* 1 Isrel, tịmme bịne Abọọñ Abasi mfo.

Ndiọiñkpọ mfo edo iduọ mfo!

2 Dat ikọ saña

nyʌñ tịmme bịne Abọọñ.

Bo anye ate:

"Dakka do ke afịd ndiọiñkpọ ñnyịn,

nyʌñ iben ñnyịn ke mfọn mfo nọ idem,

yak ñnyịn inọ mfịd a-atooho ñkpọkinua ñnyịn utu ke ayaaraenañ.

3 Asiria ikemeke inyaaña ñnyịn;

ñnyịn idiidọọhọ anyọñ enañmbakara unwana ekọñ.

Tutu amama ñnyịn idiimaanake ibo ‘Mme abasi ñnyịn’

ke mme ñkpọ se ubọk ñnyịn enam,

sia ke afo ke nditọakpa ebọ mbọm."

4 "Ami ñyaakọk mfiakedem ammọ,

ñnyʌñ mma ammọ ke ntadesịd,

sia iyadesịd mmi amaawọññọ akpọñ ammọ.

5 Ami ndiiba nte mbara nnọ Isrel;

anye ayaasakka nte lili.

Nte sida ke Lebanọn,

anye ayaasuuk adʌñ amọ;

6 ntək emịne amọ eyaekọt.

Uyai amọ adiiba nte eto ọlif,

inem ufịk amọ aba nte sida ke Lebanọn.

7 Mme awo eyaemaana ekeba ke idak mfuud amọ;

ammọ eyaeforo nte ñkwa abakpa,

ammọ eyaekọt nte fain,

etob Isrel adiiba nte ukọd Lebanọn.

8 Ifrem, nsoo ndubeghe ke ami mmaana nnie ye mme ubobodñkpọ?

Ami ñyaabọọrọ anye ñnyʌñ nse ñkpọ mbaña anye.

Ami mba nte nseghe eto yunipa;

nseghe mfo ato ke ami."

9 Anie ado awo aniọñ? Yak ammọ ediọọñọ mme ñkpọ ami.

Anie ado awo eti iwuod? Yak ammọ ebọ ifiọk.

Mme usʌñ Abọọñ edo nnen-nnen;

ndinen awo esaña ke ammọ,

ado mbon nsọñiwuod efiọnnọ ke ammọ.