Luk 19

Sakiọs Abọọ Taks

1 Usen keed Yisọs amaasaña aboiyo ke Yeriko. 2 Ete keed amaaba do a-akekereke Sakiọs. Anye akedo etubom mme abọọ taks anyʌñ ado imọ awo. 3 Anye amaayem adidiọọñọ me anie ke Yisọs ado, ado anye ikikanna imọọnọ Yisọs ke ntak atu awo sia anye akedo imək awo. 4 Anye amaafeghe akedọọk anyọñ eto sikamọ a-akedaaha ke usʌñ a-Yisọs akeduakka adisaña mboiyo.

5 Ke ini Yisọs akekewuọhọ itie ado, anye amaabenne anyen ke anyọñ anyʌñ abo anye ate, "Sakiọs, sọiyọ di idahami. Ana ami mba ke ufọk mfo mfịn ami." 6 Anye amaasọiyọ ini keed anyʌñ adaara Yisọs.

7 Afịd awo se ikikịt adinam ami emaetọọñọ adidukuunọ ete, "Anye aka asen ke ufọk anam idiọọkñkpọ."

8 Ado Sakiọs amaadakka ada abo Abọọñ ate, "Sese, Abọọñ! Idaha-idahami ami mmekpọñ inie mmi mbakka keed ke itie iba nnọ mme uweene, ndin akpedo mmaatʌk awo ndomokeed, ñyaakpe anye itie inaañ se ñkebọọ."

9 Yisọs amaabo anye, "Mfịn ami adinyaaña asịm ufọk ami, sia ete ami ñko ado ayịn Ebraham. 10 Sia Ayịn Awo akedi adiyem ñnyʌñ ñnyaaña mbon se isop."