1 Ntucenu yi kwu nyawu ayayaba nya, ntu Kirisiti ɓo ga avnu, ya gyiabye lo da akpikwokwo, toge ya je lo yii ya shnipa shishi ntu abwuye ntu atnutnu afyífyiyi ɓo, ɓədo n gaiciyaganunui dna n Shekwoyi m, 2 kwo gbega ntu n batizima ɓo, ɓədo n aɓwakpei n tukwo, əfyikalakwu jesnu n owada nyalonyalo nyai m. 3 N Shekwoyi wa ye, yi ɓa gyiabye ya zhni nlonu.

4 Kwo taa kpeyezhni m, nanyinanyi, nge aza yi n ɓa kwu bwuznagna ɓwa n əsa ho, n ɓa kwu əshemi nyaga towo, n ɓa kwu Zafnu Gyigyiyi kwnutowo n azajei, 5 aza n ɓa kwu Shekwoyi ɓədagbma shebmyashi nya towo, ɓədo n kalái cala nya n kwo ɓəlo nyi; 6 n ɓa la myiya, n a ɓa je ɓa gwo fyi n abwuye m. Ɓa kwu Shekwoyi Nugwnu je znudu nu n shnasnusnu, fyi n əɓa nuwnaɓwi jesnu ɓai dna wo vnyinkwo pəipəi gnyi n bəgye.

7 Əknyi n kwo sni əgbma nuwna n kwo zhi kpe kwo ciici nyi, kwoi ɓe n nyagyii ga aza yi n ɓa nu ofwa nyi, kwo gwo Shekwoyi anabəlika. 8 Ama əknyi n kwo kwnu aknawui nu ɓe ncei n agbegbe nukwoii, kwo zhni gbəloi nu, jesnu kwo dnalo n azhnìgye knyitu nya. N kpmasnu a ɓə kpe kwo əná.

9 Əmi anugwnudo ayeyei, kwo shikwonyi yi daɓo lo nlai, kwo la yi kwnuawye nge anya amanai lo ntu n əfye ɓo; anya n ɓa todo lo n gnyignyii. 10 Shekwoyi to zhni əza tnagaiciyada nu m, wo taa zè əfye tnutnu amwi n yeyei n fye kwu wu wo, shi fye bma əwo aza zhni, fyenyi ye gyiabye lo fyei bma ɓa zhni nyi. 11 Yi ye zahozahoyi n əfye, wa wu wyenyi gbmanyigbmanyi ye, nya azoba, nabai ənya n fye n awyetui lo n kwo nyi, n fye ɓə ɓwa kwo ń nunui. 12 Yi ta ye lo fya kwu zè aɓwatoyi m, ama fye shna aza yi n ɓa ɓə kwu əgwú ɓwa fyi n gaiciyaganunui n bwugbaɓwai, shi a ɓə n ɓəgbeshii shi nyi.

13 She Shekwoyi ɓə la ɓəgbeshi shi Ibrahim, shikwonyi əzaho to ɓə nyi n du əwo, n wo ɓa si nyasi n əwoi m, wa si nyasi n əwohnii, 14 Woi gna, "Ɓəhnihni mi ɓə tu ho anabəlika, mii ga ho ayawyii n mwa bəgyé." 15 Ntulonu, shi Ibrahim ɓə la pmignyi n bwugbaɓwai, waa ənya gwo n a ɓə ga wo əkwo ɓəgbeshi nyi.

16 Aza si nyasi n əzai nu n wo du ɓa, jesnu nyasí myi əɓo gnyi, n a kwu da, jesnu kwa zo aɓənakpeaje vnyanya. 17 Ntuge Shekwoyi ɓə ncei pma wa wu əwo ɓəmwi tnadoshnai nyinyì nu pəipəi, n əgwúgyiyi aba ənya n wo ɓə la kwo shigbe nyi, waa kwo myignyi n nyasíi. 18 Shekwoyi ɓə zhni dəye nabai n anya ngwnu-aba tnadoshnai, n kwo taa kpeyezhni Shekwoyi wa ceakata nyi m, əyi n yi la bwusi lo yi taɓwashi awyetu n ɓa shignyi n əyi abye nyi, n yi ɓa myi ya ɓwa agwumyi yaakwo. 19 Yi n awyetu yei lo n əkwo nu zhni zhigwo ntu wyewyeyi ɓo, kwo myignyi lo jesnu n əkwohnii wnashi. Kwo lodna n nyakwnugyigyiyi əmiimì nu, ń əjesasai avnu, 20 aba n Yeisu əyi gnabye ɓə lodna n əyi apitaɓwi nyi. Wo la zè pirisiti dnagbmai nyalonyalo nya, vyi Myelkizedek ofye.