɓa fyi n Kirisiti Yeisu nyi.

15 Dəye nu zhni ɓəda n kwo kwnuɓwashi lo jesnu n kwo kwnuce lo a gwo kwo n nunui: Kirisiti Yeisu ɓə ɓe dna n anyì wa gnyi aleifyizhniyi nu; n əɓa vnyanya, əmi nu gna wulo. 16 Ama n ɓwasnu tu n əɓoi tukwo nu, n a ɓə wu mi snusnugye, nabai nge dna n mi, leifyizhniyi gnadui, n Masifu Yeisu ɓa wu əwo bwugbaɓwa yaakwo, kwaa zè ɓədogbe n aza yi aba n ɓa ɓə ga gaiciya n wo, nabai ɓa ɓwa wyewyeyi nyalonyalo nya. 17 Nsaiye mwamwa n latui zhni Shekwoyi gbmanyi kəto nya nu, nyalonyalo nya, əwo nu zhni Əsu n wo taa fyi nyi m, n a ta gye wo əwye nyi m. Amyi.

18 Timoti, əmi nugwnu, mi gnyi mii ga ho ɓəgbetu ye nabai kwa vyi aɓəwyegye nu, n ɓa ɓə nyi n sapa ntu əho əɓo nyi, nabai n ho ɓa zhni apma ncei, ha myi ha snukwnú, okwnú manai. 19 La gaiciyaganunui shiɓwa jesnu n tukwovnyi manaii, ədo n azaho ɓa la əkwo aɓo na jesnu ɓa kwu ɓwu əɓa gaiciyaganunui nuwna. 20 Himyinos n Alekzandai ɓa fyilo n ɓa, aza n mi kwu ɓa taya ga Shetam, wa ta ɓa, jesnu wa wu ɓa to ɓa je atukwopmi ɓəda da m.