1 Ntulonu she yi ɓə gye kwoi du yi akalá, ya gye kwo dulo ya kwu kpefyi n Atens əyihniyihni. 2 Ya tnu fye n Timotii, n wo zhni əyido nyi jesnu Shekwoyi tnutnu kwnuzhniyi dna n Kirisiti nabagyi manai gnamyi, nabai wa dna fye bwugbakala jesnu wa ga fye agwumyi dna n əfye gaiciyaganunui. 3 Nabai n əzaho taa ɓwa ashnaje n amwimwi ye ɓo m. Ntuge fye kpəlo dəidəi nge a ɓə zhni yi n əɓa ɓo nu. 4 Ɓəhnihni, əsa n yi ɓə kwnusnu n fyei nyi, yi ɓə zhni yii gna fye ciici nge a ɓə wu yi awyesnugbegye ɓo. Njesnu kwaa zè nlonu, ngye shi fye kpəlo nyi. 5 Ntucenu, she mi to ɓə ye myi n ɓəye shi m, ma tnu nabai a kpe əfye gaiciyaganunui əɓo ye. Mi ɓə gnyi mii wodna nu nge kwo a ɓa gye əzamwuyi wo kwu fye mwi jesnu əyi tnutnu kwo ɓə ɓa kwu zè gbəloi.

6 Ama nsaiye Timoti n la jezeɓe da yi woi gbmi n əfye aba, wonyi la ɓe yi n nabagyi manai ntu əfye gaiciyaganunui ɓo n yeyei. Wo kwu gna yi nge fye pá yi ɓo lo n bwugbadai ciici jesnu nge awyekwo fye lo, fya gye yi, n ɓwasnu shi awyekwoyi yi lo ce ya gye fye nyi. 7 Ntucenu, əyi azaje azanugbai n anyikwozai, dna n əyi bwugbawnu vnyanya n awyesnugbegye ɓoi, yi ɓə kwu agwumyi ɓwa ń əfye ɓo, ntu n əfye gaiciyaganunui ɓo. 8 Ntuge nsaiye nu n yi gyianyì ɓəhnihni nya, shikwonyi nge fye myizhi lo dna n Dagayi. 9 Yi ɓa sa Shekwoyi ami n wunanu n kwnuce n fye ɓo n bwugbabwui vnyanya, n yi ɓwa n əyi Shekwoyi aba ntu n əfye ɓo nyi a? 10 N nyipyei n sukwoi yi zhniaduwa n əwyei bmyibmyii nabai n yi ɓə je fye wyegye jesnu yii ga fye ənya n kwo ceya lo n əfye gaiciyaganunui.

11 Nsaiye, fa əyi Shekwoyi n Dadai, n əwohni tukwo ɓədo n əyi Dagayi Yeisui, wa gwu zokwo ya ga yi ya ɓe əfye aba. 12 Fa Dagayi wa zhni əfye yeye kwa mwaɓe jesnu kwa zheya n fye ga aje, n ɓwasnu shi əyi nya zheya ga əfye nyi. 13 Fa wa fyi əfye adu akalá nabai n fye ɓə kwu zhi a tnaɓətui jesnu n gyigyiyi n əyi Shekwoyi aba ɓədo n Dadai, she əyi Dagayi Yeisu ɓə ɓe n əwo agyigyiyii vnyanya.