1 Ndin Yoob amaabọọrọ:

2 "Afo uduuntʌkkọ miin ukpeene die

unyʌñ unnuak miin ye mme ikọ?

3 Akañ duob adom ndufo emesua ennọ miin;

emetañ ikọ ye ami inieghe iso abuud.

4 Adieke adooho akpanikọ ke ami mmewuọ ñkpọñ usʌñ,

ndudue mmi ambeghe miin ikpọọñ.

5 Adieke adooho ndufo ebo ke imifọn iñkan miin

enyʌñ edat asuenne mmi ennọ ñnyọọ,

6 ndin idiọọñọ ibo ke Abasi andue miin

anyʌñ adat iyịre amọ awañ añkanna miin.

7 "Akpesʌkado ami mbọññọ, ‘Afai!’ Ami mbọọhọ ibọọrọ;

akpesʌkado ami ntuaha ñyem unwam, unen ibaaha.

8 Anye amaasiit usʌñ mmi mbaak ami ndiboiyo;

anye amaanyʌñ afʌk usʌñ mmi ke ekịm.

9 Anye amaanyʌñ ansịññe miin afọn ukpono ke idem

anyʌñ ayaara anyanya ubọọñ ke iwuod mmi.

10 Anye añwai miin ke afịd idaha tutu ami mbaaha aba;

anye awịppe idodanyen mmi aduọọk nte eto.

11 Iyadesịd amọ ansak miin ke idem;

anye ambat miin asịn ke atu mme asua amọ.

12 Mme udịm ekọñ amọ embịne ke adudu;

ammọ ebọp akọ eñkanna miin

enyʌñ enam nnaaekọñ ekanna atayad mmi.

13 "Anye adiañña ubon mmi añkpọñ miin;

anyʌñ adiañña afịd mme adiọọñọ mmi añkpọñ miin.

14 Mbon ufọk mmi enyʌñ edakka eñkpọñ miin;

mme akpan ufan mmi efre anyen embaña miin.

15 Mme isenawo mmi ye mme nditọufọk mmi ibaan ekappa embat miin nte awo asenidịd;

ammọ edikappa ense miin nte asenawo.

16 Ami ñkoot ayịnufọk mmi, ado anye imbọọrọke,

akpesʌkado ami ndatta inua mmi ñkpeiye anye.

17 Inweek mmi atetek anwaan mmi esịd;

Ami ñyedo ñkpọ ndọk nnọ mbon ufọk mmi.

18 Idem ata ntək ideen ensuenne miin;

Ami mmaawuọ ndeppe, ammọ endọọñ ndọk.

19 Afịd mme akpan ufan mmi ensua miin;

mbon ami mmaaha ekanna enwana ye ami.

20 Ami ndisʌhọ ikpọkidem ye akpọ kpọd;

Ami ñnyʌñ mbọkkọ ke ataa nsịñ.

21 "Intua miin mbọm, mme ufan mmi, intua mbọm,

sia ubọk Abasi ammia miin ikpa.

22 Ntak ake ndufo embịneke miin naña Abasi ambịne?

Nte ndufo iyʌkkọke ye abʌkidem mmi?

23 "Sai, akpekapado ke ekeweewet mme ikọ mmi enịm,

akpekapado ke emaewet ammọ esịn ke ñwed,

24 ke emaedat etoñwed ukwak ekap mme ikọ mmi esịn ke ñked,

me adikap ikọ mmi nsịn ke itiad ke nsi-nsi!

25 Ami mmediọọñọ nte ke andimfak miin asʌk adodu uwem,

ndin ke akpatre anye ayaada ke ederimbod.

26 Ndin ke ikpọkidem mmi amaabiara,

ado ke abʌkidem mmi ami ñyaakịt Abasi;

27 Ami ke idem mmi ñyaakịt anye

ke ata anyen mmi ikpọọñ, ami, idooho awo mfen.

Se naña esịd mmi akop udọñ ke esịd idem mmi!

28 "Adieke afo abooho, ‘ñnyịn idiinam die ikọbọ anye,

sia akpanadʌñ mfịna ami abere ke anye,’

29 Akpena ndufo ekop ndịk ebaña akañkañ;

sia iyadesịd ayaaben ufen asañake ke akañkañ adi,

ndin ndufo eyaediọọñọ ke ubiomikpe aba."