1 Isrel akedo fain a-atarake,

anye amaanwịm mfịd anọ idem amọ.

Adaña nte mfịd amọ aketọttọ,

anye amaabọp uwak akpokoro uwa;

naña isọñ amọ akeseghe,

anye amaadiọñ mme itiad ukpono amọ.

2 Esịd ammọ ayọhọ ye abiaña,

idahami ana ammọ ebiom ndudue ammọ.

Abọọñ ayaawuut mme akpokoro uwa ammọ,

anyʌñ abiat mme asaña-asaña itiad ammọ.

3 Ndin ammọ eyaebo, "Ñnyịn inieghe adidem

sia ñnyịn ikikponoke Abọọñ.

Ado akpekọm a-ñnyịn ikpikineenie adidem,

nsoo ke anye akpekekan anam inọọ ñnyịn?"

4 Ammọ enam uwak akaaña,

edat mme nsu-nsu unwọñọ,

enyʌñ enam mme unyịmme;

ke ntoro mme ukoodikpe ewuọñọ edi

nte ndiọi ibak mbid ke inwañ e-emaekekịm ekappa.

5 Mme awo e-edʌññọ ke Sameria e-ekop ndịk

ebaña ubobod enañ Bed Afen.

Mbon amọ eyaefʌhọ ebaña anye,

ntoro ñko ye mme aku ammọ e-ekponoke ibọk,

mbon e-ekenemme esịd ebaña inie amọ,

sia ekebọọhọ ammọ eben eka itie ntañmfeb.

6 Eyaeben anye ekaa Asiria

nte mbʌk itooro enọ akwa adidem.

Eyaesuenne Ifrem;

Isrel ayaakop abuud abaña mme isen item ufan amọ.

7 Eyaesobo adidem Sameria,

ekwọọk anye efep nte nsaad mfañ ke anyọñ mmọọñ.

8 Eyaesobo mme ñkoñ-ñkoñ itie ibak,

sia ado idiọọkñkpọ Isrel.

Ñkukịm ye mbaraekpe eyaetịppe,

enyʌñ efʌk akpokoro uwa ammọ.

Ndin ammọ eyaebo mme ekamba abod, "Ifuuk ñnyịn!"

enyʌñ ebo mme ntək abod, "Iduọ itọ ñnyịn!"

9 "Isrel, tọọñọ ke mme usen Kibie, afo amenam idiọọkñkpọ,

afo asʌk abaaba ke idiọọkñkpọ.

Nte ekọñ idiimaanake ibeen

mme anam idiọọkñkpọ ke Kibie?

10 Ini amaakem, ami ñyaamia ammọ ufen;

mme idịd eyaebono ebaña ammọ

nọ esịn ammọ ifʌn ebaña edemiba idiọọkñkpọ ammọ.

11 Ifrem ado ñyịn enañ e-enọọhọ ukpeeb,

a-amaaha adisọnnọ abakpa;

ke ntoro ami ñyaadot akpọnọ

ke uyaiya itọñ amọ.

Ami ñyaawat Ifrem,

Yuda ana akappa isọñ,

ndin Yekọb ayaatịppe isọñ.

12 Tọ adinenido nọ idem mfo,

dọk mfịd ima i-imiidiikpuuho,

nyʌñ dọk isọñ mfo a-awo imiikappake diin;

sia ini akem adiyem Abọọñ,

tutu anye adi

anyʌñ uduọk fiin adinenido amọ nte mbara.

13 Ado afo amaatọ ibak,

anyʌñ adọk idiọọk,

afo amedia mfịd ñkara.

Sia afo akenie idodanyen ke adudu mfo

ye ke uwak mbon ekọñ mfo,

14 ñkuun anwan ayaadakka adinwana ye mbon mfo,

nọ ato do esobo afịd ñkpọsọñ itie mfo;

naña Salman akebiat Bed Abel ke usen ekọñ,

ke ini eketọọñọ mme eka ye nditọ ammọ esuan ke isọñ.

15 Kpa ntoro ke adiitịppe unọ fiin, Beteel,

sia ibak mfo akpon.

Ke usen ado amaasiere,

eyaesobo adidem Isrel afịd-afịd.