1 Sima Byitusu, tnutnuyi jesnu Yeisu Kirisiti tnutnuloyi.

Kwo lo da aza yi nu, dna n ɓəfyecezhni əyi Shekwoyi nya n Yeisu Kirisiti əyi gnyiyii, n ɓa kwu gaiciyaga ɓwa n kwo n apmayaakwoi n ɓwasnu ngye əyi nya.

2 Shebmyashi n bwugbafui ɓa kwu zhni əfye anya n mwamwai dna n ɓəyekpé əyi Shekwoyi nya n Yeisui əyi Dagayi.

3 Əwo zafnu kalá kwo kwu nyahonyahoi ga yi, n yi n əkwo apmai lo ntu anyìgyi shekwodnawo nya ɓo, ntu əyi əwo əye kpekpe ɓo, n wo ɓə yi əyi, fyi n əwohni latu ɓədo n əɓomanaizhnii nyi. 4 Fyi n aɓo ye nu, n wo kwu əwo aɓəgbeshi apmayaakwoda ga yi, nabai dna n əɓa nu n fye ɓa myi fya dnaɓwado dna n zafnu nyinyì, yii la waya n wnuwnuya, ń aɓəpwawo nukwoi ɓe n ɓai dna n anyì nyi.

5 Ntu əɓəye ɓo n kwo nyi, fye la əfyehni yekpé fya ɓe əfye gaiciyaga əɓomanaizhni; jesnu əɓomanaizhni fya ɓe kwo ɓəyekpe; 6 jesnu ɓəyekpe, a ɓe kwo tukwownashi; a ɓe tukwownashi, əmìfyi; a ɓe əmìfyi shekwodnawo; 7 jesnu a ɓe shekwodnawo, aje aknawna; jesnu a ɓe aje aknawna, yeye wu. 8 Ntuge ndei n fye n alu yei lo njesnu ɓai mwamwaɓe fyi n əfye, ɓa ɓa kwnu fye ya n anyìgyi ntna-apma nya jesnu tnagyigyiga nya dna n əyi Dagayi Yeisu Kirisiti yekpé. 9 Ama zahozahoyi n wo to n ɓai lo m, wo ta gyewyeba lo n kpaai m, jesnu wo zhni wyebwayi nu, wo la zamwi nge a ɓə zhna wo ya n əwo aleifyi akwokwoi nu.

10 Ntucenu əmi azaje n amapwii, fye la əfyehni mwakpe fya gbmi əfye yiyi əɓo n əfye knyiknyii. Ntuge n fya zhni aɓo ye, fye taa cebwonyi m. 11 Jesnu a ɓə gwo fye aɓwa-aba-aba fyi n əyi Dagayi n Gnyiyii Yeisu Kirisiti əbemi nyalonyalo nya.

12 Ntulonu mi ɓa pa fye aɓo ye ɓo ciici, kwo shikwonyi fye kpe əɓa əye lo jesnu fye kwu myizhi kamkam fyi n gaiciyanunui n fye ncei lo nsaiye nyi. 13 Mi zhninubwo nge kwo bmyalo ma ce fye ɓəpá əsa n mi ye shnidnadna lo n lubwi nayi ye nya, 14 ntuge mi kpəlo nge əsa taa mwa mii kpma kwo zhi m, shi əyi Dagayi Yeisu Kirisiti wo kwu kwo wu mi pəipəi nyi. 15 Ntucenu mi ɓaa əmihni mwakpe ma gye nge n əmi avnuzè, fye ɓə myi fya pa aɓo ye əɓo ciici.

16 Ntuge yi to ɓə vyi anabagyi azhnizhniyi aceceɓo nya nu, she yi ɓə da fye əyi Dagayi Yeisu Kirisiti ɓeɓe ɓo n kalái m, ama yi ɓə zhni aɓəgbmiyi nu əwo ikwodudui nya. 17 Wo ɓə la mwamwa gwo n latui n Shekwoyi Dada aba, she bəgye ɓə ɓe da wo kwoi gbmi n Latu Yaakwo, kwoi gna, "Əza ye nu zhni əmi Nugwnu, n mi ye wo, a da mi lo n woi zam." 18 Əyi n əyihni yi ɓə kwu bəgye ye wo n kwo ɓə gbmi n əshemi she yi ɓə kwnusnu n woi kpe n əpe gyigyiyi nyi.

19 Njesnu yi n sheɓəgwogna ɓədatnui lo n zhni ənya n kwo kwnukpema lo n zokwo dəhodəhoi. Njesnu kwo ɓa bmya fya kwu awyezewna n kwo, ngye bwuznagna n kwo fnu dna n wyegbma aba nya fyegyiɓwa, jesnu ngye kpasi n kwo kpé dna n əfye adu. 20 Kpe n aɓo ye tukwo vnyanya, ɓəshishinu fya ɓwa awyega nge, sheɓəgwogna Nyakagyigyiyi nya to lo n kwo ɓə ɓe n sheɓəgwognayi əwohni bmapmyii nu m. 21 Ntuge sheɓəgwogna to lo n kwo ɓə pabye n zanyikwoci ɓəye m, ama sheɓəgwognayi, kwo shikwonyi ɓa ɓə zhni azanyikwoci nu, ɓa ɓə daɓo nu n kwo kwnu n Shekwoyi, shi Zafnu Gyigyiyi ɓə vyi n ɓai.