1 Əmi anugwnudo ayeyeyi, nsaiye dəye nu zhni əmi paka baayi ga əfye. Mi kwu ɓa ka ga fye ɓa ce fye ɓəpá nabai kwa dna fye ɓənubwozhni nunui. 2 Mi ncei pma fya pa aɓədagbma n asheɓəgwognayi agyigyiyi ɓə da n sapai ɓədo n ɓəgbetui n əyi Dagayi n Gnyiyii ɓə ga fyi n əfye atnutnuloyi akwnu.

3 Tu n aɓo ye əshe vnyanya, ɓəshishinu fya ɓwa awyega nge fyi n anyipyei kpmaknai, agyekpeyi ɓə ɓe, ɓai kpeagye jesnu ɓai vyi əɓa aɓəmwi nukwoi. 4 Ɓa ɓə gna, "Əwo ‘ɓeɓe’ gnyi n nanu n wo ɓə shi kwo əgbe nyi a? Ənya n kwo laka shí əyi azakwoyi ɓəə fyí, nyahonyahoi znazna lo shi kwo ɓai shnisnu n anyazhnizhni ayayaba." 5 Ama ɓa gyi əɓo fyi n əmi ɓai gwo kpe nge n əsa avnu nya, n Shekwoyi ɓədagbmai nu n a ɓə kwnu ashebmana ɓe ncei jesnu a zhni əknyi n nuwnai kwoi gbmi n nuwna. 6 Anuwna ye nu ɓə byi anyi əsa yi nya jesnu ɓa kwu zhniagbma. 7 N ɓədagbma gbmanyigbmanyi yei nu n a kwu ashebmana nsaiye nya n əknyii fa zhi ntu əná ɓo, ncei wnaknazhi ntu n owada nyipyei ɓo ɓədo n atnashekwodnawoi agbmazhnii.

8 Ama anugwnudo ayeyeyi fye to kwu əɓo gbmanyi ye zamwi m: N Dagayi aba nyipyei gbmanyi n wu ngye aye dugwu nu, jesnu aye dugwu ngye nyipyei gbmanyi. 9 Dagayi ta zhni kalala n əwo ɓəgbeshi ɓwashii m, she azaho n awyega kalala nyai nyi m. N əkwoɓwi, wo ɓwa bwugba n fyei ntuge wo to ncei pmalo zahozahoyi n fye woi ɓwu m, ama zahozahoyi wa ɓe wa yeabwi.

10 Ama nyipyei Dagayi nya, kwo ɓə ɓe ngye əvyì nu. Ashebmana ɓə kwu ɓwuwye n əwyiɓei; əná ɓə kwu anya zhniagbma, ɓədo n əknyii n nyahonyahoi n a ɓə zhni fyi n əkwo a ɓə la kwo pmiya.

11 Shikwonyi a ɓə kwu nyahonyahoi zhniagbma nlai, knyi aza pya nu n fye gwo fya kwu zhni a? Fye kwnuce fya gyianyì fyi n gyigyi nu ɓədo n Shekwoyi dnawoi 12 shi fye tuwye n Shekwoyi nyipyei jesnu fya zhni kwo kwa pye n sii. Əwyii ɓə ɓe n ashebmana agbmazhnii nu n ənái, jesnu anya ɓə la wuya fyi n gwugwurugwu. 13 Ntu əwo ɓəgbeshi ɓo, yi zhi yii tuwye n əshemi woiwoyi nu n əknyii, aba n a zhni ɓəfyece.

14 Ntulonu anugwnudo ayeyeyi, shikwonyi ənya nyi n yi n əwyei tu lo əkwo nyi, fye la əfyehni ye ai gye fye n tnaɓənukwoi zhni, n tnaɓətu n bwugbafui n əwoi. 15 Fye la kwo dna n bwugba nge əyi Dagayi bwugbaɓwa zhni gnyignyi nu n əyi aba, n ɓwasnu she əyido Bwulus wo kwu ka ga fye ce n wyemwai n Shekwoyi ɓə ga wo. 16 Wo vyi zokwo gbmanyigbmanyi nu dna n əwo apaka vnyanya, woi da ɓa aɓo ye. Əwo apaka n aɓəhoi fyilo n ɓa dnaɓo lo n awyega ɓwa ba, ədo n atnagənyikpeyi n azai n ɓa to n myizhi lo m ɓa pmyi ɓa ɓwa ngye she ɓa zhni Anyakagyigyiyi aje nyi, ama n əɓahni agbmazhni.

17 Ntucenu, anugwnudo ayeyeyi, shikwonyi a la əɓo pma fye kwnu nyi, fye kwu zhigwu nabai n abaɓwi tna-owaɓwashi nya taa da fye awye m, kwo zhni fye fya kaya n əfye pwopwo aba m. 18 Ama fye mwa fyi n shebmyashi ɓədo n yekpei əyi Dagayi n Gnyiyii Yeisu Kirisiti.

Latu zhni əwo nya nu ənya n kwo laka nsaiye kwoi lo nyalonyalo! Aamyi.