1 Azanugbai n anyikwozai, fye gwodu fyei wu aje yeye. 2 Fye to zamwi, n azhiɓeyishii m, ntuge ɓəzhni ye pya nu zhni aza ɓa shi amaləka to ɓai kpe m. 3 Fye gwodu fyei pa aza yi ɓo n ɓa fyilo n zhalu nyi, ngye fye kwnufyi lo n ɓai nu. Njesnu aza yi n a wna ɓa əsnu ngye fye gyeazhnì lo n fyehni.

4 Aza vnyanya ɓa ga mwula mwamwa, jesnu mwula gədo kwaa gnyi n tnadodnai, ntuge Shekwoyi ɓəə da anagbáizhniyi owa ɓədo n asisiɓozhniyii vnyanya. 5 Fye kwu əfyehni wnashi n anyìgyi gyiwye yeye nya, jesnu anya n fye ncei lo ɓa kwu fye kwnuawye, ntuge Shekwoyi wo kwu da,

"Mi taa ya fye m nanyinanyi;

Mi taa na fye aɓo m nanyinanyi."

6 Ntulonu yi daɓo n agwumyii,

"Dagayi zhni əmi bmazhniyi nu; mi taa wodna m.

Knyiyi nu n zanyikwoci azanga ɓa zhni mi a?"

7 Fye pa əfye agnabye ɓo, n ɓa ɓə da fye Shekwoyi ɓədagbma nyi. Fye dnawye fya gye shi ɓa ɓə gyianyì n wu jesnu fya shna əɓa gaiciyaganunui. 8 Yeisu Kirisiti zhni gbmanyigbmanyi nu, nsu n kwo duiya nyi, n naiye jesnu nyalonyalo.

9 Fye to ye a kwu fye fyi n anyìgyi azhiɓeyi nyawu adəhodəhoi pya m. Kwo bmyalo əyi adu ɓa kwu akalá fyi ntu n shebmyashi ɓo, toge tu n akwnunu nyagyi ɓo m, n kwo to n apmai lo ga aza yi n ɓa gyi nyi m. 10 Yi n bəgədii lo n aza yi n ɓa zhni ɓəvyitnutnu n dagayilubwui nyi, ɓa to n ikwoi lo ɓa gyi n kwo m.

11 Pirisiti dnagbmai, wo kwu anyakpa ami lo ncei n Aba Gyigyiyi Duduyi nu, n zhni aleifyi nyaga, ama a kpe əɓa anayi əná zhi n apyiznudna əbmyi nu. 12 Ntulonu Yeisu wa gyeazhnì gnyi n əzhiyaakwo əbmyi nabai wa kwu aza zhni agyigyiyi n əwo amii. 13 Nlonu, fa əyi, ya lo da wo zhi n apyiznudna əbmyi, yii kwnu vnyinkwo wo n woi. 14 Ntuge yi to n əzhiyaakwo nyalonyalo nyai lo n ya m, ama yi n awyetui lo n əzhiyaakwo nu n kwo ɓe lo nyi.

15 Ntucenu dna n Yeisu, fa ya gwodu yii ga Shekwoyi nyagbmi cici nya; gyigyiga əyi agbe nya, ɓa da əwo əye ɓo pəipəi. 16 Njesnu fye to zamwi fya zhni əɓo manai jesnu fya ce anya ga aje m, ntuge nyaga ye pya nu dá Shekwoyi agbma.

17 Fye kwu bwugba ga əfye agnabyeda jesnu fya kwu əfyehni ga fyi n əɓa ikwo, ntuge ɓa shi fye awye ngye aza yi nu n kwo zhni ɓəshishi nu ɓai ga nyadokwu. Fye zhni dəye nabai n ɓa ɓá zhni tnutnu n bwugbabwui, toge n awyicei m, ntuge dəye to n apmai lo n əfye aba m.

18 Fye zhniaduwa ga yi. Yi kpəlo nge yi n tukwovnyi manai lo, jesnu yi n pwawoi lo ya gyianyì n kwnu mwamwaga dna n zokwo dəhodəhoi. 19 Mi gna fye ɓəhnihni nge fye zhniaduwa nabai n a ɓa mi gbmiya ga fye ntna əsagyiyi.

20 Nsaiye fa Shekwoyi bwugbafu nya, əza n wo ɓə zhniapma n ami ɓəgbeshi nyalonyalo nyai, wa la əyi Dagayi Yeisu kala n əfyi, aknyi Knyiknayi yaakwo yi, 21 wo la agwu ye fye, n anya amanaii nabai fya zhni əwo ɓəye, jesnu fa wa myi wa zhni tnutnu dna n yi, ədo pya n əkwo əɓo da wo, dna n Yeisu Kirisiti, n latu zhni əwo nya nu nyalonyalo. Aamyi.

22 Azanugbai n anyikwozai, mi tna fye aɓwa, jesnu mi ɓa fye lo nge fye ɓwa bwugba n əmi ɓədagbma bwugbakaladna nyai, ntuge ɓəhnihni, mi ɓə kwu ənya ka ga fye pyikwnu.

23 Mi ye fya kpe nge a la əyido Timoti loya. N wa jezeɓe n pye, mi ɓə ɓe n woi wa gye fye əwye.

24 Fye la agnabye vnyanya ɓyigna ɓədo n Dagayi azai vnyanya.

Aza yi n ɓa kwnu n Itali nyi, ɓa tnu fye gnaɓyi lo.

25 Shebmyashi kwo kwnusnu n əfyei vnyanya.