1 Nsaiye gaiciyaganunui nu zhni agwumyignyi dna n ənya n yi n awyetui n kwo, jesnu aɓoawyekwnu tu ənya n yi ta gyewye lo m. 2 Ənya nu nyi n kwo ɓə zhni a ci azakwokwoyí.

3 N gaiciyaganunui nu n yi ɓwa awyega nge a ɓə zhni anyì n Shekwoyi ɓəgbetui nu, ntuge ənya n yi gyewye nyi, a to ɓə zhni kwo n ənyai nu n a gyewye m.

4 N gaiciyaganunui nu Habyila wa ɓe Shekwoyi n nyaga gnabmyaii n du Kayinu nya. N gaiciyaganunui nu a ci wo ge ɓəfyeceyi, she Shekwoyi ɓə da ɓəda manai tu n əwo anyagaga ɓo. Njesnu n gaiciyaganunui, Habyila ye daɓo lo, kwo shikwonyi wo la fyí.

5 N gaiciyaganunui nu aa Enok ye la n anyì ye, kwa zhni to wa to əfyi wo m: "A to ɓə je wo əwyegye m, ntuge Shekwoyi ɓə la wo la." Ntuge a ɓə snu n a la wo nyi, a ɓə kwu wo ci nge wo zhni əza nu n wo əɓo da Shekwoyi. 6 Njesnu ntna gaiciyaganunui kwo taa yezhni əza əɓo kwa da Shekwoyi m, ntuge əza ń əwo ɓe da wo, ɓəshishi nu wa ga gaiciya nge woo lo, jesnu nge əwo nu ga aza yi gyiba n ɓa zna wo shni n əwyei bmyibmyii nyi.

7 N gaiciyaganunui nu Nuhu, she a ɓə ga wo ɓəkwnu ntu aɓo ɓo n a to ɓə gyewye kpa m, dna n ədnawo gyigyiyi nya, wa ji əya nuwnanya nabai wa gnyi əwo pwuwa. N əwo gaiciyaganunui, wa znu anyì əknyi waa zè ɓəfyece əgwú gyiyii n kwo vyi gaiciyaga nyi.

8 N gaiciyaganunui nu Ibrahim, she a ɓə yi wo ge wo lo aba n wo ɓə gwo kwo, n zhni əwo əgwú n abye, wa vyi ɓəgbetu wa lo, kwo shikwonyi wo to ɓə kpe aba əye n wo lo m. 9 N gaiciyaganunui nu, wa mi əwo apyi dna n ɓəgbeshi əknyi ngye zhiɓeyi dna n əknyido; wo ɓə la dna n alubwi, ngye shi Ishakwu n Yakwuɓwui ɓa ɓə kwu fyi nyi, n ɓa ɓə kwnú əgwúgyiyi nu zhni n woi, tu n ɓəgbeshi gbmanyigbmanyi nyi. 10 Ntuge wo ɓə n əwyei tu wa ɓwa əzhiyaakwo nu n kwo n ashnipai, n əkwo shiyi ɓədo n əkwo miyii nu zhni Shekwoyi.

11 N gaiciyaganunui nu, kwo Saratu, n wo ɓəə la du aɓyimasa ya nyi, wo ɓə myi waa aɓyi ma ntuge wo ɓə n Shekwoyi lá n zhni gaiciyazhninunui nu, n wo ɓəə lá ɓəgbeshi shi nyi.

12 Ntulonu, n zagbmanyi ye, n wo ɓə gnyi ngye zafyi nyi, ayawyii ɓa kwnuɓe n bəgyei ngye akpasi əshebmana nya, jesnu ngye amwi n shikwogbe, n a taa shni ɓa ba m.

13 Aza ye vnyanya ɓa ɓə ye zhi ɓai gyianyì n gaiciyaganunui, əsa n ɓa ɓə fyí nyi. Ɓa to ɓə gwo anya n a ɓə zhi ɓa ɓəgbe nyi m; ɓa ɓə ɓwa ɓa əwyegyegye nu jesnu ɓa zhni ɓa amamba ń tagnyi, ɓai ye ge, ɓa ɓə zhni aknyidoda nu jesnu azhiɓeyi fyi n əknyi. 14 Aza n ɓa da aɓo ye pya, ɓa wu nu nge ɓa zna əknyi shni lo n kwo zhni əɓa nya. 15 Ɓa ɓə gna ɓa zhni əknyi nubwo nu n ɓa ɓə fa kwo nyi, ɓa ɓə ɓaa abaɓwa ɓa jezelo. 16 N əkwoɓwi, ɓa ɓə zhi n əknyi gnabmyai pwawoi nu; əshemi nya. Ntucenu Shekwoyi ta wo vnyinyikwo lo a yi wo ge əɓa Shekwoyi m, ntuge wo la əzhiyaakwo mi ga ɓa.

17 N gaiciyaganunui nu Ibrahim, she Shekwoyi ɓə mwi wo, waa Ishakwu ga n zhni nyagbmi. Əza n wo ɓə la gaiciyaga n aɓəgbeshi, wo ɓə ye wa ga əwo əɓyigba kəto n zhni nyagbmi nu, 18 kwo shikwonyi Shekwoyi ɓə kwu gna wo, "Dna n Ishakwu əfye nu n a ɓə ba əho ayawyi." 19 Ibrahim wa zhninubwo nge Shekwoyi ɓa myi wa la zafyi kala, jesnu nlonu dna n əwo ɓədada ye pya, waa Ishakwu je gwo ń əfyi.

