1 Saña ke usʌñ ima nyʌñ nekke wʌdọ mme enọ Sịbidịd, akpan-akpan enọ prọfesi. 2 Sia awo akeedodo a-asemme nsio-nsio edemeikọ isemme inọ awo ado asem anọ Abasi. Ke akpanikọ, inwañake awo ndomokeed se ammọ esem sia ammọ esem mme ndedịbe ñkpọ ke Sịbidịd. 3 Ado awo a-atañña prọfesi atañ anọ mme awo nọ enie nsọọñọnda, nsọọñọidem ye idọñesịd. 4 Awo a-asemme nsio-nsio edemeikọ, asem ke ufọn idem amọ, ado awo a-atañña prọfesi atañ ke ufọn ufọkabasi. 5 Ami ñkpaama nọ afịd ndufo esem nsio-nsio edemeikọ, ado ñkpaanekke ñyem ndufo etañ prọfesi. Awo a-atañña prọfesi a-akoñ idaha akan awo a-semme nsio-nsio edemeikọ, ibọhọke aba awo se ikappa nọ anam ufọkabasi akọt.

6 Ndin, nditọeka ke Krais, adieke ami ndiighe ibịne ndufo ñnyʌñ nsem nsio-nsio edemeikọ, nsoo ufọn ke ami ndiinie inọọ ndufo, ibọhọke ami mben adiyaara me ifiọk me brọfesi me ukpeebñkpọ isọk ndufo? 7 Ikpidat udomo ñkpọ ke mme ñkpọ se ikeme adinam uyom nte adʌk me ndido, awo adiinam die idiọọñọ se ekwọ adieke anye imiidiọọñọke mme nsio-nsio uyio se idọñọ ke esịd? 8 Ñko, adieke uyio adukpoñ imiinwañake awo, ediinam die inie mbeeñeidem inọ ekọñ? 9 Ukem ami ke ado ye ndufo. Ibọhọke ndufo ekama edeme ndufo etañ ikọ se inwaña awo, ediinam die idiọọñọ se ndufo etañ? Adiiba nte ndufo etañ ikọ edọñ ke afịm. 10 Ado akpanikọ ke nsio-nsio usem ebañña ke ederimbod, ado ibaaha anye i-imiinieghe se awuọñọ. 11 Adieke mmeñkoppo se awo atañ, ami ndo asenawo nnọ awo ado, anye ñko ado asenawo annọ miin. 12 Ukem ami ke ado ye ndufo. Sia ndufo enieghe udọñ adinie mme enọ Sịbidịd, idomo ukeme adinekke nnam ufọkabasi akọt.

13 Ke ntak ado, yak mbon e-esemme nsio-nsio edemeikọ ebọñ akam ebeeñe ukeme adikan ñkappa se ammọ esem. 14 Sia adieke ami mbọññọ akam ke asen edemeikọ, ado sịbidịd mmi abọñ akam, ado esịd mmi inieghe mbunwịm. 15 Ndin ami ndiinam die? Ana mbọñ akam ke sịbidịd mmi ñnyʌñ mbọñ ke ikike mmi ñko; ana ñkwọ ikwọ ke sịbidịd mmi ñnyʌñ ñkwọ ke ikike mmi ñko. 16 Adieke afo atooroke Abasi ke sịbidịd mfo, mbon mfen e-etooho esiin edi ediinam die isọọñọ ekọọm mfo ke adibo, "Amen" ke ini ammọ imiidiọọñọke se afo atañ? 17 Afo anọ ekọọm ke akpanikọ, ado ekọọm mfo ibaaha ufọn inọ awo mfen.

18 Mmekọọm Abasi ke ami mmesem nsio-nsio edemeikọ ñkan afịd ndufo. 19 Ado ke esịd ufọkabasi ami ñkpaakap mma aditañ ikọ ition se inwaña mme awo nọ akpeep mme awo ñkpọ ñkan aditañ ikọ tọsịn duob ke asen edemeikọ.

