1 Bwulus, Shekwoyi tnutnuyi jesnu Yeisu Kirisiti tnutnuloyi ntuge wa mwa Shekwoyi aza knyiknyiyi gaiciyaga ɓədo n əɓa gaiciyanunui yekpéi n kwo lo n əzai n shekwodnawo; 2 dna n awyetu wyewyeyi nyalonyalo nya, ədo n Shekwoyi n wo ta ceakata nyi m, ɓə la kwo shigbe to əsa ayayaba kwo ya m, 3 nsaiye dna n əwo əsa knyiknyiyi, wo la kwo gbmiɓe ncei n bwuznagna dna n waazizhni n a ɓə la kwo fnyi mi əɓwa n Shekwoyi əyi Gnyiyi ɓəgbetui.

4 Kwo lo da Titusu nu, əmi nugwnu hnihnii dna n əyi gaiciyaganunui n yi ncei kwnusnu nyi.

Shebmyashi n bwugbafui n ɓa kwnu n Shekwoyi əyi Dada aba ɓədo n Yeisu Kirisitii, əyi Gnyiyi.

5 Əɓo n kwo ɓə zhni ma ce ho dna n Kəreti nyi, əkwo nu ge, ha myi ha zhni aɓo zhi n ɓa ɓe yazhi ntna aknawnai, jesnu ha knyi atukwoda fyi n əzhi dəhodəhoi ngye she mi ɓə ga ho əgbe nyi. 6 Ɓəshishi nu tukwoda waa gnyi n tnaɓətui, n zhni gbenuyi n əwo nyikwo aba, əza n əwo aɓyi n gaiciyai ga lo, jesnu a ta ma ɓa aɓo tukwognanakwo nya n əɓa azakwoi əgbegnanaznui m. 7 Shikwonyi tukwoda ɓəwyednayi əwo nu wna Shekwoyi pwuwa akna, ɓəshishi nu waa gnyi n tnaɓətui; toge əza snuwnai m, toge əza n wo pye n minagyi gyii m, toge əza n wo ya əwohni ga əjesni m, toge aɓəkawuzhniyi m, toge əza n wo ye nyaɓwa gyifyi nya m. 8 N əkwoɓwi, wo ɓaa zhni azhiɓeyigwoyi nu, əza n wo ye ənya n kwo bmya, əza n wo n əwohni wnashi, n kpegnyi n bmya, n gyigyiyi ɓədo n əwohni tatai. 9 Ɓəshishi nu wa shi nyawu ɓwa n kwo kwnuce lo a kpema kwo, ngye shi a ɓə wu kwo, nabai n wo ɓa myi wa ga azaje agwumyizhi n gaiciyanyawu kpokəloi jesnu wa kwnu aza yi əgbe n ɓa gnyiapaapa n kwoi nyi.

10 Ntuge aza atukwognanakwoi n mwa bəgyé lo n ɓa da aɓo bəgye atnatukwogyii jesnu akwocednayi, n shnisnusnu aza yi n ɓa fyi n nyaznu okwu nyi. 11 Ɓəshishi nu a zhni ɓa ɓa kwu cepyi, ntuge ɓa zhni apwuwa bwokwnu agbma lo n əɓa nyawui n ɓa to gwo ɓa wu kwo m; nabai nge ɓa ɓwa nyaɓwa gyifyi nya. 12 Gbmanyi n Akəretiyi sheaɓəgwognayi n wohnii wo kwu ce da, "Akəretiyi zhni akatayi nu ciici, anyafwanya anukwoi, afnanada aɓwatoyi." 13 Ɓəda ye zhni gaiciya nu. Ntucenu gnaknyi ɓa n əwyei bmyibmyii, nabai n əɓa gaiciyaga ɓa kwu akalá fyi 14 jesnu to ɓa je əwyezè n Ayahudiyi əsita m, kwo n azanyikwoci azanga aɓəgbetu n ɓa na gaiciya nunui aɓo nyi m. 15 N əza ədu tnadodnai aba, aɓo vnyanya zhni atnadodnai nu, ama n aza yi aba n ɓa wnuwnuiya lo jesnu n ɓa to n gaiciyai ga lo m, nyaho to lo n kwo to zhni tnadodnai m. Ɓəhnihnii əɓa abwugba n əɓa tukwovnyi ɓa la wnuya. 16 Ɓa gna nge ɓa kpe Shekwoyi əye lo, ama ɓaa əwo aɓəna fyi n əɓa aɓəzhni. Ɓa to zhni aza agwogwoi nu m, atnaɓəgbetuvyiyi, jesnu aza n ɓa taa myi ɓa zhni ɓəmanai dəhodəhoi m.