1 Byitusu, Yeisu Kirisiti tnutnuloyi.

Kwo lo da Shekwoyi aza aknyiknyiyi nu, okwnula n ɓa gnamyi fyi n Pwontus aknyi, n Galatiya, Kapadosiya, Asiya ɓədo n Byitinyai, 2 aza n a ɓə knyí ɓa vyi ɓəyekpe Shekwoyi Dada aɓo nya n ɓa ye ɓeɓelo dna n pmyapmya Zafnu tnutnu nya, ɓai kwu zhni Yeisu Kirisiti ɓəgbetuvyiyi njesnu ai kwu ɓa myi n əwo amiyii.

Shebmyashi n bwugbafui ɓa kwu zhni əfye anya knaaknà kwoi gyiya.

3 Cici zhni Shekwoyi nya nu n Dadai əyi Dagayi Yeisu Kirisiti nya! Ntu əwo snusnugye yaakwo ɓo, wo la yi shna ma fyi n awyetu wyewyeyi nya, dna n Yeisu Kirisiti kala la ń əfyi, 4 wa lofyi n əyii fyi n əgwú n kwo taa fyi, n kwo taa wnuya, kwo kwa toya m nanyinanyi. Aa n əgwú yei yashi əfye lo n əshemi nu, 5 əfye dna n gaiciyaganunui, a kwu fye shekna n Shekwoyi kalái nya əsa n gnyignyi ɓə ɓe n cei, n a ɓə kpekwoya wu dna n əsa kpmaknayi nu nyi. 6 Fyi n aɓo ye vnyanya fye nya agbmada yaakwo lo, kwo shikwonyi nsaiye, əsa fyewyi, kwo ɓa zè ge, fye ɓa gyeazhnì bwugbawnu nya ntu amwimwi ɓo gbowogbowo. 7 Amwumwu ye ɓa ɓe nabai ɓa wu kwo əfye gaiciyaganunui n zhni hnihnii nu, n kwo du zinali lo n apma, ədo n kwo wnuya kwo ai la kwo zhniaba n ənái nyi; kwoi ɓe n cicii, latu n mwamwai əsa n Yeisu Kirisiti ɓə kpeyaɓe ncei. 8 Kwo shikwonyi fye too gye wo əwye m, fye ye wo lo; jesnu kwo shikwonyi fye ta gye wo əwye lo nsaiye m, fye kwu gaiciyaga dna n wo, jesnu fye nunui lo n agbmada latu nyai, n a taa shni əɓa əɓo da m, 9 ntuge fye zhi fyei gwo gyiba əfye gaiciyaganunui azozhiba nya nu; əkwo nu zhni gnyignyi əfye awyewyeyi nya.

10 Ntu n gnyignyi ye ɓo, sheaɓəgwognayi, n ɓa ɓə da shebmyashi ɓo n kwo ɓə ye kwa ɓe da fye nyi, ɓa ɓə la kwo pmigye n əwyei bmyibmyiyi njesnu n ɓahnii wnashi kəcii dəidəi. 11 Ɓa zhniatna ɓa kpe əsa ye, ɓədo n aɓoi n ɓa ɓə zhni; ədo n Kirisiti Zafnu n wo dna n ɓa nyi, ɓəi gnyi woi wu ɓa əɓo n kwo ɓe lo, Kirisiti azhnìgye nya, ɓədo n latui n kwo ɓə vyi n avnu nyi. 12 A ɓə la kwo kpeyawu ɓa nge ɓa to ɓə zhi ɓai zhni əɓahni tnutnu nu m, ama əfye nya, she ɓa ɓə da fye aɓo, n aza yi n ɓa ɓə zhni waazi nabagyi manai nya ga fye nsaiye nyi, dna n Zafnu Gyigyiyi, n əshemi ɓə tnu n woi nyi. Kwo amaləka ɓa ɓəi zhi n pwawoi ɓa pmi aɓo ye gye.

13 Ntucenu, əfye abwugba ɓa la kpmagyewyi fya kwu əfyehni wnashi dəidəi, fye la əwyetu n shebmyashi n a ɓəi ɓe fye ncei, she a ɓə la Yeisu Kirisiti kpeyawu dna n əwo ɓeɓe əsa. 14 Ngye aɓyi aɓəgbetuvyiyi, fye to je gwodu fyi n aɓəmwi nukwoi pwawo n fye ɓə ncei shiɓwa əsa n fye ɓə fyi n tnagənyikpe nyi m. 15 Ama n ɓwasnu shi əza n wo ɓə yi fye, wo gyigyiyi lo nyi, ntulonu fye kwu zhi n gyigyiyi n ɓəhoɓəhoi n fye zhni; 16 ntuge a cei kakpe lo: "Fye kwu zhni n agyigyiyi, ntuge mi zhni gyigyiyi nu."

17 Shikwonyi fye yi Dada nu n wo da zahozahoyi tnutnu owa n tna-awyekwo nyi, fye gyianyì ngye azhiɓeyi fyi n ədna mwamwaga nya. 18 Ntuge fye kpəlo nge toge n anya agbmazhnii nu ngye azulufa kwo zinali n a ɓə gnyi fye n anyìgyi gbəloi n əfye azakwoyi ɓə fa shi fye nyi m, 19 ama n ami anakwoi Kirisiti nyai, Kwugyasnáyi tna-ababalai kwo tna ogwnutui. 20 A ɓə la wo knyi a kpe anyì zhni, ama a la wo kpeyawu dna əsa kpmaknayi ye, ntu əfye ɓo nu. 21 Dna n əwo nu n fya ga Shekwoyi gaiciya, əza n wo ɓə la wo kala n əfyi njesnu waa wo latu, ntulonu əfye gaiciyaganunui n awyetui ɓa nyi n Shekwoyi nu.

22 Nsaiye shi fye la əfyehni pmya n gaiciyanunui ɓəgbetuvyi, nabai fya ɓwa yeye hnihnii ga aje, fye wu aje ye wu aje yeye n loloi, kwoi kwnu n ədu gbmanyi. 23 Ntuge a la fye shna ma, toge n nyabye bwobwoi m, ama ədo n kwo taa bwo m, dna n Shekwoyi ɓədagbma wyewyeyi nya tnadoshnai. 24 Ntuge,

"Azanyikwoci vnyanya wu ngye agbegbe nu,

jesnu əɓa latu vnyanya n wu ngye amamawyí bmana nya nu;

agbegbe zhni ɓa ɓwa jesnu amamawyí ɓa vnyiya,

25 ama Dagayi ɓədagbma myignyi lo nyalonyalo."

Njesnu ɓədagbma yi nu nyi n a ɓə zhni fye əkwo waazi nyi.