1 Dəye nu zhni ɓəda n kwo kwnuce a kpema: Zahozahoyi n wo ye lo waa zhni ɓəwyednayi, wo ye tnutnu mwamwagai nu. 2 Nsaiye, ɓəwyednayi wo ɓaa zhni tnaɓəmai, gbenui n əwo nyikwo aba. Tnaminagyida, n əwohnii wnashi, n wo kwnuce a ga wo mwamwa, azhiɓeyi shiyi, n wo myi n nyawu. 3 N wo ta fyije m, toge aɓəkawuzhniyi m, ama tukwownashiyi, toge anyawuyi m, toge gyiwye yeyi m. 4 Ɓəshishi nu wa myi n əwohni pwuwa aknawna cewo jesnu woi gye nge əwo aɓyi ga wo mwamwa, jesnu ɓəshishi nu wa zhni aɓo n zokwo n kwo kwnuce n mwamwaga yaakwoi. 5 (Ngye əza ta kpəlo she wo ɓa wna əwohni pwuwa akna m, wo ɓa myi wa shi Shekwoyi ikilisiya əɓwa n wunanu a?) 6 Wo taa zhni əza nu, n əsa too mwa, she wa ga gaiciya m, ntolonu m, tukwomwa ɓə lo wo əmì jesnu wa myiya dna n owada gbmanyigbmanyi n shetam yii. 7 Ɓəshishi nu abmyida ɓa gbmi wo əɓo manai, nabai n wo taa kaya dna n vnyinkwo ɓədo n shetam agbúlu m.

8 N ɓwajesnu n zokwo ye, adikin ɓa gwo ɓa kwu kwnuce n mwamwagai, ɓəhnihnizhniyi, toge ɓai sni anamnuwna n mwa m, toge ɓai zna gyiba gyifyi nya shni m. 9 Ɓəshishi nu ɓa kwu gaiciyanunui loloi gaiciyaganunui nya shiɓwa n tukwovnyi manai. 10 Ɓəshishi nu a kwu ɓa tumwi kpa; nlonu n a to gye ɓəho nukwoi ho tu n ɓa m, a fa ɓa ɓa zhni tnutnu dikin nya.

11 N ɓwajesnu n zokwo ye, anyikwoza gwo ɓa kwu kwnuce n mwamwagai, toge n aɓəshinmì ɓədayi m, ama abwugbaɓwayi, jesnu n kwnukpema dna n ɓəhoɓəhoi.

12 Ɓəshishi nu dikin waa zhni əza n wo n nyikwoi ɓwasnu gbmanyi jesnu ɓəshishi nu wa shi əwo aɓyi awye cewo ɓədo n əwo pwuwai n bmya. 13 Aza yi n ɓa kwu tnutnuzhni n bmya, ɓa ɓa ɓwa əye manai jesnu n agwumyi yaakwoi fyi n əɓa gaiciyaganunui dna n Kirisiti Yeisu.

14 Kwo shikwonyi mi n awyetui lo ma ɓe da ho n pye, mi ka agbega ye ga ho nabai n 15 ma kwu kalala zhni nu, n ho ɓə kpe shi aza gwo ɓa zhni aɓo fyi n Shekwoyi pwuwabwokwnu, n əkwo nu zhni Ikilisiya Shekwoyi wyewyeyida nya, zhigwo ɓədo n shnipai gaiciyanunui nya. 16 Əɓo ɓwuɓwui, aba n shekwodnawo hnihnii nya gbmiɓe nyi, kwo zhni yaakwo nu n du aɓənya vnyanya ya:

Wo ɓə la kpeyawu dna n nayi,

Zafnu wa əɓo gbmi wo,

amaləka ɓə kwu wo gyewye,

a kwu əwo waazizhni fyi n abye,

a kwu gaiciyaga n wo dna n anyìi,

a ɓə la wo lagwnu ncei dna n latu.