1 ini keed akeedodo a-ami ñkọkkọ Isrel,

ndiọiñkpọ Ifrem ena anwa-anwa

e-enyʌñ eyaara mme ndudue Sameria.

Ammọ enam abiaña,

mme inọ e-ebom mme ufọk edʌk,

mbon ñwo enyʌñ ebọ mme awo ñkpọ ke mme usʌñ;

2 ado ammọ idiọọñọke

ke ami mmetoiyo afịd ndiọi adinam ammọ.

Ndiọiñkpọ ammọ ekanna ammọ ekʌk;

ammọ ena inwañ-inwañ ke iso mmi.

3 "Ammọ enem adidem esịd eto mme ibak ammọ,

ñkparawa ubọọñ ye mme nsu ammọ.

4 Afịd ammọ edo mme asịn efịbe,

e-esakka nte ikañ ofịn

ikañ a-mme atem uyo imiikpaaha idem adibara

tọọñọ ke ini enuakkake ndomuyo tutu anye adakka ada.

5 Ke usen usọrọ adidem ñnyịn

mme akpanabọọñ eyʌkkọ ye ukọd,

anye anyʌñ adiana keed ye mbon nsaha.

6 Esịd ammọ eba nte ikañ ofịn;

ammọ esaña ebịne anye ye ñkara.

Udọñ ammọ asak usʌk-usʌk nte ndubek ikañ afịd akonayio;

ke usiere anye asak nte ikañ afai.

7 Afịd ammọ efiop nte ofịn;

ammọ ewowot mbọọñ ammọ.

Afịd mme ndidem ammọ eduọññọ,

awo ammọ ndomokeed iñkoodo miin.

8 "Ifrem awuaha ye mme idịd mfen;

Ifrem ado ñkpakpa-ñkpakpa uyo a-awo idiikannake ikʌp.

9 Mme isenawo efiip adudu amọ esio,

ado anye idiọọñọke.

E-esiime anye ntọñ ke ided,

ado anye idiọọñọke.

10 Ñkokkoidem Isrel ado ntiense anọ anye,

ado kpa ye afịd ami

anye itịmmeke ibịne Abọọñ Abasi amọ,

inyʌññọ iyem anye.

11 "Ifrem atie nte ibiom,

inieghe ifiọk ndin amem utom adibiaña anye;

idahami akoot Iyib,

akem awọññọ abịne Asiria.

12 Ammọ emaekaa, ami ñyaatop iyịre mmi mfʌk ammọ;

ami ñyaadʌt ammọ nte inuen ke ikpaanyọñ nduọọk ke isọñ.

Ami mmaakop naña ammọ eboho keed

ami ñyaamʌm ammọ.

13 Adọdiọọk anọ ammọ,

sia ammọ eyooñ eñkpọñ miin!

Nsobo anie ammọ,

sia ammọ esọñ iwuod ye ami!

Ami mmenie udọñ adifak ammọ,

ado ammọ etañ nsu-nsu ikọ endian miin.

14 Ammọ ituaha ayịd ke awọñesịd ammọ innọ miin,

ado etua ke akpọsọñ uyio ke ñkpana ammọ.

Ammọ esai idem ammọ, eseeme ekoot mme abasi ammọ

eyem ñkwa abakpa ye ufa ukọd,

ado ammọ ewọññọ eñkpọñ miin.

15 Ami mmaakpeep ammọ ñnyʌñ nsọọñọ ammọ ubọk,

ado ammọ eduak idiọọk embaña miin.

16 Ammọ ikannake ibịne Andikoñ Ñkan;

ammọ ebit utịgha a-abiarake.

Akañkañ ayaadia mme adadusʌñ ammọ

ke ntak mme ikọ usọñanyen ammọ.

Ke ntak ami eyaekama ammọ enam ñkpọ ndọk

ke isọñ Iyib.