1 Əmi azaje azanugbai n amapwii, agaiciyagayi fyi n əyi Dagayi Yeisu Kirisiti latuyi, ɓəshishinu to a wu bmyashi ai kaka m. 2 N a gna ge, əzaho wa lo ɓe əfye ayezhiba n zinali ɓwanyi nyai dna n aje amanai anakwoi kpe, jesnu wyekwoyi ho n aje akwokwoi cegye nyai kpe, waa lo ɓe ce. 3 N ha awye gnawna n əza yi nu n wo n aje amanai kpe nyi, ha gna wo, "Aseseba amanai n hoi shi nyi," ama ha gna wyekwoyi, "La gnyi n ɓo" Kwo "La sase shi n əknyi, vyivyiwyi n əmi apitai," 4 ho too kwu kakai wu dna n əfye atasni jesnu ho la zhni owadayi n aɓonubwozhni nukwoii m?

5 Fye knatnubwa, əmi azaje azanugbai n amapwii: Shekwoyi too la aza yi nu knyí, n anyì gye ɓa nge awyekwoyi nyi, nabai ɓa kwu zè anyaɓwayi fyi n gaiciyaga jesnu ɓai gyi əgwú əshebemi nya n wo ɓə la kwo shigbe n aza yi aba n ɓa ye wo nyi m? 6 Ama fye kwu awyekwoyi ciwyegba. Fye ta pá lo ge, anyaɓwayi nu gyi fye fyi m? Əɓa nu ta kwu fye lo ncei n owada bwokwnu m? 7 Əɓa nu ta da atukwopmi ɓo tu n Yeisu əye mwamwaida, əwo n fye zhni əwo anya nu nyi m?

8 Ndei ɓəhnihni nu ge, fye kwu owa dnagbmai shiɓwa n kwo kafyilo ń Shekwoyi Nyakagyigyiyi nyi, "Wu əho kwnuzhiyi yeye she ho ye əhohni nyi," ho zhni əɓo nu n kwo dnalo n zokwo. 9 Ama n fya wu aza bmyashi fyei kaka, fye kwu leifyi zhni njesnu owa la fye pa n zhni owa agnanaznuyi. 10 Ntuge əza n wa shi owa ɓwa vnyanya ama waa cebwonyi n ɓwasnu n əɓo gbmanyi, wo dnalo n ɓəgyi owa vnyanya gnanaznu. 11 Ntuge əza n wo ɓə gna, "Ho taa zhni anagbái nyi m," əwo nu naa je gna, "Ho to wu əza m," N ho to zhni anagbái m, ama ha wu əza, ho la zè owa gnanaznuyi.

12 Daɓo jesnu ha zhni əɓo ngye aza yi ń a ɓə da ɓa owa n owai n kwo ga loloya nyi. 13 Ntuge owada n tna snusnugye nya nu ń a ɓə da tu n zahozahoyi tukwo n wo to n snusnugyei lo m. Snusnugye gyi nasala tu n owada.

14 Əmi azaje azanugbai n amapwii, knyi əɓo manai nu lo n əza wa gna, wo n gaiciyagai lo, ama n tna atnutnu a? Gaiciyaga yi pya ɓa gnyi wo? 15 N a gna ge əyido n mapwii gnyilo n tna ajekpe ɓədo n nyagyii fyegyifyegyi, 16 n əzaho n fye wa gna wo, "Lo n bwugbafui; əse kwo la ho gyi jesnu nubwo kwo la ho fu," ama to a kwu wo bmazhni n anyai n əwo nayi n əɓa apmai lo m, mi gye əkwo bmyabmya a? 17 N ɓwasnu nlonu, gaiciyaga əkwohnikwohni, n kwo to kwnusnu lo n atnutnui m, kwo zhni fyífyii nu.

18 Ama əzaho ɓa gna, "Ho n gaiciyaganunui lo, mi n atnutnui nu." Wu mi əho gaiciyaganunui ntna atnutnu, əmi mi ɓa wu ho əmi gaiciyaganunui n əmi atnutnui n mi zhni nyi. 19 Ho n gaiciyaga lo nge Shekwoyi ɓwasnu lo gbmanyi nu. Kwo bmyalo! Kwo ase, ɓa n gaiciyai ga lo lonu, njesnu ɓai vnyí.

20 Əho əza mama, ho ye ɓəpəwu nu nge gaiciyaganunui ntna atnutnu kwo zhni gbəloi nu u? 21 A to ɓə la əyi dada Ibrahim ba dna n ɓəfyecezhni ntu əɓo n wo ɓə zhni nyi, əsa n wo ɓə ga əwo nugwnu Ishakwu tu n bəgədi nyi m? 22 Gye nge əwo gaiciyaganunui n əwo atnutnui ɓa ɓə kwnu tnutnuzhni nu, jesnu əwo gaiciyaga kwa kwu nu vnyanya ntu n əɓo ɓo n wo ɓə zhni nyi. 23 Jesnu nyakagyigyiyi kwa kwu əgbənu n kwa gna, "Ibrahim ɓə la gaiciyaga Shekwoyi, aa kwo ba dna wo ge ɓəfyecezhni," jesnu a yi wo ge Shekwoyi nugwnudo. 24 A yi əza ɓəfyecezhniyi n əɓoi nu n wa zhni, toge n gaiciyanunui nu gbmanyi m.

25 N ɓwasnu lonu, kwo Raham kaluwa, wo too ɓə la zè ɓəfyeceyi ntu əɓo ɓo n wo ɓə zhni nyi, əsa n wo ɓə gwo abawyekayi fyi fyaa nyi jesnu wa gna ɓa ami n zokwo doi m? 26 Shikwonyi nayi ntna zafnu kwo zhni fyífyii nu nyi, nlonu gaiciyaganunui ntna atnutnuzhni kwo zhni fyífyii nu.