1 Əɓo kpmasnui, əmi azaje azanugbai n anyikwozai, fye dagbma fyi n Dagayi! Kwo to zhni azhnì nu n əmi aba ma je aɓo gbmanyigbmanyi ka ga fye m, ntuge kwo zhni əfye aknawna nu.

2 Fye zhni pəceye n amwi yii, aɓənukwoizhniyi yi, anayi acikpeyi yi. 3 Ntuge əyi nu zhni anyaznuyi, əyi n yi zhni Shekwoyi tnutnu n əwo Zafnui nyi, yi gyigbe dna n Kirisiti Yeisu nu jesnu yi to n agwumyii lo dna n nayi m; 4 kwo shikwonyi, əmi n mihni tukwo, mi n aɓətukwoi lo ntu gbegyii pya ɓo.

Ngye əzaho zhninubwo lo ce nge wo n aɓoi lo n ɓa ɓá zhni wo waa agwumyi dna n nayi, mi ncei lo n du əwo anya. 5 A ɓə la nyaznu mi dna n nyipyei nyimwanyimwayi, mi gbmi n Israila nu, dna n Banyami əbyé, Ibraniyi hnihnii dna n Aibraniyi aje; ntu owa ɓo, mi zhni Farisiyi nu; 6 ntu wyenyi ɓo, mii wu ikilisiya awyesnugbegye ɓo; ntu ɓəfyecezhni owa ɓwashi nya ɓo, n tna-ɓogyii.

7 Ama nyahonyahoi n kwo ɓə zhni əmi gyiba, nsaiye mi gye kwo zhni nuwnaɓwi nu ntu Kirisiti ɓo. 8 Knyiyi nu ye celo a, mi gye nyahonyahoi zhni nuwnaɓwi nu ntu n Kirisiti Yeisu əmi Dagayi yekpé dudui ɓo, ntu əwo ɓo nu n mi kwu ɓwu anya nuwna vnyanya, mi gye ɓa zhni fnyidakwulu nu, nabai n mi ɓa myi ma ɓwa Kirisiti. 9 A gye mi əwye dna n wo, toge n əmihni ɓəfyecezhnii n kwo gbmiɓe n owa ɓwashi m, ama ədo n kwo nyi n gaiciyagai dna n Kirisiti; ɓəfyecezhni n kwo gbmi n Shekwoyi, n mitu n gaiciyaga. 10 Mi ncei pmalo ma kpe Kirisiti əye; əə, ma kpe kalá əwo kala la nya əye njesnu maa əɓwadna n əwo azhnìgye, mi yi la zè ngye əwo dna n əwo əfyi, 11 nlonu, n zokwo ho, mii myi mii la dna n akalakwuyi n əfyi. 12 Kwo to lo nge mi kwu aɓo ye pmaɓwashi nu vnyanya m, kwo nge mi la pma əmi awyeceba si nu m, ama mi nyiwye ce nabai ma taɓwashi ənya n kwo ɓə zhni Kirisiti Yeisu wa wna mi shi nyi. 13 Əmi azaje azanugbai n anyikwozai, mi ta gye əmihni tukwo lo nge mi lá kwo lu gwogwo nu m. Ama əɓo gbmanyi nu n mi zhni: mii ya aɓo n avnu n ɓa la duya, mii yi əmihni ntu aɓo ɓo, n ɓa ye ɓeɓelo n abye nyi. 14 Mi gwodu lo n awyei ce n awnagnyiba nabai ma gwo gyiba n kwo nu ɓə zhni Shekwoyi wa yì mi lo əshemiɓwai dna n Kirisiti Yeisu.

15 Nlonu əyi vnyanya, n yi la kwnuaza nyi, nsayi, yi shi aɓo ye awye nlonu. Ama n kwa zè nge fye zhni ɓənubwo lo gbowo kpe n aɓəho, əkwohni ce, Shekwoyi ɓa kna fye kwo awyeya. 16 Ənya n kwo du əkwo nu nge, fa ya gyianyì n ənyai shiɓwa n yi la kwo luɓwa nyi.

17 Əmi azaje azanugbai n anyikwozai, fye dnaɓwado fya vyi əmi ɓədogbe, n ɓwasnu shi fye gye yii tu fye nyi. Fye shi aza yi awye n ɓa gyianyì lo shi yi gyi nyi. 18 Ntuge, shi mi shni fye gna lo ciici nyi, nsaiye mi je fye gna n awyenyii, nge aza bəgyé gyianyì lo ngye anuwnuyi nu Kirisiti znudu nya. 19 Əɓa aɓo ɓə zozhi n agbmazhnii nu, əɓa nubwo nu zhni əɓa shekwoyi, jesnu əɓa latu fyi n əɓa vnyinkwo nu. Ɓa n abwugbai kpe n anyì anya nu. 20 Ama yi zhni əshemiaɓyi nu. Jesnu, yi fafazhi nu yii pmi Gnyiyi n wo gbmi n əshemi nyi, Dagayi Yeisu Kirisiti, 21 əwo, dna n ikwo n kwo bma wo zhni nyi, wo ɓə ɓe n anyai vnyanya fyi n əwo akwnu, wo ɓə la əyi anayi kalágbai shnado nabai n ɓa ɓə kwu wu ngye əwo nayi latui.