1 Nditọeka ke Krais, ami ñyem aditoiyo ndufo eti etob a-ami ñkekwọrọ inọọ ndufo, a-ndufo ekebọọhọ, e-ekenyʌññọ enie nsọọñọnda. 2 Ato ke eti etob ami ndufo ebọ adinyaaña, adieke ndufo esọọñọke eda ke se ami ñkekwọrọ inọọ ndufo. Imiidooho ntoro, adinịm ke akpanikọ ndufo ado ikpu-ikpu.

3 Sia se ami ñkebọọ ke ñkekpọñ inọọ ndufo nte ataa akpan ñkpọ: Ke Krais amaakpa ke ntak idiọọkñkpọ ñnyịn, kpa naña ewet ke ñwed Abasi, 4 ke emaebuuk anye, ndin emaenam anye aset ke ayọhọ usen ita kpa naña ewet ke ñwed Abasi, 5 ndin ke anye amaayaara idem awọt Kefas* ye mme mbed duob mme iba. 6 Ke ado aboiyoke, anye amaayaara idem awọt mme nditọeka ke Krais e-ekewakka ekan awo ikie ition, uwak ammọ mmọdo ke uwem, akpesʌkado usʌk emaedaiya. 7 Akema anye amaayaara idem awọt Yems, ndin afịd mme abọsịd, 8 ndin ke akpatre anye amaayaara idem añwọt miin ñko, nte anye a-akemanake ke atikwo-atikwo usʌñ.

9 Sia ami ndo andisịp ñkan ke atu mme abọsịd, ndotto se ekpekoot abọsịd sia mmaakọbọ ufọk Abasi. 10 Ado ato ke mfọn Abasi, ami ndo se ami ndo, ndin mfọn amọ ikidooho ke utak-utak. Iyoo, mmaanam utom ñkan afịd mme abọsịd mbon ñko, idooho ke ukeme mmi, ado ato ke mfọn Abasi a-akebaaha ye ami. 11 Idahami, me ato ke ami-o, me ato ke ammọ-o, se ñnyịn ikwọrọ ado ami, ñko se ndufo ekenyʌñ enịm ado ado.

12 Ado adieke ekwọrọke ebo ke emaenam Krais aset ke ñkpa, usʌk ndufo enam die ebo ke adised ke ñkpa ibaaha? 13 Adieke adised ke ñkpa imiibaaha, awuọñọ ke Krais ke idem amọ ikiisette. 14 Ndin adieke Krais imiikisette, awuọñọ ke ukwọrọikọ ñnyịn ye mbuọdidem ndufo ado ikpu-ikpu. 15 Ke akanna ado, mme awo ediikịt ñnyịn nte idoñño mme ntiense nsu ibaña Abasi, sia ñnyịn imitie ntiense ibaña Abasi ibo ke anye akenam Krais aset ke ñkpa. Ado Abasi ikinamma Krais aset, adieke ke akpanikọ mme akpañkpa imiisette. 16 Sia adieke imiikpinamma mme akpañkpa eset, awuọ ke awo ikinyʌññọ inam Krais aset. 17 Ndin adieke Krais imiikisette, mbuọdidem ndufo ado ikpu-ikpu; esʌk enyeenyịne ke idiọọkñkpọ ndufo. 18 Ndin mbon e-ekekpaññake ke Krais e-etak. 19 Adieke ñnyịn inieghe idodanyen ke Krais ke uwem ami ikpọọñ, awuọñọ mbọm ñnyịn a-akpon eti-eti akan afịd mbon mfen.

20 Ado ke akpanikọ emaenam Krais aset ke ñkpa, akpa mbunwịm mbon e-ekpaññake. 21 Sia ñkpa aketooho awo keed adi, adised ke ñkpa anyʌñ ato awo keed adi. 22 Sia atooho ke Adam afịd awo ekpa, ñko ke Krais eyaenam afịd awo edu uwem. 23 Ado anie ini amọ anie: Krais, akpa mbunwịm, ndin anye amaadi, mbon se ido ake amọ ediana. 24 Ndin utịd ayaadi, ini se Krais adiikpọñ abioubọọñ inọ Abasi Ete ke ini anye amaakesobo afịd adudu ye ukara. 25 Sia ana anye akara tutu anye asịn mme asua amọ ke idak ñkpad amọ. 26 Akpatre asua e-ediisobo ado ñkpa. 27 Sia anye, "asịn afịd ñkpọ ke idak ñkpad amọ." Ndin emaebo, "afịd ñkpọ" asịne ke idak amọ, e-ediọọñọ ke Abasi ke idem amọ isịneke ke idak ado, sia anye ado andikisịn afịd ñkpọ ke idak Krais. 28 Ke ini anye amaakenam ami, Ayịn ayaasuuk iwuod anọ andikisịn afịd ñkpọ ke idak amọ, nọ Abasi ado afịd ke afịd.

