1 Ənya n kwo ɓə nyi ń ayayaba, ń yi kwu əkwo əɓo wo, ń yi kwu kwo gyewye n əyi awyei, ń yi kwu kwo shiawye njesnu əyi aɓwa ɓa kwu kwo toɓwa, əɓo nu nyi n yi gna fye ntu Ɓədagbma wyewyeyi nya ɓo. 2 Wyewyeyi yi kwa gbmignyi; yi kwu kwo gyewye njesnu yi la əɓo gbmi kwo, yi da fye wyewyeyi nyalonyalo nya nu ɓo, n kwo ɓə kwnusnu n Dadai njesnu wo la kpeyaɓe n əyi aba. 3 Yi gna fye əɓo nu n yi kwu gyewye njesnu n yi kwu wo, ntulonu əfyehni ce, fye ɓa myi fya kwnu jedoɓəzhni n əyii. Njesnu əyi jedoɓəzhni kwo kwnusnu lo n Dadai nu ɓədo n əwo Nugwnui, Yeisu Kirisiti. 4 Yi ka dəye nabai əyi agbmada ɓa kwu nu nú.

5 Ɓədatnu nu nyi n yi kwu wo n wo njesnu yi gna fye: Shekwoyi zhni bwuznagna nu; wyegbma to lo n wo m kpeekpe. 6 N ya gna nge yi zhni jedoɓəzhni lo n kwnusnu n woi ama yii dudu yii znazna fyi n wyegbma, yi ceakata nu njesnu yi ta zhni əɓo lo n gaiciyanunui da lo m. 7 Ama n ya znazna fyi n bwuznagna, ngye shi wo dna n bwuznagna nyi, yi zhni jedoɓəzhni lo nu najei, jesnu əwo Nugwnu Yeisu ami, ɓa ɓá pmya yi n leifyi dəhodəhoi.

8 N ya gna yi to n leifyi lo m, yi dna əyihni kwoce nu jesnu gaiciyanunui to dnalo n yi m. 9 N ya da əyi aleifyi, wo zhni ɓəgbenuyi nu jesnu gaiciyada, wo ɓa zo yi əyi aleifyi jesnu wa pmya yi ń əyi atnaɓəfyecezhni vnyanya. 10 N ya gna yi to n leifyi zhni lo m, yi la wo zè katayi jesnu əwo ɓədagbma to dnalo n əyi m.