1 Nte awo ñkpakọb Abọọñ, ami mmikpeiye ndufo nte edu uwem a-adotto ikood a-ndufo ebọọhọ. 2 Isuuhọ idem ataa afịd-afịd, inyʌñ iba emem-emem; inie ime, iyọ emọ-emọ ke ima. 3 Idomo afịd ukeme adidiana keed ke Sịbidịd ato ke emem i-idianna ndufo keed. 4 Idem keed aba, Sịbidịd keed anyʌñ aba, kpa naña ekikoot ndufo ke idodanyen keed ke ini ekikoodo ndufo; 5 Abọọñ keed, mbuọdidem keed, uduọkmmọọñ keed; 6 Abasi keed ye Ete afịd awo, a-akarake afịd ñkpọ, ato afịd awo anyʌñ asịne ke idem afịd awo.

7 Ado, i-inọ ñnyịn keedekeed mfọn akeene naña Krais adeeme. 8 Ntak ado anam ikọ Abasi abo:

"Ke anye amaakedọọk ke anyọñ,

anye amaadat uwak awo nte mbon ñkpakọb

anyʌñ adeeme mme enọ anọ ikọd amọ."

9 (Nsoo ke "anye amaakedọọk" awuọñọ, ke imiibọhọke ke anye amaasọiyọ adʌk usuuhọ mme ikpeghe isọñ? 10 Anye a-akesọiyọke anyʌñ ado anye a-akedọọhọ akoñ akan afịd mme hefịn, nọ anye ayọhọ afịd ekondo.) 11 Ke ntoro Krais ke idem amọ akenọọ mme abọsịd, mme prọfed, mme ifanyere, usʌk mme akwọrọikọ ye mme andikpeeb, 12 adibeeñe ikọd amọ idem nnịm nnọ utom unọ unwam, nọ ekan ebọp adisana idem Krais, a-adooho ufọkabasi 13 tutu afịd ñnyịn inie adidiana keed ke mbuọdidem ye ifiọk ke Ayịn Abasi inyʌñ inie ndiọọñọidem isịm afịd uyọhọ Krais.

14 Ndin ñnyịn idiidooho nsek nditọ a-afịm anəkko aka iso ye edem, ndin afịm ukpeeb ye afịd ñkara ye ndukanna mme awo ke nsu ammọ iben ñnyịn atọ ke nnasia ye ufiin. 15 Utu ke ado, ke aditañ akpanikọ ke ima, ke afịd usʌñ ñnyịn iyaikọt inyʌñ ikpoon idʌk ke idem anye a-adooho iwuod, a-adooho Krais. 16 Ato ke anye afịd idem, e-emaekekama nsio-nsio asịb ibọp edian keed, akọt anyʌñ abọp idem amọ adian ke ima, naña ñkek keedekeed enam utom ammọ.

17 Ke ntoro, ami idọkkọ ndufo, ñnyʌñ mmaana nsọọñọ mbo ke idak Abọọñ, ke inaaha ndufo ekaiso edu uwem aba nte mme Gentile enamma ato ke uyaha akikere ammọ. 18 Ifiọk ammọ ado ñkịm-ñkịm, anyʌñ asịkke ammọ akpọñ uwem Abasi ato ke unana adidiọọñọ a-asịneke ammọ ke idem ato ntak isọñesịd ammọ. 19 Sia ammọ enanake iso abuud, ammọ eyaak idem ammọ enyiin ke mme nsio-nsio ndiọi udọñ abʌkidem a-anamma nọ ammọ ekaiso ke afịd ndedeghe eduuwem, enyʌñ eyọhọ ye udọrọ itọñ.

20 Ado idooho utọ eduuwem ami ke ndufo ekekpeep ke ini ndufo ekekoppo ebaña Krais, 21 e-ekenyʌññọ ikpeep ndufo ke anye nte asañake akekem ke akpanikọ a-asịneke ke Yisọs. 22 Ke abaña ñkaan eduuwem ndufo, emaikpeep ndufo ete eduọñọ ñkaan eduuwem ndufo amaakebiaña ato ke mme abiaña-abiaña udọñ, 23 nọ enam ndufo edo ufa ke akikere ndufo; 24 enyʌñ eben ufa idem esịne, e-ekebotto nọ aba nte Abasi ke nnen-nnen ido ye adisana uwem.

25 Ke ntoro ana afịd ndufo etre nsu enyʌñ etañ akpanikọ enọ keed ye aken, sia afịd ñnyịn idoñño ñkek idem keed. 26 "Ikiinam iyadesịd inam ndufo enam idiọọkñkpọ." Ikiiyak utịn asuuhọ adisịme ndufo naña esʌk eyayat esịd, 27 ñko ikiinyʌñ inọọ andidiọọk ndomo mbeñe ufañ adiboiyo ndʌk. 28 Awo ndomokeed a-asiyịppe inọ inaaha ayịp aba, ado ana anam utom, anam ñkpọ se ifọn ke ubọk amọ, nọ anye anie ñkpọ se akan adiañña anọ mbon unana.

29 Ikiiyak idiọọk ikọ ndomokeed iwuọ ndufo ke inua, ado yak ado se ikan inwam adisọọñọ mme awo idem ke unana ammọ, nọ mbon e-ekpañña utọñ ebọ ufọn ñko. 30 Ikiinyʌñ inọọ Adisana Sịbidịd Abasi mbʌññọ esịd, anye e-ekebenne ifiik ndufo idiọọñọ tutu usen adifak. 31 Itoomo afịd idiọọkesịd, abom ye iyadesịd, anwan ye ikọ, adidọk ye afịd udod awo uyio iduọọñọ. 32 Ifọn ido inyʌñ ikop mbọm ibaña emọ-emọ, ifeen inọ emọ-emọ kpa naña Abasi akefeen inọọ ndufo ke Krais.