1 Anugwnudo ayeyeyi, fye to ga zafnu dəhodəhoi nu gaiciya m, ama fye mwi azafnu fya kpe kwo ɓa zhni Shekwoyi anya nu, ntuge sheaɓəgwognayi katái bəgyé ɓa la kwnuya lo anyì. 2 Zokwo nu nyi n fye ɓa kpe Zafnu Shekwoyi nya əye: zafnu dəhodəhoi n kwa kwu ye nge Yeisu Kirisiti ɓə la ɓe dna n nayi, kwo gbmi n Shekwoyi nu, 3 ama zafnu dəhodəhoi n kwo to kpé Yeisu əye m, kwo ta gbmi n Shekwoyi nu m. Dəye nu zhni zafnu Kirisiti nuwnuyi nya, ədo n fye kwu wo nge kwo ɓəlo nyi, kwo nsaiye kwo pmadnadna lo n anyi.

4 Əfye, aɓyi ayeyeyi, fye kwnu n Shekwoyi aba nu jesnu fye kwu myi n əɓa ɓo, ntuge əwo n wo dna n əfye nyi, wo du əwo lo n wo dna n anyi nyi. 5 Ɓa kwnu n anyi nu, ntucenu ɓa daɓo vyi anyi aɓodada nu, njesnu anyi kna ɓa tnubwa. 6 Yi kwnu n Shekwoyi aba nu, jesnu zahozahoyi n wo kpe Shekwoyi əye lo, wo kna yi tnubwa; ama zahozahoyi n wo ta gbmi n Shekwoyi aba nu m, wo taa kna yi tnubwa m. Nlai nu n yi kpe Zafnu gaiciyanunui nya əye n zafnu kwocedna nyai.

7 Anugwnudo ayeyeyi, fye fa ya wu aje yeye, ntuge yeye gbmi n Shekwoyi nu. Zahozahoyi n wo wu yeye, a la wo shna ma nu dna n Shekwoyi, jesnu wo kpe Shekwoyi əye lo. 8 Zahozahoyi n wo ta wu yeye lo m, wo ta kpe Shekwoyi əye ye lo m, ntuge Shekwoyi zhni yeye nu. 9 Shekwoyi ɓə wu əwo yeye dna n əyi atasni nlai nu: Wo ɓə tnu n əwo Nugwnu mamayi gbmanyi kəto dna n anyi, nabai n yi ɓa myi ya gyianyì dna n əwo. 10 Dəye nu zhni yeyewu: toge yi ɓə ye Shekwoyi nu m, ama nge əwo nu ɓə ye yi jesnu wa tnu n əwo Nugwnui n zhni tagba nyagbmi ntu əyi aleifyi zo ɓo. 11 Anugwnudo ayeyeyi, shikwonyi Shekwoyi wo kwu yeye wu yi nsnu nlai nyi, yi ɓə gwo ya wu aje yeye ce. 12 Əza to lo n wo shni Shekwoyi əwyegye m; ama n ya wu aje yeye Shekwoyi dnalo nu n yi jesnu əwo yeye kwo kwu nu fyi n əyi.

13 Nlai nu n yi kpe nge yi gyianyì fyilo n wo, n kasnu əwo ce n dnalo n yi: Wo la əwo Zafnu ga yi. 14 Yi kwu gyewye jesnu yi la əɓo gbmi nge Dada wo la tnu n əwo Nugwnui waa zè anyi Gnyiyi. 15 Əzahozahoyi n wa ye nge Yeisu zhni Shekwoyi Nugwnu nu, Shekwoyi dnalo n wo jesnu əwohni n dna n Shekwoyi. 16 Ntulonu yi kpəlo jesnu yi kpmima n yeye nu n Shekwoyi ncei lo ga yi nyi.

Shekwoyi zhni yeye nu. Zahozahoyi n wo dnalo n yeye wo dnalo n Shekwoyi jesnu Shekwoyi dnalo n wo. 17 Nlai nu n əyi yeye zhni nunui nu n əyi atasni nabai n yi ɓə ɓwa agwumyi n owada nyipyeii: Fyi n anyì ye, yi wulo ngye Yeisu nu. 18 Ədnawo to lo dna n yeye m. Ama yeye nunui kwo kwnu ədnawo ya, ntuge ədnawo ɓe ntu n tata ɓo nu. Əza n wo wodna wo to zhni nunui nu dna n yeye m.

19 Yi wu yeye ntuge əwo nu ɓə kpmi yi yeyewu. 20 Zahozahoyi n wa gna nge wo ye Shekwoyi lo, ama woi gwodu woi wnunu n əwo əzadoi kwo mapwi, wo zhni katayi nu. Ntuge zahozahoyi n wo to wu əwodo kwo mapwi yeye m, aza n wo gye ɓa əwye lo nyi m, wo taa wu Shekwoyi yeye; əwo n wo ta gyewye lo nyi m. 21 Njesnu wo la ɓəgbetu ye ga yi: Əzahozahoyi n wo ɓa wu Shekwoyi yeye, ɓəshishinu wa wu əwodo n əwo mapwi yeye.