20 Nditọeka ke Krais, itre adikere ñkpọ nte ntəkayịn. Akpedo ke usʌñ idiọọkñkpọ ido ntəkayịn, ado ido ñkpoon awo ke akikere ndufo. 21 Ke Mbed e-ewet ete:

"Ami ñyaatañ ikọ nnọ ibon ami

nto mme awo e-esemme mme usem mfen

ye ke mme ñkpọkinua isenawo,

ado kpayeado, ammọ idiikpañña utọñ innọ miin,"

Abọọñ atañ.

22 Adisem nsio-nsio edemeikọ ado idiọọñọ, ado idooho idiọọñọ inọ mbon e-enịmme Abasi ke akpanikọ, ado idiọọñọ anọ mbon i-imiinịmme Abasi ke akpanikọ. Ado prọfesi ana anọ mbon e-enịmme Abasi ke akpanikọ, inaaha inọ mbon i-imiinịmme Abasi ke akpanikọ. 23 Ke ntoro, adieke afịd ufọkabasi ebohoke keed ndin afịd awo esem nsio-nsio edemeikọ, ndin mme mme akoi me mbon i-imiinịmme Abasi ke akpanikọ edʌk edi, nte ammọ idiibooho ke ndufo emedamma? 24 Ado adieke awo i-imiinịmme Abasi ke akpanikọ me akoi adʌkkọ adi ke ini afịd awo etañña prọfesi, eyaewọt anye ke anye ado anam idiọọkñkpọ, ñko afịd awo eyaebiom anye ikpe, 25 ndin mme ndedịbe ñkpọ esịd ammọ eyaeyaara. Ammọ ndin eyaeduọ ke isọñ ekpono Abasi, enyʌñ ebo, "Ke akpanikọ, Abasi mmọdo ke atu ndufo!"

26 Nsoo ndin ke ñnyịn idiitañ, nditọeka ke Krais? Ndufo imaidiboho, ndin awo keedekeed anie ikwọ, me ikọ ukpeebñkpọ, me adiyaara, me nsio-nsio edemeikọ me adikappa. Ana enam afịd ñkpọ nọ ato do ufọkabasi akọt. 27 Adieke awo asemme asen edemeikọ, yak awo iba, ñwak mbọhọ awo ita esem, awo keedekeed ke ini keed, ndin ana awo akappa se esem. 28 Andikappa imiibaaha, yak andisem adop uyio ke ufọkabasi, asem anọ idem amọ ye Abasi.

29 Yak prọfed iba me ita etañ ikọ, ndin mbon ako ana enekke edomo se etañ. 30 Ndin adieke eyaarake ñkpọ enọ awo a-atieghetie, awo andikito ntañ ikọ ana atre. 31 Sia afịd ndufo eyaekan etañ prọfesi ke adiana ke adiana, nọ afịd awo ekan ebọ ukpeeb enyʌñ enie nsọọñọnda. 32 Mme sịbidịd mme prọfed eba ke nsuukiwuod enọ mme prọfed. 33 Sia Abasi idooho Abasi ndutịme ado ado Abasi emem, kpa naña ado ke afịd mbono ikọd Abasi.

34 Ibaan ikpinaaha esio uyio ke esịd ufọkabasi. Inaaha ammọ etañ ikọ, ado ana eba ke idak nsuukiwuod, kpa naña mbed atañ. 35 Adieke ammọ enieghe mbuume ebaña ñkpọ akeedodo, yak ammọ ebịp mme ebe ammọ ke ufọk; sia ado ñkpọ abuud awonwaan aditañ ikọ ke esịd ufọkabasi.

36 Nte ikọ Abasi akito ndufo asakka? Me ado nte ndufo ikpọọñ ke ikọ Abasi akesịm? 37 Adieke awo akeeadodo akereke ke mmimọ ido prọfed me iminie enọ sịbidịd, yak ammọ enyịmme ke se ami ñwet ami ado ewʌhọ Abasi. 38 Adieke awo ndomokeed asịnne ikọ ami, eyaenyʌñ esịn ammọ.

39 Ke ntoro, nditọeka mmi ke Krais, inie udọñ aditañ prọfesi, ikiinyʌñ ikpan adisem nsio-nsio edemeikọ. 40 Ado yak enam afịd ñkpọ ke usʌñ a-adotto.