1 Ise utọ ekamba ima e-Ete imaaha ñnyịn, tutu ikoot ñnyịn nditọ Abasi. Ndin kpa ado ke ñnyịn ido. Ederimbod idiọọñọke ñnyịn nte nditọ Abasi, sia ammọ imiikidiọọñọke anye. 2 Mme ndima ufan, idahami ñnyịn ido nditọ Abasi; ado Abasi iyaarake diin inọ ñnyịn se ñnyịn idiido. Se ñnyịn idiọọñọ ado ke Krais amaadi, ñnyịn iyaitie nte anye; iyainyʌñ ikịt naña anye aba. 3 Afịd awo se inie utọ idodanyen ami, e-enam idem ammọ asana, ukem-ukem naña anye ado Adisana.

4 Afịd awo e-enamma idiọọkñkpọ e-ebiat mbed. Ke akpanikọ, idiọọkñkpọ ado ubiad mbed. 5 Ado ndufo emediọọñọ ke anye akedi nọ anye adiben mme ndiọiñkpọ ñnyịn afep. Ñko, idiọọkñkpọ ndomokeed ibaaha anye ke idem. 6 Ibaaha awo a-adʌññọ ke anye amaana aka iso anam idiọọkñkpọ. Ibaaha awo a-akaaha iso anam idiọọkñkpọ a-akịtte anye me a-adiọọñọke anye.

7 Ndima nditọ, ikiiyak awo ndomokeed itịn ndufo usʌñ. Awo a-anamma eti ñkpọ ado adinen, ukem-ukem naña Krais ado adinen. 8 Awo a-anamma idiọọk ado ake setan, sia setan ado anam idiọọk tọọñọ ke editọọñọ. Ayịn Abasi akedi nọ adibiat ubọkutom setan. 9 Awo se Abasi abon idiikaaha iso inam idiọọkñkpọ, sia ñkpasi Abasi mmọdo adʌñ anye ke idem. Ammọ ikanna ikaiso ke idiọọkñkpọ, sia ato ke Abasi, ammọ emana ufa. 10 Ami ado usʌñ naña ñnyịn idiọọñọ mme andido nditọ Abasi ye nditọ setan. Awo i-imiinamma se inen idooho ayịn Abasi. Awo i-imiinyʌññọ ima ayịneka amọ ke Krais, idooho ake Abasi.

11 Sia ami ado etob a-ndufo ekebọọhọ tọọñọ ke editọọñọ: Akpena ñnyịn ima emọ-emọ. 12 Ikiiba nte Keen a-akedooho ake setan andidiọọk, ndin awot ayịneka amọ. Nsoo ikido ntak a-anye akewotto ayịneka? Sia mme ñkpọ se anye akenam ekedo ndiọi, ake ayịneka amọ ekedo nnen-nnen. 13 Ikiiyak idem ikpa ndufo, nditọeka* mmi ke Krais, adieke ederimbod isuaha ndufo. 14 Ñnyịn imidiọọñọ ke imiwuọñọ ke ñkpa, idʌk ke uwem, sia ñnyịn imima emọ-emọ ayịneka ñnyịn. Awo i-imiinieghe ima asʌk asịne ke ñkpa. 15 Awo akeedodo a-asuaha ayịneka amọ ke Krais ado awodawo. Ndin ndufo emediọọñọ ke awodawo ndomokeed inieghe nsi-nsi uwem ke idem amọ.

16 Ñnyịn idat ami idiọọñọ ima Abasi: Yisọs Krais amaayaak uwem amọ anọ ke ntak ñnyịn. Ñnyịn ñko, akpena iyaak uwem ñnyịn inọ ke ntak nditọeka ñnyịn ke Krais. 17 Adieke awo anieghe inie isọñ ami ndin akịt ayịneka amọ ke Krais a-abaaha ke unana, ado ituaha anye mbọm, ima Abasi anam die aba ke uwem awo ado? 18 Ndima nditọ mmi, yak ñnyịn ikiima ima ñkpọkinua, me ke ikọ inua kpọt, ado yak iwọt ima ke adinam ñnyịn ye ke akpanikọ.

19 Ntom ke ñnyịn idat idiọọñọ ke ñnyịn ido nditọ akpanikọ, ye naña ñnyịn inam esịd ñnyịn aba ke emem ke iso amọ. 20 Adieke esịd ñnyịn ibiommo ñnyịn ikpe, ñnyịn imidiọọñọ ke Abasi a-akpon akan esịd ñnyịn anyʌñ adiọọñọ afịd ñkpọ. 21 Mme ndima ufan, adieke esịd ñnyịn imiibiommo ñnyịn ikpe, ñnyịn iminie nsọọñọnda ke iso Abasi, 22 inyʌñ ibọ ñkpọ akeedodo a-ñnyịn ibeeñeke anye, sia ñnyịn iminịm mme mbed amọ, inyʌñ inam ñkpọ se inem anye esịd. 23 Ami ado mbed amọ: Adinịm ke anyịñ Ayịn amọ, Yisọs Krais, ye adima emọ-emọ naña ewʌhọ amọ akitemme ñnyịn. 24 Mbon e-enịmme ewʌhọ Abasi edʌñ ke anye, anye anyʌñ adʌñ ke esịd ammọ. Ndin ntom ke ñnyịn idiọọñọ ke anye adʌñ ke esịd ñnyịn ato ke Sịbidịd a-anye akinọọhọ ñnyịn.