1 N sapa, Shekwoyi ɓə daɓo n əyi azakwoyii fyi n sheaɓəgwognayi agbe nu, n asai mwa bəgyé jesnu n azokwoi gbowogbowo. 2 Ama fyi n anyipyei kpmaknayi ye, wo kwu əɓo da n yii dna n əwo Nugwnu Yeisu, əza, n wo ɓə knyí wo gnyi əgwúgyiyi tu n anya vnyanya jesnu n wo ɓə je anyìpata zhni n əwoi nu. 3 Nugwnu nu zhni nasheya Shekwoyi latu nya jesnu əwo dogbe cimcim shi wo wu, n anyai wnafyi vnyanya n əwo akwnu, n əwo ɓədagbma kalá nyai. She wo ɓə la pwo aleifyi pmyapmya tnutnu, waa sasetu n Latu Duduyi ɓwaizheɓwa dna n əshemi.

4 Ntulonu, wo ɓə la zè əza n wo du amaləka n mwamwa, n ɓwasnu ngye əye n wo ɓə gyi əkwo əgwú nyi, kwo ɓə du əɓa nya.

5 Ntuge knyi maləka nu lo n Shekwoyi ɓə kwu shni wo gna,

"Ho zhni əmi Nugwnu nu;

n naiye, mi la zhni əho Dada a?"

Kwo jesnu,

"Mi ɓə la zhni əwo Dada,

jesnu əwohni wo ɓə la zhni əmi Nugwnu a"?

6 Njesnu, she Shekwoyi ɓe n əwo əɓyikpmisnuii dna n anyì, wo gna,

"Fa Shekwoyi amaləka vnyanya ɓa ga wo mwamwa."

7 Shi wo ɓə daɓo tu n amaləka ɓo, wo gna,

"Wo kwu əwo amaləka zè azafnu, jesnu

əwo atnutnuyi, ana nyitala."

8 Ama ntu n Nugwnu ɓo wo gna,

"Əho əbeshnikpegye, O Shekwoyi,

kwo ɓə la gnyi nyalonyalo;

jesnu bwusi ɓəfyecezhni nya nu ɓə la zhni bwusi əho əbemi nya.

9 Ho la ye n ɓəfyecei jesnu hoi wnunu n əkpízhnii;

ntucenu Shekwoyi, əho Shekwoyi, wo la ho latu tu n əho anugwnudo she

woi pmya ho n omi bwugba bwuibwui nyai."

10 Njesnu wo gna,

"N kpmisnuyi, O Dagayi, ho ɓə kwu ashnipa zhi n anyì,

jesnu n ashebmana, ɓa zhni əho aɓwa tnutnu nu.

11 Ɓa ɓə kwu zhniagbma, ama əhoo da cegnyi lo;

əɓa vnyanya ɓa ɓə kwu kwo ngye əje

12 Ho ɓə kwu ɓa kpmi ngye əje-kpadalai;

a ɓə la ɓa shnado ngye jekpe.

Ama ho to ɓə shnado m

jesnu əho aye taa shnazo m nanyinanyi."

13 Shekwoyi wo kwu shni knyi maləkai nu gna ge,

"La sasetu n əmi ɓwaizhe ɓwa

nya əsa n mi ɓə kwu əho anuwnuyi

zè əho apitakpeba a"?

14 Amaləka vnyanya zhni azafnu aɓəvyitnutnuyi nu, n a ɓai tnu tnutnu, ɓa zhni aza yi tnutnu n ɓa ɓə gyi əgwú gnyignyi nya nyi.