1 To, nsayi ye, ɓəgbeshi kpmisnui ɓə n aɓəgbekpei ntu mwamwaga ɓo ɓədo n nyakwnugyigyiyi dna n əknyi. 2 A ɓə la dagayilubwui tu gnyi. Dna n əkwo nyakwnu kpmisnui, pyitila-kwnuyi ɓə gnyi n tebwulii shi, n əkwo biledi gyigyiyii kpe; a ɓə yi əkwo nu ge Aba Gyigyiyi. 3 A ɓə n əjesasai baayii sa, n əkwo avnu nyakwnu baayi ɓə gnyi ai yi kwo ge Aba Gyigyiyi Duduyi. 4 Nyakwnu yi ɓə n bəgədi zinali anya asnida nyai shi, n akwati ɓəgbeshi nyai tu, n kwo ɓə pwipwii n zinalii nyi. Akwati ye ɓə n zinali nyikwnuɓyi manna nyai dna, n Haruna bwusii n kwo ɓə la kpmi nyi, jesnu n apaala akwuta ɓəgbeshii. 5 Tu n akwati she, acerubyim Latu nya ɓə kpe, n ɓa ɓə n abmyina ofnui taya kpe, kwoi pwu tagbanya n a yi kwo ge tagbanya snusnugye shnikpegye nyi. Ama yi taa da aɓo ye ɓo n shniceknyii nsaiye m.

6 She a ɓəə la nyahonyahoi zhnizhi nlanyi, apirisiti ɓa lofyi n nyakwnu əbmyi nya n asa-asai ntuge ɓa zhni əɓa ɓəvyitnutnu. 7 Ama pirisiti dnagbmai nu ɓə ɓwa lodna n nyakwnu əmiimì nya. Wo ɓə ɓwa lodna znugbmanyi nu dna n əye, toge ntna amii shii m, n wo ɓa ga ntu əwohni əɓo jesnu ntu n aza aleifyi ɓo, n ɓa kwu zhni fyi ntna gənyikpe nyi m. 8 Zafnu Gyigyiyi ɓə gnyi woi wu nu, dna n dəye nge, a too da zokwo əɓo n kwo lo Aba Gyigyiyi Duduyi nyi kpa m, ntuge dagayilubwui kpmisnui ɓə ye gnyi kwoi zhni tnutnu. 9 Dəye zhni ɓəwu nu, ntu nsaiye ɓo. Kwoi wu nge n zokwo kwokwoi, anyaga ɓədo n anyakwnui n a ɓə zhni ai ga nyi, ɓa to ɓə myi ɓa kwnu ɓəgyi ya n tukwovnyi amwamwagayi m. 10 Ba ɓə ɓwa nyagyi əɓo nu zhni n ənyasnisniyi jesnu n akwnunu anyazhnayai gbowogbowo; aɓəgbekpe əbmyi nya ɓə ɓwa akwnunu aɓo nu zhni nya əsa n aɓəvyi woiwoyi ɓə ɓe ncei.

11 Nsaiye, Kirisiti la zhni pirisiti dnagbmai tu n anya amanai vnyanya n ɓa lo nsaiye nyi. Wo ɓə la lodna n dagayilubwui n kwo gnadu jesnu n kwo gna nunui, n a to ɓə tu kwo n zanyikwoci aɓwai nu m, n kwo to dnalo n anyazhnizhni ye m. 12 Wo to ɓə lodna n ɓo, n abwui amii nu kwo anakwoɓyiyi nyai m; ama wo ɓə lodna n Aba Gyigyiyi Duduyi əɓwa znugbmanyi ntu aza vnyanya ɓo n əwohni amii, nlonu wa gwo shnashna nyalonyalo nya. 13 Abwui ami n anakwonugba nyai ɓədo n anakwoɓyiyi otnui, a myi ɓa kpe n aza yi n ɓa ɓə fyi n kwnunu atnagyiyi, nabai ɓa kwu zè agyigyiyi n əbmyi. 14 A ɓa ka dada nge nanu, nsaiye, n Kirisiti ami ɓo a, əza n wo ɓə dna n Zafnu nyalonyalo nya, wa ga Shekwoyi əwohni n tnaɓətu, wa zhna əyi atukwovnyi ya n atnutnu n ɓa lo əfyi nyi, nabai n yi ɓa myi ya zhni Shekwoyi wyewyeyida tnutnu!

