1 Mi ga ho gbetu ye gnyi n Shekwoyi abye n Kirisiti Yeisui, n wo ɓə da awyewyeyida owa n afyífyii nyi, njesnu ntu awyetu əwo ɓeɓe ɓo n əwo əbemii: 2 Zhni waazi ɓədagbma nya; la əhohni ye dna n əsa ɓwa kwo n tna əsa ɓwa; zhni aza aba, gnaknyi aza njesnu ga aza bwugbamyizhi, n bwugbaɓwa yaakwoi ɓədo n nyawui pəceye. 3 Ntuge əsa ɓə ɓe n aza to ɓə je gaiciyanyawu kpokəloi gwo m. N əkwoɓwi, ɓa ɓə ye anyawuyi bəgye zhi əɓahni, ɓai gna ɓa əɓo n əɓa atnubwa agyegyei ncei pma ɓa wo, kwoi lodo n əɓa ɓəmwii. 4 Ɓa ɓə la əɓa atnubwa pmyiya n gaiciyanunui, ɓai pmyilo ncei n əsita. 5 Ama əho, la əhohni tukwo wnashi dna n aɓo vnyanya, kwu əmìfyi dna azhnìgyei, zhni waazizhniyi tnutnu, kwu aɓo zozhni vnyanya əho ɓəvyitnutnu nya.

6 Ntuge mi pmagnyi lo mii zèya ngye nyaga snisnii, njesnu əmi kala la əsa kwo la wo vyivyiwyi. 7 Mi kwu okwnu manai snu, mi kwu əsi zo bwi, mi la əmi gaiciyaganunui shiɓwa. 8 Nsaiye a n fnunyi ɓəfyecezhni nyai sodna lo ntu əmi ɓo, ədo n Dagayi, ɓəfyece Owadayi, ɓə ga mi n əwyii; ama toge ga əmi nu ɓwasnu gbmanyi m, ama aza vnyanya n ɓa n əwo ɓeɓe awyetui lo ce.

9 La əhohni yi ha ɓe da mi n pyepye, 10 ntuge Dimas, n əwo anyì yeye ɓo, wo la mi ya jesnu wo du Tasalonika. Kirisen wo du Galatiya jesnu Titusu wo du Dalmatiya. 11 Luka nu ɓwa kwnusnu lo n mii. Zna Marukwus shni ha kwnuɓe n woi, ntuge wo n apmai lo dna n əmi ɓəvyitnutnu. 12 Mi la Ticikwus tnu tnutnu n Afyisus. 13 She ho ɓə ɓe, ɓə la əjepwupwui kwu ga mi n mi ɓə ya zhi n Kapwus n Trowas nyi, njesnu n əmi apa nyakashi kpmikpmii, Nshnisnusnu əmi anyakakpe nya.

14 Alekzanda əpyada n la mi wuɓwa n mwa. Dagayi ɓə gba wo əɓo əta ntu əɓo n wo kwu zhni nyi. 15 Əhohni ce la gnyi gwu ntu əwo ɓo, ntuge wo gnyiapaapa lo n əyi nyawui n kalái dnadnai.

16 N əmihni tukwognyi kpmisnuyi, əzaho to ɓə nyi n ma n əmi ɓwa m, ama zahozahoyi ɓə la mi ya gnyi n mi gbmanyi. Mi ta ye lo ai shi kwo əɓwa kpe n ɓa m. 17 Ama Dagayi ɓə la gnyi n əmi ɓwa jesnu wa dna mi kala, nabai nge ntu əmi ɓo n a ɓa myi a zhni waazi ye n nunui njesnu n Abyedo vnyanya ɓa myi ɓa wo kwo. A ɓə la mi gnyiya n gaba anyikna. 18 Dagayi ɓə gnyi mi ya n ɓənukwoi dəhodəhoi njesnu wo ɓə ɓe n mii n lafyiyai dna n əwo əshebemi. Latu zhni əwo nya nu nyalonyalo. Amyi.

19 Ɓyi Pirisila əgna n Akwuilai n Onesiforus pwuwa vnyanya.

20 Irasitus ɓə la dna n Kworenti, jesnu mi ɓə la Trofyimwus fa dna n Myiletus n nyasnai. 21 La əhohni yi hoi la si əmi aba too vnyinyikwoi shni m.

Ibwulus ɓyi ho əgna lo, jesnu n Pwudenii, Lainus, Klaudiya n azajei vnyanya azanugbai n anyikwozai.

22 Dagayi wo kwnusnu n əho zafnui. Shebmyashi kwo kwnusnu n fyei vnyanya.