29 Ndin adieke adised ke ñkpa imiibaaha, mbon e-eduọkkọ mmọọñ enọ mme akpañkpa ediinam die? Adieke mme akpañkpa imiidiisette, ntak a-ambon awo eduọkkọ mmọọñ enọ ammọ-ọ? 30 Ndin ñnyịn ntom, ntak a-ñnyịn isioho idem ñnyịn inyan anwa-anwa-a? 31 Kwa usen ami ñkịt ñkpa ke anyen, akpanikọ ke ntañ, kpa naña nduaak inua ke ntak ndufo ke Krais Yisọs Abọọñ ñnyịn. 32 Adieke ami ñkekamake idodanyen ikpọkidem kpọd ñnwana ye mme afai unam ke Efisọs, nsoo ido udod mmi? Adieke mme akpañkpa imiisette,

"Yak ñnyịn idia inyʌñ inwọñ,

sia ñkpọñ ñnyịn iyaikpañña."

33 Ikiiyak awo itịn ndufo usʌñ: "Idiọọk nsaña ababiat eti edu."* 34 Itịmme idinie nti iwuod ndufo naña ekpeba, inyʌñ itre edinam idiọọkñkpọ; sia a-aba mbon i-imiinieghe ifiọk ibaña Abasi; ami ntañ ami nọ abuud imʌm ndufo.

35 Ado awo ayaabịp, "Mme akpañkpa enam die eset? Nsoo utọ ikpọkidem ke ammọ ediinie?" 36 Ataa ndisịme! Se awo atọ ikemeke aditịppe ibọhọke ñkpọ ado akpa. 37 Awo amaatọ ñkpọ, idooho se anye adiidọk ke anye atọ, ñkpasi kpọd ke etọ, me ake abakpa me ñkpọ mfen. 38 Ado Abasi anọ anye idem naña anye abiide, ndin anye anọ nsio-nsio ñkpasi asaña-asaña idem. 39 Afịd ikpọkidem idooho ukem: Awo anie utọ idem keed, unam anie mfen, inuen utọ mfen, iyak utọ mfen. 40 Idem ake hefịn mmọdo, idem ake isọñ mmọdo ñko; ado uyai idem ake hefịn ado isio-isio, idem ake isọñ anyʌñ ado isio-isio. 41 Utịn a-anie asaña-asaña uyai amọ, afiọñ ñko a-anie asaña-asaña uyai amọ ye mme ntantaafiọñ ñko; ntantaafiọñ keed akpəho ye ntantaafiọñ mfen ke uyai.

42 Ukem ami ke adiido ke adised mme akpañkpa. Idem e-etọọhọ ado mbiara, ado amaaset ibiarake; 43 etọ ke asuenne, adiset ke ubọọñ; etọ ke mmemidem, adiset ke adudu; 44 etọ ke abʌkidem, adiset ke idem sịbidịd.

Adieke abʌkidem abaaha, ana idem sịbidịd ñko anyʌñ aba. 45 Ke ntoro e-ewet: "Akpa awo Adam ado aduuwem ñkpọ," akpatre Adam, ado anọ uwem sịbidịd. 46 Idooho sịbidịd aketo adi, ado abʌkidem, ke ado aboiyoke sịbidịd adiana. 47 Akpa awo akedo ntọñ isọñ, ayọhọ awo iba ato hefịn. 48 Kpa naña awo ederimbod akeba, kpa ntoro ke mbon e-etooho ntan isọñ ebañña; naña awo hefịn aba, ntoro ñko ke mbon hefịn ebañña. 49 Kpa naña ñnyịn inie mbid awo a-atooho ntan isọñ, ntoro ñko ke idiinie mbid awo a-atooho hefịn.

50 Ntañ inọ ndufo, nditọeka ke Krais, nte ke abʌk ye iyiib ikanna adinie udeeme ke abioubọọñ Abasi, me mbiara adinie udeeme ke se imiibiarake. 51 Ikpañ utọñ, ami idọkkọ ndufo ndịbe-ndịbe ñkpọ. Idooho afịd ñnyịn idiikpa, ado eyaenam afịd ñnyịn ikpəho 52 ke adibọp anyen ntat, ke akpatre adukpoñ amaasio uyio. Sia adukpoñ ayaasio uyio, ndin eyaenam mme akpañkpa eset ye ikpọkidem i-imiidiibiarake ndin eyaikpəho ñnyịn. 53 Sia se ido mbiara ana akappa ado se imiidibiarake, ndin ikpaikpa ñkpọ akappa anie nsi-nsi uwem. 54 Ke ini mbiara amaakappa ado se imiibiarake, ikpaikpa ñko akappa anie uwem, ndin se ekewet ayaadisu: "Adikan a-aben ñkpa amen."

55 "O ñkpa, mmọ adikan mfo?

O ñkpa, mmọ ifod mfo?"

56 Ifod ñkpa ado idiọọkñkpọ, adudu ñkpa ado mbed. 57 Ado ekọọm anie Abasi! Anye i-inọ ñnyịn adikan ato Abọọñ ñnyịn Yisọs Krais.

58 Ke ntoro, ndima nditọeka mmi ke Krais, isọọñọ ida. Ikiiyak ñkpọ ndomokeed inyeeñe ndufo. Isịn idem ndufo ayọhọ-ayọhọ afid ini ke utom Abọọñ, sia emediọọñọ ke ñwaidem ndufo idooho utak-utak.