1 Fye gyewye, yeye yaakwo n Dada wo la zepwi yi n əɓwai loloiya, nge a yi əyi ge Shekwoyi aɓyi! N kwusnu aza pya nu n yi zhni! Ɓətukwo n kwo zhni to anyi ɓai kpe yi əye nyi m, əkwo nu nge ɓa to ɓə kpe wo əye m. 2 Anugwnudo ayeyeyi, nsaiye yi zhni Shekwoyi aɓyi nu, njesnu aza pya n yi ɓə kwu zhni nyi, a too wu yi kwo kpa m. Ama yi kpəlo nge əsa n Kirisiti ɓə kpeyaɓe, yi ɓə kwu wu ngye wo, ntuge yi ɓə gye wo əwye ngye shi wo nyi. 3 Aza vnyanya ń ɓa n awyetu yei lo n əwo, ɓa la ɓahni pmya n tnadodnai, n ɓwasnu she əwohni zhni tnadodnai nu nyi.

4 Zahozahoyi n wo zhni leifyi, wo la owa znugna; ɓəhnihnii leifyizhni zhni tna-owaɓwashi nu. 5 Ama fye kpəlo nge wo ɓə kpeyaɓe nabai wa kwu əyi aleifyi ya nu. Njesnu dna n wo, leifyizhni to lo m kpeekpe. 6 Əza to lo n wo dna n wo, n wo gwodu dna ń leifyizhni m. Əza to lo n wo gwodu dna ń leifyizhni, n wo kwu wo gyewye kwo n wo kpe əwo əye lo m.

7 Aɓyi ayeyeyi, fye to ye zahozahoyi wa kwnu fye ya n ofye m. Əza n wa zhni əɓo n kwo bmya, wo zhni ɓəfyeceyi nu, n ɓwasnu shi əwohni zhni ɓəfyeceyi nu nyi. 8 Əza n wo zhni leifyi, wo zhni Shetam nya nu, ntuge Shetam nu ɓə ya leifyizhni n kpmisnuyi. Ɓətukwo n kwo ɓə zhni Shekwoyi Nugwnu wa kpeyaɓe nyi, əkwo nu nge wa kwu Shetam tnutnu zhniagbma. 9 Əza to lo n a la wo shna ma dna n Shekwoyi n wo ɓa gwodu n leifyizhni m, ntuge Shekwoyi nyabye dnalo n wo; wo taa gwodu dna n leifyizhni m, ntuge a la wo shna ma dna n Shekwoyi. 10 Zokwo nu nyi n yi kpe aza aye n ɓa zhni Shekwoyi aɓyi jesnu n azai n ɓa zhni əzanukwoyi aɓyi. Zahozahoyi n wo to zhni əɓo n kwo cefyé m, wo to zhni Shekwoyi əɓyi nu m, kwo əza n wo to ye əwodo n əwo mapwii m.

11 Dəye nu zhni ɓədatnu n fye ɓə wo n kpmisnui: Nge yi wu aje yeye. 12 Fye to kwu wu ngye Kayinu n wo ɓə zhni əzanukwoyi nya nu njesnu wa wu əwo mado nyi m. Knyiɓei nu ɓə zhni wa wu wo a? Ntuge əwo atnutnu ɓə zhni anukwoi nu, ama əwo mado nya ɓə zhni afyecei nu. 13 Ce to wo fye m, əmiaje n amapwii, n fya gye anyi ɓai wnu fye ənu m. 14 Yi kwu kpe nu nge yi la kwnu n əfyi lo wyewyeyi, ntuge yi ye lo n ajei. Zahozahoyi n wo ta wu yeye lo m, wo ye dnalo n əfyi. 15 Zahozahoyi n wa wnu əwodo ənu kwo mapwii, wo zhni zawuyi nu, njesnu yi kpəlo nge zawuyi to lo n wo n wyewyeyi nyalonyalo nyai lo m.

16 Zokwo nu nyi n yi kpe ənya əye n kwo gyi yeye: Yeisu Kirisiti ɓə la əwo wyewyeyi ga ntu əyi ɓo. Njesnu yi gwo ya kwu əyi awyewyeyi ga ntu əyi azaje ɓo n əyi amapwii. 17 Ngye n əzaho n anyaɓwai ya zhi lo wa gye əwodo kwo mapwi n dna n anyisnagyi, ama to wa wna wo snusnu m, Shekwoyi yeye dnalo n əza yi n wunanu a? 18 Anugwnudo ayeyeyi, yi to wu yeye n aɓədagbmai nu kwo aɓəda dai m, ama fyi n əyi aɓəzhni njesnu dna n gaiciyanunui.

19 Zokwo nu nyi ń yi ɓa kpəge yi zhni gaiciyanunui anya nu, njesnu yi kwu əyi adu zhi ɓa ɓwa asnusnu ba n əwo abye: 20 Ngye n əyi adu kwu yi znuknyi, yi kpəlo nge Shekwoyi wo du əyi adu lo, njesnu wo kpe ɓəhoɓəhoi əye lo. 21 Anugwnudo ayeyeyi, n əyi adu to znu yi əknyi m, yi n agwumyii lo zhi n Shekwoyi abye; 22 jesnu yi ɓa gwo nyahonyahoi n wo, n yi nya əkwo əɓo, ntuge yi shi əwo aɓəgbetu əɓwa lo njesnu yii zhni əɓo n kwo da wo. 23 Njesnu dəye nu zhni əwo ɓəgbetu: ya kwu gaiciya ga fyi n əwo Nugwnu əye, Yeisu Kirisiti, njesnu ya wu aje yeye ngye shi wo ɓə tu yi əgbe nyi. 24 Əza n wa shi Shekwoyi ɓəgbetu əɓwa, wo gyianyì dnalo nu n Shekwoyi, n kasnu ce, Shekwoyi dnalo n wo. Nlai nu n yi ɓa kpəge wo gyianyì dnalo n yi: Yi kpe əkwo əye n Zafnui nu n wo ɓə ga yi nyi.