1 Ntucenu, kwo zhni ɓəshishi nu ya kwu tnubwakna dəidəi n ənya n yi kwu wo nyi, nabai n yi ta kwnuya n ofye m.

2 Ntuge shikwonyi ɓədatnu n amaləka nu ɓə da n əɓa agbei nyi, kwo ɓə myishì n kalái, jesnu ge owa gnanaznu dəhodəhoi n tnaɓəgbetuvyi, ɓa ɓə la əɓa tata gwo she kwo kwnuce, 3 to, yi ɓə pwo n wunanu, n ya gnyignyi yaakwo ye knyiawyeya a? Gnyignyi ye, n Dagayi nu ɓə kpmi kwo wyidna nyi, jesnu aza n ɓa ɓə wo əwo nyi, ɓa ɓə la əkwo ɓəgbmi ga yi nge gaiciya nu. 4 Shekwoyi ce, waa əkwo ɓəgbmi n aznùi, n aɓoawowoi, n aɓəwowoizhnii gbowogbowo, n Zafnu Gyigyiyi anyagai n wo ɓə gná shi əwo ɓəye ɓə nyi.

5 Wo to ɓə dna anyì, n ɓa ɓe lo nyi, n amaləka akwnu nu, n yi da əkwo əɓo nyi m. 6 Ama abaho lo n əzaho wo la ɓəgbmi,

"Zanyikwoci zhni knyii nu hoi zhni wo nubwo a,

kwo əza nugwnu n ho gye əho anuwna n woi a?

7 Ho ɓə zhni wo n gna amaləka gba fyewyi;

haa fnunyi latu nya n mwamwa nyai kwnu wo.

8 Njesnu ho la nyahonyahoi dna n əwo apitabwada snuta."

Shi wo ɓə kwu nyahonyahoi fyi n əwo snuta, Shekwoyi to ɓə knyí nyaho ya, n wo to ɓə dna kwo n əwo akwnu m. Dudulonu nsaiye, yi too gye nyahonyahoi n dna n əwo akwnu kpa m. 9 Ama yi gye Yeisu əwye lo, n a ɓə la wo zhni n gna amaləka gba dna əsa fyewyi nyi, nsaiye a la fnunyi latu n mwamwa nyai kwnu wo, ntuge wo ɓə kwu əfyi azhnìgye wo, nabai ntu Shekwoyi shebmyashi ɓo, wa to əfyi wo ntu zahozahoyi ɓo.

10 Shekwoyi ɓə gye kwo bmya, ntu əza ɓo, jesnu n əzai n a n nyahonyahoi zhnignyi ntu əwo əɓo nu nyi, nabai wa loɓe n anugwnui ɓədo n anyigwnui n mwa bəgyé fyi n latu; wa zhni əɓa ɓəyaya gnyignyi nya n nunui, ntu azhnìgye ɓo n wo ɓə gye nyi. 11 Əza n wo zhni aza ɓa kwu zhni agyigyiyi, n azai n a kwu ɓa zè agyigyiyi, əɓa ɓo pá lo n abagbmanyi nu. Ntulonu vnyinkwo ta wo Yeisu lo wa yì ɓa ge amadoi n amapwii m. 12 Wo gna,

"Mi ɓa da əho əye əɓo n əmi amaje aba n amapwuyii;

dna n azayezhi, mi ɓa kwoanyi əho cici nya."

13 Njesnu,

"Mi ɓa əmihni kpema n wo"

Njesnu wo gna,

"Mi gnyi nyi, n aɓyii n Shekwoyi wo kwu ga mi nyi."

14 Shikwonyi aɓyi n nayii lo n amii, əwohni ce, wa lá əɓa zanyikwoci nayi pya, nabai ge dna n əwo əfyi, wo ɓa myi wa bma əza yi kala ya, n wo nu n əfyi kalái shi nyi; əwo nu zhni Shetam, 15 njesnu waa aza yi loya, n a ɓə n ɓai fyi n fyenu tnutnu ń əɓa anyìgyi əsa vnyanya, ntu əfyi dnawo əɓo nyi. 16 Ntuge ɓəhnihni, amaləka nu to n wo bmazhni m, ama Ibrahim ayawyi nu. 17 Ntu n ɓəye ɓo, a ɓə la wo zhni ngye əɓa, n zhni zanyikwoci kpəcikpəcí n səpa dəhodəhoi, nabai n wo ɓə la zè pirisiti dnagbmai gaiciyazhninunui jesnu snusnugyei, dna n Shekwoyi tnutnuzhni, jesnu n wo ɓə myi wa ga tagbanyaga, ntu aza aleifyi ɓo. 18 Ntuge əwo n əwohni tukwo, wo ɓə kwu azhnìgye əsa n a ɓə mwi wo, wo ɓa myi wa bma aza yi zhni n ɓa ɓwa mwumwu nyi.