1 Əmi aɓyi ayeyeyi, mi ka dəye ga əfye nu, nabai to fya zhni leifyi m. Ama əzahozahoyi n wa zhni leifyi, yi n bmazhniyii lo n kwnusnu n Dadai, Yeisu Kirisiti, Ɓəfyeceda. 2 Əwo nu zhni tagba nyagbmi ntu əyi aleifyi ɓo, kwo to ɓwasnu ntu n əyi anya ɓo nu gbmanyi m, ama ntu anyi aleifyi vnyanya ɓo ce.

3 N ya shi əwo aɓəgbetu əɓwa; yi kpəlo nu nge yi kwu wo kpeye. 4 Əzahozahoyi n wa gna, "Mi kpe əwo əye lo," ama to woi zhni əɓo n wa tu əgbe m, wo zhni katayi nu, jesnu gaiciyanunui to dnalo n əza yi m. 5 Ama əza n wa shi əwo ɓədagbma əɓwa, ɓəhnihni əwo yeyewu ga Shekwoyi kwo la nu dna n əwo. N zokwo ye nu n yi kpəlo nge yi fyilo n wo. 6 Zahozahoyi n wa gna nge wo gyianyì dnalo n Yeisu, ɓəshishinu wa gyianyì she Yeisu ɓə gyi nyi.

7 Anugwnudo ayeyeyi, mi ta ka ɓəgbetu woiwoi nu ga fye m, ama kwokwoi nu; ədo n fye ɓə n əkwo əɓoi shnisnu n ayayaba nyi. Ɓəgbetu kwokwoi ye nu n zhni ɓədatnu n fye kwu wo nyi. 8 Dudulonu, mi ka ɓəgbetu woiwoi nu ga fye; a gye əkwo gaiciyanunui lo dna n wo ɓədo n əfyei, ntuge wyegbma gnyilo kwoi duya jesnu bwuznagna hnihnii kwo la lu ya kwoi fnu.

9 Əzahozahoyi n wa gna nge wo dnalo n bwuznagna, ama woi wnu əwodo kwo mapwi ənu, wo yee dnalo n wyegbma. 10 Əzahozahoyi n wa wu əwodo kwo mapwi yeye wo dnalo n bwuznagna, jesnu nyaho to dnalo n wo n kwo ɓa zhni wo wa cebwonyi m. 11 Ama əzahozahoyi n wo wnu əwodo kwo mapwi ənu, wo ye dnalo n wyegbma jesnu wo znazna laɓa dna n wyegbma nu. Wo ta kpe aba əye lo n wo lo m, ntuge wyegbma kwo kwu wo bwawye.

12 Aɓyi ayeyeyi, mi gnyi mii ka ga əfye nu,

ntuge a kwu əfye aleifyi zo fye ntu əwo əye ɓo.

13 Mi gnyi mii ka ga əfye nu, adada,

ntuge fye kpe əwo əye lo n wo ɓəə nyi n ayayaba nyi.

Mi gnyi mii ka ga əfye nu, aɓyikasa,

ntuge fye kwu əzanukwoyi gyiakalá.

14 Aɓyi ayeyeyi, mi ka ga fye,

ntuge fye kpe Dada əye lo.

Adada, mi ka ga fye,

ntuge fye kpe əwo əye lo n wo ɓə nyi n ayayaba nyi.

Azanugbai aɓyikasa, mi ka ga fye,

ntuge fye n akalái fyilo,

ntuge Shekwoyi ɓədagbma dnalo n fye,

njesnu fye kwu əzanukwoyi gyiakalá.

15 Fye to ye anyi kwo nyahonyahoi n kwo dnalo n anyì m. Ndei əzahozahoyi ye anyi lo, Dada yeye to dnalo n wo m. 16 Ntuge nyahonyahoi n kwo dnalo n anyi, shakpe nayi nya, shakpe awye nya n tukwomwa anyìgyi nyai, ɓa ta kwnu n Dada aba nu m, ama n anyi. 17 Anyi n əkwo aɓo pwawoi ɓa duya lo, ama zahozahoyi n wa zhni Shekwoyi ɓəye wo ɓa gyianyì nyalonyalo.

18 Aɓyi ayeyeyi, əsa kpmaknayi nu gnyi nyi; n ɓwasnu shi fye kwu wo nge Kirisiti nuwnuyi ɓe lo nyi, kwo nsaiye, Kirisiti anuwnuyi bəgyé ɓa kwu ɓe. Nlai nu n yi ɓa kpe nge əsa kpmaknayi nu gnyi nyi. 19 Ɓa ɓə kwnu n əyi nu, ama ɓəhnihni ɓa to ɓə zhni əyi anya nu m. Ntuge ɓa ɓə gna ɓa zhni əyi anya nu, ɓa ɓə ɓa kwu kwnufyi n yii, ama əɓa kwnukwnuya kwo kwu wu nge ɓa to ɓə zhni əyi anya nu m.

20 Ama fye n pmyapmyai lo n kwo kwnu n Gyigyiyida, njesnu əfye vnyanya fye kpe gaiciyanunui əye lo. 21 Mi ta ka ga fye ntuge fye ta kpe gaiciyanunui əye lo nu m, ama ntuge fye kpe əkwo əye lo njesnu ntuge akatá to lo n kwo gbmiɓe n gaiciyanunui nu m. 22 Nyika nu zhni katayi a? Zahozahoyi n wo naɓo nge Yeisu nu zhni Kirisiti. Əza yi pya nu zhni Kirisiti nuwnuyi, woi na Dada aɓo ɓədo n Nugwnui. 23 Əzaho to lo n wo na Nugwnu aɓo n wo n Dadai lo m; zahozahoyi n wa kpe Nugwnu əye, wo n Dadai lo ɓədo.

24 Ntucenu, fye fa əɓo n fye ɓə wo n ayayaba nyi, kwo kwu kpefyi n fye. N kwo zè lonu əfyehni ce fye ɓa kwu kpefyi n Nugwnu ɓədo n Dadai. 25 Njesnu ənya nu nyi n wo ɓə shi yi əgbe; wyewyeyi nyalonyalo nya.

26 Mi gnyi mii ka aɓo ye ga fye ntu aza yi ɓo nu n ɓa zhniatna ɓa fyi fye n abaɓwi nyi. 27 Ama əfyeeda, pmyapmya n fye ɓə gwo n əwo nyi, kwo fyilo n fye, ntulonu fye ta ye əzaho lo wa wu fye ənya m. Ama shikwonyi əwo pmyapmya wu fye aɓo lo vnyanya nyi, njesnu pmyapmya ye zhni hnihnii nu toge kwocedna nya m; n ɓwasnu shi a kwu kwo wu fye nyi, fye kwu kpefyi n kwo.

28 Njesnu nsaiye, aɓyi ayeyeyi, fye gwodu fyi n wo, nabai əsa n wo ɓə kpeyaɓe ncei, n yi ɓə ɓwa agwumyi njesnu to vnyinkwo kwoi wo yi zhi n əwo abye m, əsa n wo ɓə ɓe nyi m.

29 Ngye fye kpəlo ge wo zhni ɓəfyeceyi nu, fye kpəlo nu ge zahozahoyi n wo zhni ɓəfyece, a la wo shna ma dna n wo.