Lucas 9

Yisọs Anọ Awo Tọsịn Ition Ndidia

10 Ke ini mme abọsịd emaekenyọñ edi, ammọ emaeditañ enọ Yisọs se ammọ ekenañña. Ndin anye amaaben mme mbed amọ awuọ ammọ-ammọ ekaa abio a-akereke Bedsaida, 11 ado mme atu awo emaekeyaara ediọọñọ, emaekeene anye. Anye amaadaara ammọ anyʌñ atañ ikọ anọ ammọ abaña abioubọọñ Abasi anyʌñ akọk mbon e-ekedọñọke udọñọ.

12 Ayio aketekke, mbed amọ duob mme iba emaedibo anye, "Nọ mme atu awo ami enyọñọ nọ ammọ ekaiya mme esịdidʌñ ye ñkanñkʌk ekeyem ñkpọ se edia ye itie e-ediina sia itie a-ñnyịn ibaaha mi anyọọñ usʌñ akpọñ nte mme awo edʌñọ."

13 Anye amaabọọrọ ammọ abo, "Ndufo inọ ammọ ñkpọ nọ edia."

Ammọ emaenyʌñ ebọọrọ anye ate, "Ñnyịn inie uyo ition ye iyak iba kpọd, ibọhọke ñnyịn ika esịd idʌñ ikidep ndidia a-adiikem afịd atu awo ami." 14 (Ñkpọ nte tọsịn awo ition (5,000) ekeba do.)

Ado anye amaabo mme mbed, "Inam mme awo ami etie ke eboho aba mme duob aba mme duob." 15 Mme mbed emaenyʌñ enam naña anye akebo enam; afịd awo emaesuuk etie. 16 Anye amaaben uyo ition ye iyak iba ado, adịppe anyen ase hefịn, anọ ekọọm anyʌñ abuuñ, ayaak anọ mme mbed amọ ate edeeme enọ mme awo. 17 Afịd awo emaeta enyʌñ ekop uyʌkkọ, ndin mme mbed emaetañ ñyọhọnsʌhọ ayọhọ akpasa duob mme iba.