1 Ce aza ɓəpá nge ɓa kwu əɓahni ga fyi n abegyiyi n ikwodai akwnu, ɓa shi aɓəgbetu ɓwa njesnu ɓa əɓahni ye ɓa zhni ɓəhoɓəhoi n kwo bmya, 2 to ɓa wnu zahozahoyi əye ya m, ɓa kwu zhni abwugbafu yei, n ɓa zhni azaje ɓənubwo manai njesnu ɓai zhni aɓo n əzahozahoyi pəceye ciici.

3 Əyihni ce əsa lo n yi ɓə zhni amama nu, atnaɓəgbetuvyiyi, n yii dnakwoce laɓa njesnu n papai fyi n aɓəpwawo dəhodəhoi pya ɓədo n agbmada yeyei. Ya gyianyì fyi n ɓəshinmì n bmyibmyii, ai wnu yi ənu njesnu yii wnu aje ənu. 4 Ama she shebmyashi n yeye Shekwoyi nyai əyi Gnyiyi ɓə kpeyaɓe, 5 wo ɓə gnyi yi, toge ntu aɓəfyecezhni ho ɓo nu n yi ɓəə kwu zhni m, ama ntu əwo snusnugye ɓo. Wa gnyi yi dna n zhnazhna shnamama nya n əyi zhishnii fyi n Zafnu Gyigyiyi, 6 n wo ɓə zeya kpe yi n əɓwai loloiya dna n Yeisu Kirisiti əyi Gnyiyi, 7 nabai nge she yi kwu ɓəgyikpmaya ɓwa dna n əwo shebmyashi nyi, n yi ɓa myi ya kwu zè əgwúgyiyi, she yi n awyetu wyewyeyi nyalonyalo nyai lo nyi. 8 Ɓəda ye kwnuce lo aa kwo shiɓwa. Njesnu mi ncei pmalo ha əgbemyi aɓo ye, nabai aza yi n ɓa kwu gaiciya ga n Shekwoyi nyi, n ɓa ɓá zhni pəceye ɓa kwu əɓahni ga fyi n ɓəzhni n kwo bmya. Aɓo ye nu zhni aduduyi njesnu n ɓa n gyibai lo n zahozahoyi aba.

9 Ama bwi aɓənakpeaje agbəloi əsi n əbyétnuyi, n aɓənai ɓədo n anyàwui ntu owa ɓo, ntuge aɓo ye to n gyibai lo m, jesnu n tna-apma. 10 Gnaknyi əza n wo ɓe n ajegnai znugbmanyi, njesnu kpma wo əɓo əɓwa baayi. N dəye avnu, to je ɓəho zhni n əwoi m. 11 Ho kpəlo nge aza yi pya ɓa to fyilo n əɓahni ací m, njesnu aleifyizhniyi nu; ɓa n əɓahnii znuknyi lo.

12 She mi tnu ho n Atemasii kwo Ticikwus, la əhohni yi ha ɓe da mi dna n Nikwopwolis, ntuge mi la bwugba dna ma zhni vnyinyikwo dna n ɓo. 13 Zhni əɓo n ho ɓa myi n zhni ha bma Zenas owayekpeyi zhni n Apwolosii fyi n əɓa əzna jesnu ha gye nge nyahonyahoi n ɓa ye, ɓa kwu ɓwa.

14 Ɓəshishi nu əyi aza ɓa tumwi ɓa kwu əɓahni ga fyi n əɓo manai zhni nabai n ɓa ɓá myi ɓa ga ənya apmanya, n a ye kwo n pyepyei jesnu to ɓa gyianyì tnagyigyiga nya m.

15 Zahozahoyi n wo kwnusnu lo n mii, wo ɓyi ho əgna lo.

Ɓyi aza yi əgna n ɓa ye yi fyi n gaiciyaga nyi.

Shebmyashi ɓa kwnusnu n fyei vnyanya.