1 "Ikop ami, ndufo mme aku!

Ikpañ utọñ, ndufo nditọ Isrel!

Inekke ikop, ndufo ufọk mbọọñ!

Ubiereikpe ami inie ndufo:

Ndufo emedo afia ke Mispa,

iyịre e-etatta efʌk Tabọ.

2 Mbon nsọñiwuod enyenyịne ke uwot awo.

Ami ñyaatʌnọ afịd ammọ.

3 Ami mmediọọñọ afịd ñkpọ mbaña Ifrem;

Isrel ñko idịbeke ke iso mmi.

Ifrem, idahami afo amekeene asaña akpara;

Isrel ñko abiara.

4 "Mme adinam ammọ iyakka ammọ

etịmme ebịne Abasi ammọ.

Sịbidịd akpara a-asịne ammọ ke esịd;

ammọ inyịmmeke adidiọọñọ Abọọñ.

5 Ñkokkoidem Isrel a-atie ntiense anọ ammọ;

nditọ Isrel, ñkọrọ Ifrem, eduọ ke idiọọkñkpọ ammọ;

Yuda ñko anyʌñ aduọ ye ammọ.

6 Ke ini ammọ esañake ye mme edọñ ye mme ufene ammọ

eka adiyem iso Abọọñ,

ammọ idiikịtte anye;

anye amaasioño idem akpọñ ammọ.

7 Ammọ inamma akpanikọ inọ Abọọñ;

ammọ eman nditọ i-imiitooho ndọ.

Ke ini ammọ ediaha mme usọrọ Ufa Afiọñ,

anye ayaabiat mme inwañ ammọ.

8 "Fịt adukpoñ ke Kibie,

fịt nnʌk ke Rama.

Sio uyio ñkpo ekọñ ke Bed Afịn;

dat usʌñ, Benyamin.

9 Eyaenịm Ifrem ifed

ke usen ikpe amaakem.

Ke afịd esiin Isrel

ami mmetañ anwa-anwa se ido akpanikọ.

10 Mme adadusʌñ ke Yuda eba nte mbon

esịkkeke mme itiad adaña.

Ami ñyaanwañña iyadesịd mmi mfʌk ammọ ke idem

nte udiọhọ mmọọñ.

11 E-efiik Ifrem,

e-esọnnọ anye ke ikpe,

ye udọñ adibịne mme ubobodñkpọ.

12 Ami mba nte utañkpọ nnọ Ifrem,

nte mbiaña ñkpọ nnọ mbon Yuda.

13 "Ke ini Ifrem akekịtte udọñọ amọ,

Yuda ñko anyʌñ akịt mme inia amọ,

Ifrem amaawọññọ abịne Asiria,

anyʌñ adọọk abịne ekamba adidem nọ anọ unwam.

Ado anye ikanna ukọk fiin,

inyʌññọ ikan ikọk mme inia mfo.

14 Sia ami ndiiba nte ekpe nnọ Ifrem,

nte ekamba ekpe nnọ Yuda.

Ami ñyaawai ammọ mbai-mbai, ñnyʌñ nsaña mboiyo;

ami ñyaatañ ammọ nsio, awo ndomokeed idiinyaañake ammọ.

15 Ndin ami ñyaanyọñ itie nnaa mmi

tutu ammọ enyịmme ndudue ammọ,

enyʌñ eyem iso mmi;

ke ini ndutʌhọ ammọ

ammọ eyaenekke eñyem miin ke akpan."