Jonas 2

* 2: Ke mme ikpañwed Hibru ewet Yọọn 2:1 nte Yọọn 1:17, ñko ewet Yọọn 2:1-10 nte Yọọn 2:2-11. 1 Yọna amaasịne ke idịb iyak ado abọñ akam anọ Abọọñ Abasi amọ. 2 Anye amaabo ate:

"Ke ukuud mmi ami mmaakoot Abọọñ,

ndin anye amañyie miin.

Ñkesịne ke ube ñkpa ñkoot ñyem unwam,

ndin afo amaakop ayịd mmi.

3 Afo amamben miin atop asịn ke udem,

ke ataa esịd akpainyañ,

ndin ndufịd mmọọñ ayʌt añkanna miin;

afịd ndufịd ye atọ mfo

etọ emfʌk miin.

4 Ami mmaabo nte, ‘Embịne miin

esio ke iso mfo;

kpayeado ñyaamaana nse

adisana tembịd mfo.’

5 Mme mmọọñ e-eñkannake miin ekʌk ennam miin ndịk,

udem añkanna miin akʌk;

mbid akpainyañ añwaña miin ke iwuod akanna.

6 Ami mmaatịkke ñkewuọ adʌñ ikpọabod;

idak isọñ abet usʌñ ansịn ke nsi-nsi.

Ado afo, Abọọñ Abasi mmi,

amaasio uwem mmi ke ube afep.

7 "Ke ini uwem mmi akebaaha nte ayaaboiyo ifep,

ami mmautoiyo fiin, Abọọñ,

ndin akam mmi amaadọọk ubịne fiin,

ke adisana tembịd mfo.

8 "Mbon e-eyịreke mme ikpu-ikpu ubobodñkpọ

e-ekpa edem ewọt ima a-Abasi anieghe anọ ammọ.

9 Ado ami ñyaadat ñkpo itooro ekọọm,

ñwa uwa unọ fiin.

Se ñnwọñọ ñyaanam.

Ami ñyaabo, ‘Adinyaaña ato Abọọñ.’ "

10 Ndin Abọọñ amaanọ iyak ado uyio, anye amaanyʌñ akekọk Yọna asio adot ke nsaad isọñ.