1 Ga azakwoyi n ɓa fyilo n fye, mi tna fye aɓwa, shi mi zhni əfye zakwoyi ədo nu nyi, jesnu ɓəgbmii Kirisiti azhnìgye nya, ngye əza n wo ɓə kwnu latu gwo əsa n a ɓə la kwo kpeyawu nyi: 2 Fye kwu zhni Shekwoyi gəluce aknyiknayi, n ɓa fyi n əfye akwnu nyi, fya ka ɓa əwye; toge n a ye kwo yeyefyi fye nu m, ama ntuge fye kwu əfyehni ga, shi Shekwoyi ncei pma fya kwu zhni; toge fyei zna gyiba gyifyi nya shni m, ama aza n ɓa shnishni ɓa zhni tnutnu; 3 toge fyei ye aɓo kpe aza yi n a ncei n fyi n əfye akwnu nyi m, ama fya kwu zè aza amwutu nya ga gəluce. 4 Njesnu she knyiknayi Tukwoda ɓə kpeyaɓe, fye ɓə gwo fnunyi latu nya n kwo taa toya m kpeekpe.

5 Əfye ce, n fye zhni aɓyikasa nyi, kwu əfyehni ga fyi n əfye abyeda akwnu. Əfye vnyanya, fye kwu əfyehni pwi n tukwogba n aje aba, ntuge,

"Shekwoyi gnyiapaapa n tukwomwayii

ama wo wu bmyashi n tukwogbayi aba."

6 Ntucenu, fye kwu əfyehni tukwogba, dna n Shekwoyi əɓwa ikwodudui nya, nabai n wo ɓə la fye kwuwu n əsai bmyabmya. 7 Fye kwu əfye aɓəsa vnyanya fa fyi n əwo akwnu ntuge wo pa əfye əɓo lo, woi dna fye wye ciici.

8 Fye kwu zhigwu jesnu fya kwu əfye abwugba yaami. Əfye nuwnuyi shetam laɓa lo woi shegwnu ngye gaba ɓwuciyi woi zna əza shni n wo ɓa saya. 9 Fye na wo aɓo, fya kwu gnyiagnyi n myizhi n gaiciyaga, ntuge fye kpəlo ge agaiciyagayi apwuwa n anyìpata vnyanya fyilo ɓai gyeazhnì ye pya nu.

10 Njesnu Shekwoyi shebmyashi da vnyanya, n wo ɓə yi fye fyi n latu nyalonyalo nya dna n Kirisiti nyi, shi fye ɓə kwu azhnìgye əsa fyewyi, əwo n əwohnii, wo ɓə la fye zhishni jesnu woi kwu fye zhni akalada, n myizhi jesnu n əmìfyii dəidəi. 11 Kalá zhni əwo nya nu nyalonyalo. Aamyi.

12 Mi kanya ye n Sila bmazhnii nu, ń mi n woi la n zhni əmizado gbenuyi. Mi kwu nyaka ka ga fye n ɓwasnu pyikwnu, mii myi fye agwuzhi jesnu mii gbmiɓo nge dəye nu zhni shebmyashi hnihnii Shekwoyi nya. Fye kwu myizhi n kwo. 13 Nyikwo n wo nyi n Babyila nyi, knyiknyiyi n kwnusnu n fyei, wo tnu fye lo n əwo gnaɓyii, nlonu ce əmi nugwnu Marukwus tnu fye lo n gnaɓyii. 14 Fye kwu aje ɓyigna n ɓwadodna yeye nyai. Bwugbafu kwo kwnusnu n fyei vnyanya, əfye n fye fyi n Kirisiti nyi.