1 Ama la ɓəye wnawye: Əsa kasai ɓə ɓe fyi n anyipyei kpmaknai. 2 Aza ɓə gna əɓahni tukwo ye, ɓai gna gyiwye ye, ɓai da aɓəkwo, ɓai gbma n əɓahni, atukwomwayi, akpmiknyiyi, aza n ɓa ta wo əɓa azakwoyi ɓəda m, ntna agbmadawu, atnagyigyii, 3 ntna yeye, atna abwizoyi, aza aɓəciyayi, aza n ɓa ta myi n ɓahni wnashi m, aza ayewnuyayi, ntna snusnugye, aza n ɓa ta ye əɓo manai m, 4 azaɓwuyi, aminagyiyi, atukwognanakwoi, aza n ɓa ye ɓa gna agbmada wo a fa Shekwoyi yeye wu, 5 n ɓa zhni ngye ɓa ye Shekwoyi əɓo, ama ɓai na əwo kalá əɓo. La əɓwa gbmi n aza yi pya ɓo.

6 Əɓa nu zhni aza pya n ɓa lofyi n apwuwa ɓai wna anyikwo abwugba kalágbai, n ɓa nunui fyi n aleifyizhni, jesnu aɓəpwawo nukwoi dəhodəhoii n kwo kwnu ɓa ya n zokwo, 7 ɓai tumwi ciici, ama to ɓai myi ɓai si ɓəyekpe gaiciyanunui nya pma m. 8 N ɓwasnu shi Jemyis n Jambresii ɓə gnyiapaapa n Mwusai nyi, nlonu ce anyawuyi ye ɓa gnyiapaapa n gaiciyanunui. Ɓa zhni aza abwugba wnuwnuiyada nu, aza nu, n a əɓa aɓoi nanái lo n gaiciyaganunui. 9 Ama ɓa to ɓə lo n kpaai m, ngye shi aza dəyi nya ɓə wu nyi, əɓa amama aɓəzhni ɓə kwu wu pəipəi n zahozahoyi aba.

10 Əhoo da, ho kwu ɓəhoɓəhoi kpeye ntu əmi nyawu ɓo, əmi anyìgyi zokwo, əmi ɓətukwo, gaiciyaganunui, bwugbaɓwa, yeye, əmìfyi, 11 awyesnugbegye ɓo, azhnìgye, aɓo pya n ɓa ɓə ɓwa mi dna n Antiyok, Ikwoninya, n Listirai, awyesnugbegye ɓo, n mi ɓə ɓwa agwumyignyi n ɓai. Dudulonu Dagayi ɓə la mi gnyiya n ɓa vnyanya. 12 Ɓəhnihni, zahozahoyi n wo ncei pmalo wa gyianyì shekwodnawo nya dna n Kirisiti Yeisu, a ɓa zhni wo awyesnugbegye ɓo. 13 Ama aɓənukwoizhniyi n akwocednayii, əɓa ɓo ɓə lo kwoi gna wnuwnuya, ɓai fyi aza kwoce ai fyi əɓahni ce kwoce. 14 Ama əhoo da, gwodu n əɓoi n ho la tumwi jesnu kwonyi kwu ho kwnuawye, ntuge ho kpe aza yi əye lo n ho ɓə tu kwo mwi n ɓa nyi, 15 jesnu ho ye zhni əɓyi nawyi, ho ɓə kwu Nyakazhi Gyigyiyi kpeye, n ɓa ɓá myi ɓa ga ho cece ntu gnyignyi ɓo dna n gaiciyaganunui n Kirisiti Yeisu. 16 Nyakashi vnyanya kwo zhni Shekwoyi əsnu nu, kwo n apmai lo ntu nyawu ɓo, ntu n gnaknyi ɓo, ntu əza abazhni ɓo n tatai dna n ɓəfyecezhni 17 nabai n Shekwoyi tnutnuyi ɓa myi waa əwohni ye n zhni kaya nunui ntu tnutnu manai zhni dəhodəhoi ɓo.