1 Bwulus, Yeisu Kirisiti zhaluda, ɓədo n Timotii əyido.

Kwo lo da Fyilimwu nu, əyi nugwnudo yeyeyi n tnutnu kwnuzhniyii; 2 kwo lo da Afia nu cè əyi mapwi, n Akipwusii əyi okwnusnuyi ədo, n Ikilisiyai n kwo yezhi n əho pwuwa nyi.

3 Shebmyashi n bwugbafui n ɓa kwnu n Shekwoyi əyi Dada aba ɓədo n Dagayi Yeisu Kirisitii, ɓa kwnusnu n əfyei.

4 Mi sa əmi Shekwoyi ami ciici, shi mi pa fye ɓo dna n əmi aduwazhni, 5 ntuge mi wo əfye yeyewu əɓo lo n fye wu əwo aza agyigyiyi vnyanya nyi, jesnu n əfye gaiciyaganunui dna n Dagayi Yeisu. 6 Mi zhniaduwa lo nge əfye ɓwadodna n kwnusnu n yii dna n gaiciyaganunui, n kwo ɓa zhni tnutnu əfye gənyikpe kwaa gyiabye, n əɓo manai dəhodəhoi n yi ncei kwnusnu lo dna n Kirisiti. 7 Əho yeyewu kwo la agbmada yaakwo ga mi n agwumyignyii ntuge əho, əmizado, ho la Dagayi aza adu zhishni.

8 Ntucenu, kwo shikwonyi dna n Kirisiti mi ɓa myi ma pawye ma gna ho nge ho zhni əɓo n kwo gwo ha zhni, 9 dudulonu, mi gnaye lo ma tna ho aɓwa nu ntu n yeye ɓo. Kwo wulo ngye əzaho nu to shnasnu n du Bwulus m, zakwoyi n wo dna n zhalu ntu Yeisu Kirisiti ɓo nyi. 10 Mi tna ho aɓwa lo ntu əmi nugwnu ɓo, Onisimwus, n wo ɓə ze əmi nugwnu əsa n mi ɓə dna n agbma nyi. 11 N saapa, wo ɓə zhni əzagbəlo nu n əho aba, ama nsaiye wo n apmai lo n əho aba ɓədo əmii.

12 Mi tnu n woi ń əho aba njesnu, əza n əwo əɓoyeye dnalo n əmi ədu dəidəi. 13 Mi ɓə ɓa ye maa wo shi dna n mi aba, ntuge waa dna n əho apitaɓwi, wa bma mi zhni əsa n mi dnalo n agbma ntu nabagyi manai ɓo. 14 Ama mi to ncei pmalo ma zhni ɓəhoɓəhoi ntna əho aye m, nabai nge bmyashi dəhodəhoi n ho wu mi, to kwaa wu ngye a yekwofyi ho nu m, ama n əho bwugba ɓəyei. 15 Kpesnu əɓo n kwo ɓə zhni aa wo gnajeya n hoi əsa fyewyi nyi, əkwo nu ge, nabai woi jezeɓe da ho wa dna nyalonyalo. 16 Toge n shnasnu ngye fyenu m, ama n gna fyenu bmya, ngye əhozado yeyeyi. Wo zhni əza yeyeyi nu n mi aba, ama wo n apmai gnasnu lo n əho aba ngye əho zanyikwoci ədo jesnu ngye əyido dna n Dagayi.

17 Ntulonu, ngye ho zhninubwo lo ge mi zhni əho ɓwadodnayi nu, gwo wo ngye shi ho ɓa gwo mi nyi. 18 Ngye wo kwu əɓo nukwoi ho nu zhni ho, kwo n wo n ətai nu shi ho lo, ɓyi mi nu əta yi. 19 Əmi, Bwulus, mi nu kanya ye n əmihni aɓwai. Mi ɓə gba ho kwo əta. A taa da əkwoo da nu m, nge kwo əho n əhohni tukwo, ho n əho wyewyeyi ətai shi mi lo. 20 Əmizado, a wo mi lo ngye mi ɓwa gyiba ho n əho aba dna n Dagayi. Zhni əmi ədu əɓoyeye kwaa zhishni dna n Kirisiti. 21 Bwugba n mii dnakalá lo əho ɓəvyi nya, mi ka ga ho, mii kpəlo nge ho ɓa zhni n du əɓo n mi gna ho nyi.

22 Əɓo kpmace gbmanyi: La azhiɓeyi nyakwnu zhniaba gnyi mi, ntuge mi n awyetui lo nge a ɓa ya mi əɓwa ga fye ntu n əfye aduwazhni ɓo.

23 Epafras, əza n yi kwnufyi n zhalu dna n Kirisiti Yeisu nyi, wo tnu fye lo n gnaɓyii. 24 Nlonu ce, Marukwus, n Arisitakwusii, n Dimasii n Lukai, əmi atnutnu kwnuzhniyi.

25 Shebmyashi Dagayi Yeisu Kirisiti nya ɓa kwnusnu n əfye zafnui.