1 Ntucenu, shikwonyi yi n aseyedada deeji yaakwo ye pyai lo n shegwnu yi nyi, fa ya kwu nyahonyahoi shnawoi sheya, n ɓa n yii zezhi nyi, jesnu n leifyii n kwo ta wo knanyi əza nyi m. Njesnu fa ya bwusi n bwugbadnai, əsi n kwo shi n əyi abye nyi. 2 Yi kwu əyi awyeknyi n Yeisu, əwo nu zhni gnabye jesnu əyi gaiciyaganunui nya. Ntuge a ɓə lá agbmada shi n əwo abye; waa əmìfyi n znudui, waa əkwo vnyinkwo gbmiya, jesnu waa sasetu n Shekwoyi əbeshnikpegye ɓwaizheɓwa. 3 Yi pa wo əɓo, əza n wo ɓə fyimì n aleifyizhniyii pyai n ɓa ɓə gnyiapaapa n woi nyi, nabai to fya gbakalá jesnu fya bmabwugba ya m.

4 Fyi n əfye okwnusnu n leifyii, fye too na kwo aɓo, kwoi si aba n fye ɓa zè əfye ami ya m. 5 Njesnu fye kwu ɓədagbma bwugbakaladna nya ye zamwi nu kpeekpe, n kwo daɓo n fyei shi əda daɓo n wo nugwnui nyi i? Kwo gna,

"Əmi nugwnu, to la Dagayi tata la faafa m,

jesnu to bma əho ədu ya əsa n wo gnaknyi ho ncei m,

6 ntuge Dagayi tá əza nu n wo ye,

njesnu wo gnaknyi zahozahoyi n wo gwo ngye əwo nugwnu."

7 Fye kwu əmìfyi n azhnìgyei kwaa zhni tata; Shekwoyi shi fye ngye əwo aɓyi nu. Ntuge knyi əɓyi nu lo n əwo dada ta tá wo ma a? 8 N a ta tá fye lo; shi zahozahoyii gwo tata m; a gye fye to zhni akwnusnuyi nu m, anugwnu ɓədo n anyigwnu ahnihnii m, nanyinanyi. 9 Nshnisnusnu, əyi vnyanya yi ɓə kwu adada nayi nya ɓwa n ɓa ɓəə ta yi jesnu yi ɓə kwu mwamwa ga ɓa ntuce. A gye, yi ɓa gna əyihni gaga nu, n Dada azafnu nya akwnu nabai ya pwo! 10 Ba ta yi n əsai fyewyi shi ɓa gye kwo gnadu n bmyabmya; ama Shekwoyi ta yi ntu n əyihni bmyabmya ɓo nu, nabai n yi ɓa ɓwa əwo gyigyi. 11 Tata ho to lo n kwo dagbma nsayii m, ama kwo snasnai. N tata avnu, kwo zhni kwa ga gyigyi n əkwo nu zhni ɓəfyece n bwugbafui, ga aza yi n ɓa kwu mwutu ɓwa n kwoi nyi.

12 Ntucenu, fye fyi əfye aɓwagbma kalá ɓədo n anyikwutukwo akalágbayii. 13 "Fye zhni əfye awogye aba ntu n əfye apitabwada ɓo," nabai n zabmazhi taa zè kalágbayi m, nkwoɓwi wa ɓwa kágna.

14 Fye la əfyenyi yi fya sase n zahozahoyii n bwugbafui jesnu fya kwu zhi n gyigyiyi; ntuge n tna gyigyi əzaho to lo n wo ɓə gye Dagayi əwye m. 15 Fye la əwyewna nabai to zahozahoyi waa gbàgbà, wa ɓwi Shekwoyi shebmyashi nuwna m, jesnu kwo ge gbegye nukwoi ho, kwa kpeɓe kwa zhni aza mwa bəgyé ɓa gyeazhnì jesnu kwa tu ɓa cegye m. 16 Fye la əwyewna to a gye ge əzahozahoyi n zhni asisiɓozhniyi nu m, kwo tnashekwodnawoyi ngye Isuwa m, n wo ɓə la əwo əgwú əɓyi kpmisnuyi nya kwnu ntu n nyagyi znugbmanyi ɓo nyi m. 17 N dəye avnu, shi fye kpəlo nyi, she wo ɓə ye wa gyi əgwú ye, a ɓə la əwo aɓəna. Kwo shikwonyi wo ɓə zna anabəlika ye shni n awyenyii, wo to ɓə myi wa shna ənya ədo n wo ɓə kwu zhni nyi m.

18 Fye to ɓe əpe nu n a ɓa to kwo əɓwa kwo əná-gwogwoi aba m; kwo wyegbma aba, kwo aba n ɓa wu duludulu, kwo vnuvnu aba m, 19 kwo lo da knaknaci əɓwi, kwo bəgye yi pya n kwo kwnu aɓədagbma ga aza yi n ɓa ɓə wo kwo nyi; ɓa ɓà nge a to gwodu n ɓədagbma yi da ga ɓa m, 20 ntuge ɓa to ɓə myi ɓa shi ɓəgbetu əɓwa n a ɓə ga ɓa nyi m: "Kwo nyakpa nu n kwa to əpe yi, ɓəshishi nu a knyi kwo akwuta kwa fyí." 21 Əkwo awyeshishi ɓə wodna wowoi zam, kwa zhni Mwusa n əwohni wa gna, "Mi gnyi n vnyivnyii nu ɓədo n ədnai."

22 Ama fye kwu ɓe Siyona Əpe, Shekwoyi wyewyeyida əzhiyaakwo, əshemi Urishelima. Fye kwu ɓe da amaləka adugwu kpe adugwu, fyi n bwugbabwui adogwnuba, 23 fye kwu ɓe da ikilisiya əɓyi kpmisnuyi nya, aza n əɓa aye kafyilo n əshemi. Fye kwu ɓe Shekwoyi aba, owadayi aza vnyanya nya, fye kwu ɓe da azafnu aɓəfyeceyi nya n a kwu ɓa zhni anunui, 24 Fye kwu ɓe Yeisu aba n əwo nu zhni ɓəwnazhiyi ɓəgbeshi woiwoyi nya, jesnu da ami myímyíi, n kwo da ɓədagbma gnabmyai n du Habyila ami nyi.

25 Fye la əwyewna to fya na əza aɓo n wo daɓo nyi m. Ngye ɓa to ɓə pwo, əsa n ɓa ɓə na əwo aɓo, n wo ɓə ga ɓa ɓəkwnukwnù dna n anyì nyi m; əyi, yi ɓə gnapwopwo n wunanu, n ya pmyiya n wo, n wo ga yi ɓəkwnukwnù dna n əshemi nyi a? 26 Dna n əsa yi, əwo bəgye ɓə kwu əknyi jeashna, ama nsaiye wo la ɓəgbeshi shi, "N kpmasnu znugbmanyi, mi to ɓə ɓwa anyì nu ashnaje m, ama ɓədo n ashebmanai ce." 27 Aɓədagbma ye, "N kpmasnu znugbmanyi" Kwo wu nge, a la anya kwnuya n ɓa ɓá jashna; ngye, anya azhnizhniyi, nabai anya n ɓa taa jashna m ɓa kwu cezhi.

28 Ntucenu, shikwonyi yi ta gwo əbemi nu n kwo ɓa jashna m, fa ya kwu zhni amisayi, ntulonu ya ga Shekwoyi mwamwa gwogwoi n ədnai n ɓəwowoi, 29 ntuge əyi "Shekwoyi zhni əná ənyanagyii nu."