1 "Ben adukpoñ dian ke inua mfo!

Ntrukpuum mmọ ke anyọñ ufọk Abọọñ

sia mme awo ebiat edioomo mmi,

enyʌñ esọñ iwuod ye mbed mmi.

2 Isrel e-etua ennọ miin,

‘Abasi ñnyịn, ñnyịn imisuuk iwuod unọ fiin!’

3 Ado Isrel asịn se ido eti;

asua ayaabịne anye.

4 Ammọ emek mbọọñ ibọọhọ unyịmme into miin;

ammọ emek ñkparawa ubọọñ a-ami mmennọọhọ unyịmme.

Ye silfa mme kold ammọ

ammọ enam ubobod ñkpọ enọ idem ammọ

ebeeñe nsobo ammọ.

5 Sameria, top ubobod enañ mfo duọọk!

Iyadesịd mmi a-asak nte ikañ abaña ammọ.

Adiikpeene die mbemiso ndufo etre usappa idem ndufo?

6 Ammọ eto Isrel!

Ubobod enañ ami, anam utomusọ abot anye;

idooho Abasi.

Enañ Sameria ado,

eyaebom anye mbai-mbai.

7 "Ammọ etọ afịm

enyʌñ edọk ayobio.

Eto abakpa inieghe iwuod;

anye ikemeke inam ndomuyo.

Akpedo anye amaanwịm mfịd,

Isenawo ekpaekemen anye.

8 E-eben Isrel emen;

idahami anye adiba ke atu mme idịd

nte ñkpọ a-awo imiiyemme.

9 Sia ammọ edọọk ekaa Asiria

nte dọñki ikọd ayooño ikpọọñ.

Ifrem anyam idem amọ anọ mbon ima amọ.

10 Akpesʌkado a-ammọ enyamma idem ammọ ke atu mme idịd,

idahami ami ñyaatañ ammọ mbok itie keed.

Ammọ eyaetọọñọ adibiaña

ke idak ufiik ekamba adidem.

11 "Akpesʌkado Ifrem amaakebọp uwak akpokoro uwa inọ mme enọ idiọọkñkpọ,

ammọ ekappa edo akpokoro uwa unam ndiọiñkpọ.

12 Ami mmaawet uwak ñkpọ e-ebañake mbed mmi nnọ ammọ,

ado ammọ ekekịt nte asen ñkpọ.

13 Akpesʌkado a-ammọ enamma uwa ennọọ miin nte enọ,

ñko akpesʌkado a-ammọ etaaha unam ado,

Abọọñ inemme esịd ye ammọ.

Idahami anye ayaatoiyo ibak ammọ

anyʌñ amia ammọ ufen abaña ndiọiñkpọ ammọ:

Ammọ eyaetịmme enyọñ Iyib.

14 Isrel afre Andibod ammọ,

enyʌñ ebọp mme ñkpọsọñ itieidʌñ;

Yuda anekke asọọñọ uwak idʌñ.

Ado ami ñyaadọñ ikañ aketa mme abio ammọ,

ikañ adiita mme ñkpọsọñ itie ammọ."