1 Ke akpatre, nditọeka mmi ke Krais, idat esịd ke Abọọñ! Idooho mfịna innọ miin adimaana ñwet ukem ñkpọ ami inọọ ndufo, sia ado ñkpọ se ifọn ye ndufo. 2 Itịñ anyen ise mme ewa ado, mbon e-enamma idiọọk, mme andisappa abʌkidem. 3 Sia ado ñnyịn ido mme afọọrọ edʌd, ñnyịn i-ikponoke Abasi ke Sịbidịd amọ, ñnyịn i-ikamake Krais Yisọs iduaak inua, i-imiinyʌññọ inie idodanyen ke abʌkidem, 4 akpesʌkado ami ke idem mmi mmenie mme ntak adinie utọ idodanyen ado.

Adieke awo ndomokeed akereke ke iminie mme ntak adinie utọ idodanyen ado ke abʌkidem, ami mmenie awak akan. 5 Ekemfọọrọ miin edʌd ke ayọhọ usen itiaita, nto ubon Isrel ke ufọk Benyamin, awo Hibru ke ubon Hibru, ke ñkañ mbed ndo awo Farisi; 6 ke adikinie udọñ adikọbọ ufọkabasi; ke adinen ke mbed, ñkenieghe ndudue ndomokeed.

7 Ado afịd se ikido udʌk innọ miin, ndikịt idahami nte ntakudua ato ke ntak Krais. 8 Akanna ado, ami ñkịt afịd ñkpọ nte ntakudua ke ntak ananambid ekọmudua ifiọk adidiọọñọ Krais Yisọs Abọọñ mmi, a-adooho ke ntak amọ ke afịd ñkpọ akappa ado ntakudua. Ami ñkịt afịd ammọ nte mbio ke itoon, nọ ato do ami nnie Krais nte udʌk, 9 enyʌñ eñkịt miin ke anye. Ñko, ami nnieghe adinenido ake mmi a-atooho mbed, ado anye a-atooho mbuọdidem ke Krais, adinenido a-atooho Abasi ke ntak mbuọdidem ke Krais. 10 Ami ñyem adidiọọñọ Krais, ye adudu adised ke ñkpa amọ ye adikeene ñwuana ke mme ukuud amọ, adikappa mba nte anye ke ñkpa amọ, 11 ndin naña akpedodo, adikeene ñko ñwuana ke adised mme akpañkpa.

12 Idooho nte ami mmebọbọi afịd mme ñkpọ ami, me ke emaenanam mfọn mma, ado ami nsʌk ñnwanwana ñkaa iso adikimʌm ñkpọ ado a-Krais Yisọs akedatta ammʌm miin. 13 Nditọeka ke Krais, ndatta idem mmi nte mmemʌm anye ñkama diin. Ado ñkpọ keed ke ami nnam: Adifre mbaña se imaikiboiyo ndin ñnyanna mbịne se inaa ke iso. 14 Ami nsʌk ñnwana adikisịm itie edikan nọ mbọ ñkpọ ayịnutom nduba A-Abasi akeñkoodo anọ abio Abasi ke Krais Yisọs.

15 Afịd ñnyịn i-ikponno inyʌñ idiọọñọ idem akpena ida ikịt mme ñkpọ ke utọ usʌñ ami. Ñko, ke abaña mme usʌk ñkpọ a-ndufo enieghe isio-isio akikere, Abasi ayaanam mme ñkpọ ado inwaña ndufo. 16 Naña adodo, yak nọ ñnyịn idu uwem nte asañake akekem ke itie a-ñnyịn imaikiwuọwuọ.

17 Nditọeka ke Krais, idiana ye mbon mfen ke edisaña ke uwọdñkpọ mmi, inyʌñ ise mbon eduuho uwem a-asañake akekem ke udomo a-ñnyịn ikinọọhọ ndufo. 18 Sia kpa naña ami nsima adidọkkọ ndufo tọọñọ ke akpa, ndin idahami, mmemaana ntañ ye mmọọñayịd ke uwak awo edu uwem nte mme asua krọs Krais. 19 Utịd ammọ ado nsobo, Abasi ammọ ado idịb ammọ, ndin ubọọñ ammọ asịne ke ñkpọ abuud ammọ. Esịd ammọ asịne ke mme ñkpọ ederimbod ami. 20 Ndin ñnyịn isʌk ibet ye udọñesịd Andinyaaña a-atooho hefịn, Abọọñ ñnyịn Yisọs Krais, 21 a-adooho, ke adudu a-anọọhọ anye ukeme adiben afịd ñkpọ nsịn ke idak amọ, anye ayaanam usuuhọ-usuuhọ ikpọkidem ñnyịn akappa atie nte idem ubọọñ amọ.