1 Ntu əyi Dagayi Yeisu Kirisiti ɓeɓe ɓo jesnu n əyi yezhii n wo aba, yi gna fye, əyi azaje azanugbai n anyikwozai, 2 fye to kwu pye n ashnashnai, kwo fya vnyi ntu nyawu ɓo n a gna kwo kwnu n yi aba nu, kwo n sheɓəgwognai, kwo n ɓədagbmai n gbeɓwo, kwo n pakai; n kwo gyitu lo nge Dagayi nyipyei kwo la luɓe m. 3 Fye to ye zahozahoyi wa dna fye kwoce kwo fyewyi, n zokwo dəhodəhoi m. Ntuge nyipyei yii taa ɓe m, akpəge a kwu tukwognanakwo ɓo zhni jesnu a la əza tna-owaɓwashiyi kpeyawu, əza n a woi znuknyi shi ntu agbmazhni ɓo nyi. 4 Wo ɓə gnyiapaapa jesnu wo ɓə la əwohni latu n du nyahonyahoi n a yi nge Shekwoyi, kwo n a ga kwo mwamwa, nabai woi la əwohni dna n Shekwoyi pwuwa, woi dnawyi nge əwo nu zhni Shekwoyi.

5 Fye ta pá lo nge, əsa n mi ɓə kwnusnu n fyei nyi, mi ɓə zhni mii gna fye aɓo ye m? 6 Nsaiye fye kpe ənya əye lo n kwo ye n woi wnashi, nabai n əwo kpeyawu ɓə ɓe n əsai bmyabmya. 7 Ntuge ikwo fyaafyaai tna-owaɓwashiyi nya gnyilo kwoi lo tnutnu; ama əza n wo n kwoi wnashi gnyi nsaiye nyi, wo ɓa gwodu wa shi kwo ɓwa nya əsa n a ɓə la kwo gbmiya n zokwo. 8 Nsayii nu ń a ɓə kpé tna-owaɓwashiyi ya wu, əza n Dagayi Yeisu ɓə shni wo ya n əbe n əsnu əwo əgbe nyai, woi zhni wo agbma n əwyii n wo ɓə jezeɓe nyi. 9 Tna-owaɓwashiyi ɓeɓe ɓə vyi shi Shetam zhni atnutnu nu. Wo ɓə zhniapma n azokwoi gbowogbowo woi wu akalá dna n aznù jesnu n aɓoawowoi akatá nyai, 10 jesnu n azokwoi vnyanya n əkpízhnizhni dna aza kwoce ncei ɓa kwu ɓwu nyi. Ɓa ɓə ɓwu ntuge ɓa ɓə ná yeye aɓo nu n gaiciyanunui n kwo ɓə ɓa gnyi ɓa nyi. 11 Ntu dəye ɓo, Shekwoyi wa tnu ɓa n bwugbaajegbmi kaladai nabai n ɓa ɓa ga akatá gaiciya 12 ntulonu a ɓə kwu aza vnyanya znuknyi n ɓa to ɓə gwo gaiciyanunui m, ama ɓa kwu dagbma fyi n əkpizhni.

13 Ama yi gwo ya sa Shekwoyi ami ciici ntu əfye ɓo, əyi azaje azanugbai n anyikwozai Dagayi aza ayeyei, ntuge Shekwoyi ɓə knyí fye ngye gyigyi kpmisnuyi nu, fya ɓwa gnyignyi dna n Zafnu Gyigyiyi tnutnu pmyapmya nya, jesnu dna n gaiciyanunui gwogwo. 14 Wo ɓə yi fye ɓe ncei dna n əyi nabagyi manai ye nu, nabai n fye ɓa myi fya kwnu latu əyi Dagayi Yeisu Kirisiti nya gwo.

15 Ntulonu, əyi azaje azanugbai n anyikwozai, fye kwu myizhi dəidəi jesnu fya kwu nyawu shiɓwa n yi kwu kwo fyi fye n akwnu nyi, kwo n ɓədagbma gbeɓwo nyai kwo n pakai nu.

16 Fa əyi Dagayi Yeisu Kirisiti n əwohni tukwoi n Shekwoyi əyi Dadai, n wo ɓə ye yi jesnu dna n əwo shebmyashi wa ga yi agwumyi nyalonyalo nya n awyetu manai nyi, 17 ɓa myi fye adu zhi jesnu ɓa fyi fye akalá dna n aɓo manaizhnii dəhodəhoi ɓədo n ɓədagbmai.