20 N gaiciyaganunui nu, Ishakwu wa kpe Yakwuɓwu n Isuwai anabəlika ntu n əɓa anyìgyi abye nya ɓo.

21 N gaiciyaganunui nu Yakwuɓwu, she wo ɓə shi woi fyí, wa kpe Yusufu anugwnu anabəlika jesnu wa ga mwamwa n kpema gnyi n əwo bwusi.

22 N gaiciyaganunui nu Yusufu, she əwo əfyi əsa ɓə la wo vyivyiwyi, wa da Aisrailayi kwnukwnuya ɓo n Masar jesnu wa ga agbetu ntu n əwo asnukwnu byibyi ɓo.

23 N gaiciyaganunui nu Mwusa azamayi, ɓaa wo sodna apya ngwnu-ata ɓai la wo ma, ntuge ɓa ɓə gye nge wo to ɓo zhni əɓyi azanga nu m, jesnu to ɓa wo əsu ɓəznutu ədna m.

24 N gaiciyaganunui nu Mwusa, woi la mwa, waa aɓəna, to wa ye a yi wo ge Fyirauna nyigwnu nugwnu m. 25 Wa knyi a wu wo azhnìgye n kwnusnu n Shekwoyi azai, n du ədo n wo ɓa ɓwa agbmada aduduiya aleifyizhni nya.

26 Wa gye wyegbaci ntu Kirisiti ɓo n zhni gyiba apma gnadui nu tu n Masar nyaɓwa, ntuge wo ɓə gnyi woi tuwye n əwo gyiba nu n abye. 27 N gaiciyaganunui nu wa fa Masar, to woi wó əsu minagyi ədna m; waa əmìfyi ntuge wo ɓə kwu əza gyewye n a ta gye wo əwye m. 28 N gaiciyaganunui nu, wa shi Gnanaznu əɓwa jesnu wa zhni apma n amii, nabai nge əza n wo wu aɓyikpmimai nyi, to wa to Israila aɓyikpmimai əɓwa m.

29 N gaiciyaganunui nu, aza ɓa pi Shikwo Byei ya ngye ɓa duya n əknyi-kawu; ama shi Amasariyi ɓə ye ɓa piya ce, ɓa kwu ɓwunuwna.

30 N gaiciyaganunui nu, Jerikwo gəlu kwaa myiya, shi akwnuyi ɓə kwu shegwnu kwo anyipyei ngwnu-tnaaba.

31 N gaiciyaganunui nu Raham kaluwa, ntuge wo ɓə la aknyiwyekayi gwo, a to ɓə wu wo n kwnusnu n aza yii n ɓa ɓə zhni atnaɓəgbetuvyiyi m.

32 Njesnu mi ɓa je knyiɓei nu da a? Mi to n əsai lo ma daɓo tu n Gidiyon, Barak, Samson, Jefta, n Dawuda tukwo, n Samwulai ɓədo n sheaɓəgwognayii m, 33 aza, n gaiciyaganunui nu, ɓa gyi abemi n okwnui, ɓa zhni gaiciya ɓo; ɓa gwo anya n a ɓə zhi ɓa aɓəgbeshi nyi; ɓa kwu agaba agbe gwù, 34 ɓaa əná gwogwoyi wnu jesnu ɓa kwu pwo əbeyaakwo; fyi n əɓa akalágba ɓa kwu kalá ɓwa, jesnu ɓa kwu zè akalada fyi n okwnusnu; jesnu ɓaa aknyido akwnuyii nyaya. 35 Anyikwoza ɓa je əɓa afyífyiyi gwo, a kwu ɓa kala zhi n wyewyeyii njesnu. Azaje ɓə nyi n a ɓə kwu azhnìgye wu ɓa, to ɓai ye ge a ya ɓa əɓwa m, nabai n ɓa ɓə ɓwa əfyikalakwu gnabmyai. 36 Azaho a kpe ɓa agyè njesnu a gyiɓanaya, azaho a kwu ɓa pa n agbmai, jesnu a kwu ɓa fyi n zhalu. 37 A kwu ɓa wu ai knyi ɓa akwuta, aa ɓa gnajeya ngwnu-aba-aba n zolutoi; a kwu ɓa wu n abeyaakwoi. Ba zna laɓa n fyi n aknyi-apai pwi, n abwui-apai pwi, awyekwoyi, ai wu ɓa awyesnugbegye ɓo; jesnu ai wna ɓa əsnu; 38 anyì to ɓə kwnuce kwa shi ɓa m. Ɓa zna fyi n zhabwikawu n apei, ɓa ɓə fyi n abmi n aɓwoi n əknyi.

39 Əɓa vnyanya a ɓə kwu ɓa ci ntu əɓa gaiciyaganunui ɓo, dudulonu əzaho to ɓə nyi n ɓa, n wo ɓə la ənya gwo, n a ɓə shi ɓa əkwo əgbe nyi m. 40 Shikwonyi Shekwoyi ɓə n nyaho gnabmyaii mwushi ntu əyi ɓo, nabai nge n ɓwa kwnusnu n əyii nu, n a ɓə kwu ɓa zhni n anunui.