1 Ntucenu, fye la aɓəshinmì kwnuya vnyanya n azawyidnai, n kwocednai vnyanya, n shewoi, ɓədo n aza ayewnuyai dəhodəhoi pyai. 2 Ngye aɓyipwutu, fye kwnufnafna ɓeɓegbma tnadodnai zafnu nya, n əkwoi nu n fye ɓa myi fya mwa fyi n əfye gnyignyi, 3 nsaiye shikwonyi fye la Dagayi bmyabmya towo nyi.

4 Shi fye kwu ɓe da Kirisiti Kwuta wyewyeyi; azanyikwoci ɓə la əkwo aɓəna, ama Shekwoyi wo la kwo knyi njesnu n apma yaakwoi n əwo aba. 5 Əfyehni ce, ngye akwuta awyewyeyi, a gnyi ai mi fye nu n zhni zafnu pwuwa, fya kwu zhni Pirisiti ofye gyigyiyi, fya kwnu zafnu anyakwnukwnu agwogwoi n Shekwoyi aba ntu Yeisu Kirisiti ɓo. 6 Ntuge dna n Nyakagyigyiyi, kwo ncei da lo:

"Gyewye, mi shi kwuta nu dna n Siyona,

nyaknuɓwakwonu kwuta knyiknyiyi jesnu apmayaakwo nya,

jesnu əza n wa kpema kwo

vnyinkwo taa wo əwo m nanyinanyi."

7 Nsaiye əfye n fye kwu gaiciyaga nyi, kwuta ye n apma yaakwoi lo. Ama aza yi n ɓa to ga gaiciya nyi m,

"Kwuta n anyamiyi ɓə na kwo aɓo nyi,

kwo la zè ɓwakwonu kwuta,

8 njesnu,

"Kwuta n kwo zhni azanyikwoci ɓai knyiabwonyi

njesnu apmá n kwo zhni ɓai myiya."

Ba ɓə knyiabwonyi ntuge ɓa to ɓə vyi ɓəgbetu m, n əkwo nu ɓə zhni əɓo n a ɓə zhni ɓa ntuce nu nyi.

9 Ama fye zhni aza aknyiknyiyi nu. Fye zhni abeɓyi nu Pirisiti ofye nya, əbyé gyigyiyi, Shekwoyi nyaɓwa knyiknyii, nabai fya dna əwo cici əwyi n əwo nu ɓə yi fye n wyegbma wa lo fye fyi n əwo bwuznagna bmyabmyai. 10 N sapa fye to ɓə zhni aza nu m, ama nsaiye fye kwu zhni Shekwoyi aza; n sapa fye to ɓə gwo snusnugye m, ama nsaiye fye kwu snusnugye ɓwa.

11 Anugwnudo ayeyeyi, mi tna fye aɓwa, ngye aknyidoda n okwnula, fye la aɓwakwnu n leifyi aɓəpwawo n ɓa snu okwnu n əfye wyewyeyii nyi. 12 Fye gyianyì manai fyi n ashnagbayi atasni, nabai kwo ɓai gye nge fye zhni əɓənukwoi nu, ɓa ɓá gye əfye atnutnu manai əwye njesnu ɓa la Shekwoyi tu əwyi n wo ɓə ɓe yi gnaɓyi ncei. 13 Fye kwu əfyehni tukwo ga fyi n azanyikwoci ikwo dəhodəhoi akwnu ntu n Dagayi ɓo: kwo n əsu aba, ngye ikwo duduyi, 14 kwo n agwomna aba, aza n wo tnu n ɓai ɓa ta aza yi n ɓa zhni ɓənukwoi, njesnu ɓa ci aza yi n ɓa zhni əɓo n kwo wu cewo. 15 Ntuge Shekwoyi ɓəye nu nge n aɓo manaizhnii, fye ɓa kwnu amama agbe to ɓa da aɓəda tnagənyikpeyi nya m. 16 Fye gyianyì ngye aza aloloiya, ama fye to zhniapma n əfye loloyai kwaa zè nukwoi nya m; fye gyianyì ngye Shekwoyi afyenu. 17 Fye wu zahozahoyi mwamwaga hnihnii nya, fye ye agaiciyagayi apwuwa, fye wo Shekwoyi ədna, fya ga əsu mwamwa.

18 Afyenu, dna n Shekwoyi ədnawo mwamwaga nya, fye ga əfyehni tukwo n əfye adagayi akwnu toge n ɓwasnu n aza yi aba n ɓa zhni aɓo manai njesnu n gənyikpei m, ama n aza yi aba ce n ɓa zhinazhizhii. 19 Ntuge kwo zhni əɓo manai nu, n əza ɓwa əmì dna n snasna azhnìgye tnaɓənukwoi zhni nya, ntuge wo kpəlo nge Shekwoyi gyewye lo. 20 Ama kwo ɓaa zè əho cici ɓo n wunanu, n a lu ho ntu ɓənukwoizhni ɓo, ha ɓwamì n kwoi a? Ama n ha gyeazhnì ntu ɓəmanaizhni ɓo haa ɓwamì n kwoi, dəye zhni cici ɓo nu n Shekwoyi abye. 21 A ɓə yi fye ntu ɓəye ɓo nu, ntuge Kirisiti ɓə kwu azhnìgye ntu fye ɓo, waa əfye ya shi fye, nge fye vyi n əwo apitaɓwi.

22 "Wo to ɓə zhni leifyi m,

njesnu a to ɓə snu wo n akatai dna n əwo əgbe m."

23 She a ɓə knyi wo akpmi, wo to ɓə gbata m; she wo ɓə gyeazhnì, wo to ɓə yi ɓənukwoi kpe aza m. N əkwoɓwi, waa əwohni ya dna n əza akwnu n wo da owa dna n gaiciya nyi. 24 "Əwo n wohni tukwoi wo ɓə la əyi aleifyi kwu" dna n wo nayi tu n znudu, nabai n yi ɓa kwu zè afyífyii ga aleifyizhni njesnu ya gyianyì ntu n ɓəfyecezhni ɓo, "ntu əwo aci ɓo nu n fye kwu kágna ɓwa." 25 Ntuge, "Fye ɓə wu ngye aknyi nu n ɓa ɓəlo ɓai ɓwuaba," ama nsaiye fye la jezeɓe da əfye Knayi n Ɓəwyednayi əfye awyewyeyi nya.