15 Ntu dəye ɓo, Kirisiti nu zhni ɓəwnazhiyi ɓəgbeshi woiwoyi nya, nabai nge aza yi n a la ɓa yì, ɓa myi ɓa gwo ɓəgbeshi əgwú nyalonyalo nya. Nsaiye shi wo ɓə la fyí ngye tagba nya nyi, wa la ɓa loya n aleifyi n ɓa ɓə zhni fyi n ɓəgbeshi kpmisnui snuta nyi.

16 N a da əza ɓəye nu ɓo, ɓəshishi nu a gye nge əza n wo ɓə shi əwo ɓəye nyi, wo la fyí kpa, 17 ntuge əza ɓəye, kwo ɓwa tnutnu lo woi la fyí nu; kwo ta lo tnutnu əsa n əza n wa shikwonyi, woi ye gnyi n wyewyeyi m nanyinanyi. 18 Ənya nu n kwo ɓə zhni, kwo ɓəgbeshi kpmisnui to kwa zhni tnutnu n tna ami m. 19 She Mwusa ɓəə la owa dəhodəhoi ɓəgbetu nya dnawyi ga aza vnyanya, wa la anakwoɓyiyi ami, n nuwnai, n wulu byeii ɓədo n sooso aɓwalai, wa myi kwo kpe n əpakpmikpmii jesnu n aza vnyanya. 20 Wo ɓə gna, "Dəye nu zhni ami ɓəgbeshi nya, n Shekwoyi nla əgbega nge fya shiɓwa nyi." 21 N zokwo ye, wa myi ami kpe n dagayilubwui ɓədo n nyahonyahoii n a ɓə zhni apma ncei ntu akwnunu ɓəzhni ɓo. 22 Ɓəhnihni, owa ye nge, aa nyahonyahoi zhni gyigyiyi n amii nu, jesnu n tna ami zeya, aleifyi zo to lo m.

23 Kwo ɓə zhni ɓəshishi nu, ǹ əsayii, ntuge əshemi anyadogbe aa ɓa pmya n anyakwnukwnu yei, ama əshemi anya, n əɓahnii, a pmya ɓa ya n anyakwnukwnui nu ń ɓa gna adəye du. 24 Ntuge Kirisiti to ɓə lodna n nyakwnugyigyiyi n a ɓə mi kwo n zanyikwoci aɓwai m, dogbe gaiciya nya nu ɓə ɓwasnu. Wo ɓə lodna n əshemi nu n əkwohni, nabai wa kpeyagnyi n Shekwoyi abye ntu əyi ɓo. 25 Wonyi to ɓə lo əshemi wa ga əwohni woi bmakpe-bmakpe nu, ngye shi pirisiti dnagbmai lodna n Aba Gyigyiyi Duduyi əye dəhodəhoi n amii n ɓa to zhni əwo ənya nu nyi m. 26 Ntolonu m, Kirisiti ɓə ɓa kwu azhnìgye n asai mwa bəgyé, ənya n kwo laka n anyìzhni sa. Ama wo la kpeyaɓe znugbmanyi ntu n aza vnyanya ɓo n anyìzo sa, wa du aleifyi aɓoya n nyagbmii əwohni gaga nya. 27 N ɓwasnu shi kwo zhni ɓəshishi nu n əza aba, wa fyi znugbmanyi jesnu n dəye avnu ai da wo owa nyi, 28 ntulonu a ɓə la Kirisiti ga znugbmanyi nabai wa kwu azabəgye aleifyi ya; jesnu wo ɓə kpeyaɓe əɓwa baayi, toge woi je aleifyi kwu m, ama woi ɓe n gnyignyii ga aza yi n ɓa zhilo ɓai pmi wo.