1 Pọọl ye Timoti, mme isʌñutom Krais Yisọs, ewet ñwed ami enọ afịd ndisana ikọd Abasi ke Krais Yisọs e-ebaaha ke Filipai, adiana ye mme adaiwuod ufọkabasi ye mme dikịn. 2 Yak mfọn ye emem a-atooho Abasi Ete ñnyịn ye Abọọñ Yisọs Krais aba ye ndufo.

3 Ami mmesikọọm Abasi mmi afịd ini a-ami itoiyoke ndufo. 4 Ke afịd akam se ami mbọñ nnọ afịd ndufo, ami nsibọñ ye inemesịd afịd ini 5 ke ntak a-ndufo ekeeneke ewuana ke eti etob tọọñọ ke akpa usen tutu asịm idahami. 6 Ndin mmenịm ke ayọhọ akpanikọ nte ke anye a-aketọọñọke eti utom ke idem ndufo ayaaben anye akesịm utịd tutu usen Krais Yisọs.

7 Ado nnen-nnen ñkpọ ami adinie utọ udọñ ami mbaña afịd ndufo, sia ami mminie ndufo ke esịd. Adooho ami nsịne ke akpọnọ me anyʌññọ ado ñnwana ke unen me ke adisọọñọ akpanikọ eti etob, afịd ndufo emekeene ewuana ke mfọn Abasi ye ami. 8 Abasi akeme aditie ntiense mbaña naña afịd ndufo eñwʌt miin ke ima a-atooho Krais Yisọs.

9 Ndin akam mmi ado yak ima ndufo adọdiọñ akpon ke ifiọk ye ntəño ikike, 10 nọ ndufo ekan ediọọñọ ñkpọ se ifọn ikan enyʌñ enana ndo tutu usen Krais, 11 eyọhọ ñko ye mfịd adinenido, a-atooho Yisọs Krais ke ubọọñ ye itooro Abasi.

12 Nditọeka* ke Krais, ami ñyem ndufo ediọọñọ ke se ikitịppe innọọ miin anenekke anyaaña ke adinam eti etob atara. 13 Ke ntak ami, a-anekke anwaña afịd mme akpeme akwere adidem ye afịd mbon mfen ke ami mba ke ñkpakọb ke ntak Krais. 14 Ato ke ntak akpọnọ mmi, uwak mme nditọete ke Krais enie nsọọñọidem ke Abọọñ enyʌñ enie uko aditañ ikọ Abasi ifegheke ndịk.

15 Ado akpanikọ ke usʌk awo ekwọrọ Krais ke ufịb ye utọk, ado usʌk awo enyʌñ ekwọrọ ke eti esịd. 16 Mbon e-ekwọrọke ke eti esịd enam ado ke ima, ediọọñọ ke ensịn miin mi ke ntak adifaaña nnọọ eti etob. 17 Mbon e-ekwọrọke ke utọk ye ufịb ekwọrọ Krais ato ke udọñ adiwọt idem ammọ, idooho ke akpanikọ, ekere ke mmimọ imikan inam insịn miin ke ntịme ke ini ami nsịneke ke ñkpọnọ. 18 Ado ufọn aba mọọ? Akpan ñkpọ ado ke afịd usʌñ, me ato ke nsu-nsu udọñ me ato ke akpanikọ, esʌk ekwọrọ Krais. Ndin ato ke ntak ami esịd mmi anem.

Ii, ami ñyaasʌk ñkakaiso adinem esịd, 19 sia ami mmediọọñọ ke ayaato ke akam ndufo, ye unwam Abasi a-Sịbidịd Yisọs Krais anọọhọ, ñkpọ se ikitịppe ami innọọ miin ayaakappa ado ñkpọ adinyaaña annọ miin. 20 Ami ke udọñ esịd mmi nsʌk nse ñnyʌñ nsʌk ndot anyen mbo ke ndiikoppo abuud ke baaba usʌñ ndomokeed, ado ke ñyaanie ayọhọ nsọọñọnda nọ ato do, idahami ye ke afịd ini, eyaebenne Krais ke idem mmi, adooho ke uwem me anyʌññọ ado ke ñkpa. 21 Ke idem mmi, adidu uwem ado Krais, adinyʌñ ñkpa ado udod. 22 Adieke anaaha ami ñkaiso ndu ke abʌkidem, ami adiido utom a-anwịmme mfịd annọ miin. Kpayeado, nsoo ke ami ndiimek? Ami ndiọọñọke! 23 Ami nda ke ufọọd ñkpọ iba ami: Ami mmenie udọñ adikpọñ ñnyʌñ mba ye Krais, a-atʌmmọ afọn akan, 24 ado anekke anie ufọn inọ ndufo ami adiba ke abʌkidem. 25 Sia ami mmenekke ñyʌkkọ ke ado, mmediọọñọ ke ñnyaasʌhọ mi ye afịd ndufo ke ntak ufọn ndufo ye inemesịd ke mbuọdidem, 26 nọ ato do ke ami adimaana mba ye ndufo, inemesịd ndufo ke Krais Yisọs adiyọhọ aduọiyọ ke ntak mmi.

27 Naña akpedodo, ikama idem ndufo ke usʌñ a-adotto ye eti etob Krais. Ndin me ami ndedi ndikịt ndufo me ñkokop ibaña ndufo ke ini mmembaaha, ami ñyaadiọọñọ ke ndufo emesọọñọ eda ke Sịbidịd keed, enyʌñ ediana keed esịn ukeme ke abaña mbuọdidem eti etob. 28 Ikiiyak ndịk inam ke ntak mbon e-enwanake ye ndufo. Ami ado idiọọñọ anọ ammọ ke eyaesobo ammọ ado ke Abasi ayainyaaña ndufo. 29 Sia, ke iwuod Krais emainọ ndufo unen, idooho adinịm anye ke akpanikọ ikpọọñ, ado adinyʌñ mbọọ ufen ke ntak amọ, 30 sia adooho esʌk enie ukem mfịna a-ndufo ekekịtte naña ami nnie, e-enyʌññọ ekop ke ami nsʌk nnenie.