1 Ntucenu, əmi azaje azanugbai n anyikwozai, əfye n mi ye fye njesnu n əfye awyeikwo mi nyi, əmi agbmada n əmi fnunyii, fye kwu myizhi fyi n Dagayi, n zokwo ye, əmi anugwnudo ayeyeyi!

2 Mi tna Afodiya aɓwa njesnu mi tna Sintiki aɓwa, ɓa kwu zhi n bwugbai gbmanyi n ajei dna n Dagayi. 3 Əə, njesnu mi tna ho aɓwa, əmi tnutnu kwnuzhniyi hnihnii, nge ho bma anyikwoza ye zhni, n ɓa kwu okwnusnu n kwnusnu mii ntu n nabagyi manai ɓo ɓədo n Klementii, n əmi atnutnu kwnuzhniyi ajei, n əɓa aye fyilo n əpakashi wyewyeyi nya nyi.

4 Fye dagbma fyi ń Dagayi ciici. Mi da kwo lo njesnu: Fye dagbma! 5 Fye fa əfye tukwownashi kwa kwu wu pəipəi n aza aba vnyanya. Dagayi wo la wo vyivyiwyi. 6 Fye to saaɓo ntu n nyaho ɓo m, ama dna n ɓəhoɓəhoi fye zhniaduwa n wyegyii, n amisai, fyei gna Shekwoyi anya n fye ye. 7 Njesnu bwugbafu Shekwoyi nya n kwo du gənyikpe dəhodəhoi vnyanya nyi, kwo ɓa gwu əfye adu n abwugbai dna n Kirisiti Yeisu.

8 N kpmasnu, əmi azaje azanugbai n anyikwozai, nyahonyahoi n kwo zhni gaiciya nu, nyahonyahoi n kwo gbmi mwamwaga, ɓəhoɓəhoi n kwo dna n zokwo, nyahonyahoi n kwo tnadodnai, nyahonyahoi n kwo zhni yeyei, nyahonyahoi n kwo dawyegye; ngye nyaho lo n kwo bmyabmyai n kwo kwnuce lo a ci kwo; fye zhni ɓənubwo kpe n aɓo ye pya nu. 9 Nyahonyahoi n fye kwu tumwi, kwo fye la gwo, kwo fye ɓə kwu wo n əmi aba, kwo n fye kwu gyewye n əmi; fye zhni apma n kwoi. Njesnu Shekwoyi bwugbafu nya ɓa kwnusnu n fyei.

10 Mi nya agbmada yaakwo lo dna n Dagayi, nge n kpmasnu, nge fye je ɓənubwozhni lo ntu əmi ɓo. N kwnusnu, fye ɓə shnisnu n ɓənubwozhnii ntu əmi ɓo, ama fye to ɓəə ɓwa aba n fye ɓa wu kwo m. 11 Mi ta da dəye ntuge mi dnalo n snagyi nu m, ntuge mi la tumwi, kwo dna n knyiɓei pya nu, anya ɓa kwu mi kwnuawye.

12 Mi kpəlo shi snagyi wo, njesnu mi kpəlo she nyaɓwa n mwa n wo. Mi la ɓəsoso anyìgyi nya tumwi n aɓəwyekwnui, gnyi n ɓwahoɓwahoi njesnu dna n əɓo dəhodəhoii, kwo dna n nubwofu nu kwo dna n myikwnu, kwo mii dna n nyaɓwa nu kwo dna n snagyi. 13 Mi ɓa myi ma zhni ɓəhoɓəhoi dna n wo, n wo ga mi kalá nyi.

14 Dudulonu, kwo ɓə bmya nge fye ɓə la əɓwa shedna n əmi azhnìgye. 15 Nshnisnusnu, əfye Afyilibyiyi fye kpəlo, dna n anyipyei sapa nya, n fye ɓə gwo nabagyi manai nyi, əsa n mi ɓə gbmi n Makidoninya ncei, ikilisiya ho to ɓə dnaɓwado n mii n nyaga zokwo jesnu n bmazhni gwoi m, akpəge əfye nu ɓə ɓwasnu; 16 ntuge kwo əsa n mi ɓə dna ncei n Tasalonika, fye ɓə kwu tnu mi n bmazhnii n du əɓwa znugbmanyi ya, əsa n mi ɓə dna n snagyi. 17 Kwo to lo nge mi zna əfye anyaga nu shni m; ənya n mi znashni əkwo nu nge, a ɓə fye gyiba n əfye lagyiita. 18 A kwu gba mi n nunui, njesnu mi ncei lo n dutu. Mi n nubwofui lo n mwa nsaiye shi mi la nyaga gwo n Epafroditus n fye ɓə tnu ncei nyi. Ɓa zhni nyaga snidaí nu, nyagbmi gwogwoi, bwugbada nya ga Shekwoyi. 19 Njesnu əmi Shekwoyi ɓa ga fye anya vnyanya n fye ye, shi əwo nyaɓwa latu nya lo dna n Kirisiti Yeisu.

20 Latu zhni əyi Shekwoyi nya nu n Dadai, nyalonyalo. Aamyi.

21 Fye ɓyi Shekwoyi aza vnyanya gna dna n Kirisiti Yeisu. Əyi azaje azanugbai n anyikwozai n ɓa kwnusnu lo n mii nyi, ɓa tnu fye lo n əɓa gnaɓyii. 22 Shekwoyi aza n ya vnyanya, tnu fye gnaɓyi lo, n gnasnusnu aza yi n ɓa fyi n Kaisa pwuwa nyi. 23 Shebmyashi əyi Dagayi Yeisu Kirisiti nya kwo kwnusnu n əfye zafnui. Aamyi.