1 Bwulus, Sila n Timotii.

Kwoi lo da Atasaloniyi Ikilisiya, dna n Shekwoyi əyi Dada n Dagayi Yeisu Kirisitii.

2 Shebmyashi n bwugbafui ɓa ɓe da fye, n ɓa kwnu n Shekwoyi əyi Dada aba ɓədo n Dagayi Yeisu Kirisitii.

3 Yi kwnuce lo ya sa Shekwoyi ami ciici ntu əfye ɓo, əyi azaje azanugbai n anyikwozai, ntuge kwo bmyalo lonu, shikwonyi əfye gaiciyaganunui gnyilo kwoi mwa n gnaɓeɓe, jesnu yeye n əfye vnyanya ncei lo ga aje nyi, kwo lo kwoi ɓeɓe nu. 4 Ntulonu, n Shekwoyi aikilisiya atasni, yi gyigbe lo ntu əfye bwugbashni ɓo n gaiciyaganunui fyi n əfye awyesnugbegye sni vnyanya ɓədo n amwimwii n fye ɓwamì n ɓai nyi.

5 Dəye vnyanya wulo pəipəi nge Shekwoyi owada wulo ceewo, ntucenu a ɓa ba fye fyi ge fye kwnuce lo n Shekwoyi əbemii, n fye zhi fyei gye əkwo azhnì nyi. 6 Shekwoyi zhni gaiciyazhninunui nu: Wo ɓə gba aza azhnì əta n azhnìi n ɓa ɓə kpe fye azhnì nyi 7 jesnu woi ga fye snusnu n a kpe fye azhnì nyi, n əyii ɓədo ce. Dəye ɓə zhni she Dagayi Yeisu ɓə kpeyaɓe woi gbmi n əshemi dna n əná gwogwoyi n əwo amaləka akaladai. 8 Wo ɓə ta aza yi n ɓa ta kpe Shekwoyi əye lo m, jesnu to ɓai vyi ɓəgbetu nabagyi manai əyi Dagayi Yeisu nya m. 9 A ɓə ta ɓa n agbmazhni nyalonyalo nyai, jesnu ai kwu ɓa gwuaba zhi n əbmyi n Dagayi awyeba, n ikwo duduyi əwo latu nyai. 10 Ń nyipyei n wo ɓə ɓe, ai la wo tu dna n əwo aza gyigyiyi atasni jesnu cei wo aza yi vnyanya n ɓa kwu gaiciyaga nyi. A n fyei ba fyilo ntuge fye ɓə kwu gaiciyaga n əyi ɓəgbmi ga fye.

11 N dəyei dna n mi, yi zhniaduwa lo cici ga fye, nge əyi Shekwoyi wo zhni fye fya kwu kwnuce n əwo yiyii. Njesnu, nge ǹ əwo ikwoi wo ɓa nu pwawo manai dəhodəhoi ga fye n tnutnu dəhodəhoi n kwo pá n əfye gaiciyaga nyi. 12 Yi zhniaduwa ye nabai n əyi Dagayi Yeisu əye ɓa ɓwa latu dna əfye, əfyehni ce dna n əwo, ngye shi kwo vyi shebmyashi əyi Shekwoyi n Dagayi Yeisu Kirisitii.