1 Ntucenu, shikwonyi Kirisiti ɓə kwu azhnìgye dna n əwo nayi nyi, fye la fyehni ye ce n alu ye pyai, ntuge zahozahoyi n wo gyeazhnì dna n nayi wo la leifyi ga avnu nu. 2 Ntucenu, ɓa to ɓə ye gyianyì n ɓa n ɓai ce nyi, ntu zanyikwoci aɓəpwawo nukwoi ɓo m, ama n əkwoɓwi ntu Shekwoyi ɓəye ɓo. 3 Ntuge əsa n kwo la duya nyi, fye ɓə kwu əsa gyi n mwa fyei zhni aɓo n ashnagbayi zhni; fyei gyianyì fyi n asisiɓozhni, shakpe, jefyi, awyefna kasa, n jezhniwyiɓei, ɓədo n ashnagba asisi nyai. 4 Cei wo ɓa nge fye ta dnaɓwado lo n ɓai n əɓa anyìgyi tukwognanakwo nya m, anyigyifasa nya, njesnu ɓai knyi fye akpmi ɓai je knyi. 5 Ama ɓəshishinu ɓai ga wo nyadokwu, əwo n wo n əwohnii kwukwui lo woi da owa tu n azawyewyeyi ɓədo n afyífyii. 6 Ntucenu a kwu waazi nabagyi manai zhni ga aza yi n ɓa kwu fyí nyi, nabai n a ɓə myi a da ɓa owa, shi zanyikwoci n aɓəknawna zhni ntu n nayi ɓo, ama ɓa gyianyì dna n zafnu ga Shekwoyi.

7 Aɓo vnyanya azoba kwo la wo vyivyiwyi. Ntucenu fye kwu zhigwu njesnu fyaa bwugba yami, nabai n fye ɓa myi fya zhniaduwa. 8 Əɓo n kwo dulo vnyanya, fye wu aje yeye n loloi, ntuge yeye kwu aleifyi bəgyé pwuanya. 9 Fye wna ajeakna n tna awyice. 10 Zahozahoyi n fye, wo zhniapma n əwo nyagai n wo la gwo nyi, nabai wa zhni azaje tnutnu n cei, n zhni atnutnuyi gbənui Shekwoyi shebmyashi nya, fyi n azokwo gbowogbowo. 11 Əzahozahoyi n wa daɓo, wo da kwo n zhni əza n wo da Shekwoyi ɓədagbma cimcim. Əza n wo zhni tnutnu, wo zhni kwo n kalái n Shekwoyi ga nyi, nabai fyi n aɓo vnyanya Shekwoyi ɓa ɓwa cici dna n Yeisu Kirisiti. Latu zhni əwo nya nu ɓədo n kalái nyalonyalo. Aamyi.

12 Anugwnudo ayeyeyi, ce to wo fye ntu amwumwu asnasnayi ɓo, n ɓa ɓe da fye ɓa mwu fye gye nyi m, kwa zè ngye əɓo wowoi nu snu fye m. 13 Ama fye nya agbmada shikwonyi fye kwu aɓwa dnado ń Kirisiti azhnìgye nyi, nabai n fye ɓə ɓwa agbmada yaakwo əsa n əwo latu ɓə kpeyawu. 14 N a knyi fye akpmi ntu Kirisiti əye ɓo, fye n anabəlikai lo, ntuge Zafnu latu nya ɓədo n Shekwoyi nyai yakpe lo n fye. 15 N fya gyeazhnì, kwo to la zè ntu zawu ɓo kwo əvyiwyi, kwo aɓəkawuzhni dəhodəhoi, kwo ge aɓoaɓwafyi ɓo m. 16 Dudulonu, n fya gyeazhnì ngye Kirisitivyiyi, vnyinkwo to wo fye m, ama fye ci Shekwoyi nge ayi fye n əye yii nu. 17 Ntuge əsa kwo la si n á ɓa ya owada n Shekwoyi pwuwa; njesnu ń kwa ya n yii nu, knyiɓei nu ɓə zhni n aza yi aba, n ɓa ta vyi Shekwoyi nabagyi manai lo m ma? 18 Njesnu, "Ngye kwo dnaɓo lo ɓəfyeceyi woi pwo, knyiɓei nu ɓə zhni atnashekwodnawoyi n leifyizhniyi a?" 19 Ntulonu nsayi, aza yi n ɓa gyeazhnì vyi Shekwoyi ɓəmwi, ɓa kwu əɓahni ga fyi n Əɓazhniyi gbenui akwnu, njesnu ɓa gwodu n əɓo manai zhnii.