1 Nsaiye fye knatnubwa, əfye agyiwyeda, fye ciɓwi fyei fyiakwu, ntuge bwugbawnu shnishnii ɓe da fye lo. 2 Əfye nyaɓwa kwo kwu bwo, jesnu anyìmana ɓa kwu aje gyi fye. 3 Əfye zinali n azulufai ɓa kwu gyifnyi. Əɓa fnyigyi ɓə gbmiɓo tu n fye tukwo njesnu ɓai gyi əfye nayi ngye əná. Fye kwu əfye nyaɓwa gwufyi n anyipyei kpmaknai. 4 Gye ga! Atnutnu gyiwye n fye ncei shi əfye atnutnuyi n ɓa ɓə zhni fye tnutnu n əfye afwa nyi, ɓa ciɓwi lo n fyei. Ɓwuci anyagyikwuyi nya, kwo la si Dagayi Ikwoda Duduyi atnubwa. 5 Fye kwu anyi gyi fyi n agbmada-wyidu, fyei gyi anya n əfye anayi ye ncei. Fye kwu əfyehni fyi-abye dna n nyipyei ashaceya nya. 6 Fye la tnaɓətuyi znuknyi, njesnu fye la wo wu, əza n wo to ɓə gnyiapaapa n fyeii m.

7 Nlonu fye kwu bwugbaɓwa əmiaje azanugbai n amapwii, nya əsa n Dagayi ɓə ɓe. Gye she Fwanuyi pmi əknyi kwa ga əkwo nyagyi apmanya, wa pmi əgbma gbmama nya ɓədo n vnyinyikwo nyai. 8 Əhohni ce, la bwugba ɓwa haa myignyi, ntuge Dagayi ɓeɓe kwo la wo vyivyiwyi. 9 Əmiaje azanugbai n amapwii yi to da aje gnwunugnwunu m, ntolonu m, a ɓə da yi owa. Owadayi gnyiagnyi gnyilo n abwokwnumi!

10 Əmiaje azanugbai n amapwii, yi pa sheaɓəgwognayi ɓo n ɓa ɓə daɓo dna n Dagayi əye nyi, ɓa kwu zhni əyi ɓədogbe bwugbaɓwa nya dna n azhnìgye. 11 Shi fye kpəlo, yi yi aza yi nu nge anabəlikada n ɓa kwu bwugba ɓwa nyi. Fye kwu Ayuba bwugbaɓwa ɓə wo, fyenyi kwu gye əɓo n Shekwoyi ɓə zhni n əkwo azoba. Dagayi n nunui lo n snusnuwnai ɓədo n snusnugyei.

12 Kpe n aɓo ye vnyanya, əmiaje azanugbai n amapwii, fye to si nyasí n əshemii kwo ń anyii m, kwo n nyahonyahoii m. Əɓo vnyanya n fye gwo fya da, əkwo nu ɓwasnu, "Əə" kwo "Aawo." Ntolonu m, a ɓə kwu fye znuknyi.

13 Əzaho dnalo n əfye atasni n wo dnalo n azhnìgye? Wo zhniaduwa. Əzaho n agbmadai lo? Akpəge wo kwoanyi cici nya. 14 Əzaho dnalo n fye atasni nyasnai? Wo yi ikilisiya atukwoda ɓa zhniaduwa kpe wo, njesnu ɓa pmya wo n omii dna n Dagayi əye. 15 Njesnu aduwa n a zhni ɓa dna n gaiciyaga, ɓa ɓa zhni nyasnayi wa ɓwa kágna, Dagayi ɓa la wo kala gnyi. Kwo ngye wo kwu leifyi nu zhi, a ɓa zo wo aleifyi. 16 Ntucenu fye da aje əfye aleifyi, jesnu fye zhniaduwa ga aje, nabai n fye ɓa ɓwa kágna. Aduwa ɓəfyecezhniyi nya, n kalái dna, jesnu kwo lo tnutnu lo.

17 Iliya ɓə zhni zanyikwoci nu ngye əyi. Wo ɓə zhniaduwa n əwyei bmyibmyii nge əgbma to zhi m, njesnu to əgbma kwa zhi n əknyii m, aye ngwnu-ata n tokwnui. 18 Njesnu wa zhniaduwa, ashebmana ɓa ga əgbma njesnu əknyi kwa ga əkwo nyagyi.

19 Əmiaje zanugbai n amapwii, n zaknayi n fye wa gbmiya n gaiciyanunui, njesnu əzaho n fye waa jezeɓe n woi, 20 fye pa ɓəye: Zahozahoyi n wa jezeɓe n leifyidai n əwo abaɓwi, wo ɓa gnyi wo ya n əfyi njesnu wa pwi aleifyi bəgyé anya.