1 Ami Pọọl, abọsịd Krais Yisọs ke uduak Abasi, nnọ ñwed ami esọk mme ndisana ikọd Abasi ke Efisọs, mme andisọọñọ nda ke Krais Yisọs. 2 Yak mfọn ye emem a-atooho Abasi Ete Ñnyịn ye Abọọñ Yisọs Krais aba ye ndufo.

3 Itooro anie Abasi ye Ete Abọọñ ñnyịn Yisọs Krais, a-amaakidiọñ ñnyịn ke ebekpo ubọọñ ye afịd adidiọñ Sịbidịd ke Krais. 4 Sia anye ke idem amọ amaimek ñnyịn ke Krais mbemiso ekebot ederimbod ate isana inyʌñ inana ndo ke iso amọ. Ke ima 5 anye amaimek ñnyịn ke adiben ñnyịn mbon nte nditọ ato Yisọs Krais, nte asañake akekem ke inemesịd ye uduak amọ, 6 ke itooro ye ubọọñ mfọn amọ, a-anye inọọhọ ñnyịn ke mfọn ato Krais a-anye amaaha. 7 Ke anye ke ñnyịn inie ufak ato iyiib amọ, adifeen mme idiọọkñkpọ, a-asañake akekem ye mme inie e-etooho mfọn Abasi 8 a-anye akenwaññake ifʌk ñnyịn. Ye afịd aniọñ ye adinam anwaña, 9 anye amaanam ñnyịn idiọọñọ ndedịbe uduak amọ naña asaña akekem ke inemesịd amọ, a-anye amaakeduaduak ke Krais, 10 a-adiinam awuọ ada ayọhọ-ayọhọ ke ini amaadikem, nọ eben afịd ñkpọ ke abio Abasi ye ke isọñ edian keed ke idak ukara Krais.

11 Ke anye, emaenyʌñ imek ñnyịn i-imaikibaba tọọñọ ke aditọọñọ, nte asañake akekem ke ubonoñkpọ anye a-anamma afịd ñkpọ asio nọ asaña ye ewʌhọ uduak amọ, 12 nọ ato do, ñnyịn i-ikidooho akpa adidot anyen ke Krais, ikan ikwọ itooro mfọn amọ. 13 Ndin emaenyʌñ isịn ndufo ke Krais ke imaikikop ikọ akpanikọ, adooho eti etob adinyaaña ndufo. Ke imaikinịm ke akpanikọ, emainịm ndufo idiọọñọ ke ufiikñkpọ Adisana Sịbidịd e-ekenwọñọke, 14 a-adooho ubiọñ udeeme akpa ñnyịn tutu ini adinyaaña mbon e-edoññoke ake Abasi, ke itooro ubọọñ amọ.

15 Ke ntak ami, tọọñọ ami ñkekop mbaña mbuọdidem ndufo ke Abọọñ Yisọs dian ima a-ndufo enieghe enọọ afịd ndisana nditọ Abasi, 16 ami ntreke adinọ ekọọm ibaña ndufo, ke adikaiso itoiyo ndufo ke akam. 17 Ami nsʌk ñkakaiso mbeeñe mbo yak Abasi Abọọñ ñnyịn Yisọs Krais, Ete andibọ ubọọñ, inọ ndufo Sịbidịd aniọñ ye adiyaara, nọ ndufo ediọọñọ anye afọn akan ami. 18 Ami mmenyʌñ mbọñ akam mbo yak enam anyen esịd ndufo anwaña nọ ato do ndufo ediọọñọ idodanyen a-anye ikoodo ndufo, ye inie ubọọñ afịd ndisana ikọd amọ, 19 ye ananambid akpọsọñ adudu i-inọọhọ ñnyịn mme andinịm ke akpanikọ. Adudu ado ado ukem akpọsọñ adudu amọ, 20 a-anye akekamake anam Krais aset ke ñkpa anyʌñ atem anye ke ubọk nnasia amọ ke mme ikpeghe ebekpo hefịn, 21 a-akoñño akan afịd ukara ye adudu ye afịd ubọọñ, ye afịd anyịñ se ekpekakan adikoot, idooho ke emana ami ikpọọñ ado ye ke emana adiidi. 22 Ndin Abasi amaasịn afịd ñkpọ ke idak ukod amọ anyʌñ amek anye adido adaiwuod nnọọ afịd ñkpọ ke ufọkabasi, 23 a-adooho idem amọ, uyọhọ anye a-anamma afịd ñkpọ ayọhọ ke afịd usʌñ.