1 Akem Yoob amaabọọrọ:

2 "Ke akpanikọ, ami mmediọọñọ ke ado akpanikọ.

Ado die ke mme ñkaña awo ekan aditañ ikọ mbaña unana ndudue ammọ ke iso Abasi?

3 Akpesʌkado nte ammọ eyemme edifaaña mfaaña mme anye,

ammọ ikanna edibọọrọ anye akañ keed ke atu tọsịn.

4 Aniọñ amọ atʌñọ eti-eti, adudu amọ anyʌñ akpon eti-eti.

Anie akesọñ iwuod ye anye ndin atre adidat unan?

5 Anye aben mme ikpọabod afep ke ini ammọ imiidiọọñọke

anyʌñ ayʌt ammọ akappa ke iyadesịd amọ.

6 Anye anyeeñe ederimbod asio ke itie amọ

anyʌñ anam mme abai ufọk ammọ enyeeñe.

7 Anye atañ ikọ anọ utịn ndin anye ikanna iyamma;

anye anyʌñ afʌk unwana ntantaafiọñ.

8 Anye ikpọọñ atat mme hefịn

anyʌñ asaña ke mbufịd akpainyañ.

9 Anye ado Andinam Bee ye Ọriọn,

mme Pleiades ye mme ntantaafiọñ ke usuuk.

10 Anye anam mme utịppeñkpọ ake awo imiikanna adidiọọñọ,

mme utịppeñkpọ ake awo imiikanna adibat.

11 Anye amaasaña imboiyo miin, ami ñkanna ñkịt anye;

anye amaasaña iboiyo, ami ñkanna ndiọọñọ anye.

12 Anye akpuwappa ñkpọ abọ,

anie awo ikan adikpan anye?

Anie ikeme adibo anye, ‘Nsoo ke afo anam?’

13 Abasi itegheke iyadesịd amọ;

ndin nsaña Rahab emaenʌhọ ke idak amọ.

14 "Die ndin ke ami ndiinam ikọ ye anye?

Ndiinam die nnie mme ikọ se ndat mfaaña ye anye?

15 Akpesʌkado ami mmiikidueghe, ami ñkikanna mbọọrọ anye;

Ukweeñe akedo ami adikpeiye abiideikpe mmi mbo yak anie mbọm.

16 Akpekọm ñkekookoot anye ndin anye abọọrọ,

Ami nnịmme ke anye ayannọ miin ñkpañutọñ.

17 Anye ayaadat afịm ayobio annuak miin

anyʌñ anam unan mmi awak ke unana ntak.

18 Anye idiiyakka ami nduọk ibifịk

ado ayamfʌk miin ye ukuud.

19 Adieke adooho ñkpọ inweek, anye anie adudu akem!

Adieke adooho ñkpọ unenikpe, anie ikpida anye ke iso?

20 Akpekọm ami ñkinieghe ndudue, inua mmi akpa ambiom miin ikpe;

adieke ñkpenanake ndudue, anye akpaabo ke mmedue.

21 "Akpesʌkado ami nnanake ndudue,

Ami nnieghe utom do mbaña idem mmi;

Ami mmesua uwem mmi.

22 Afịd ñkpọ ado ukem-ukem; ado anam yak ami mbo,

‘Anye asobo mme anana ndudue ye mbon ibak.’

23 Ke ini idiọọk udọñọ amaaben adiyok ñkpa adi,

anye asak nnananyen awo ake imiidueghe isob.

24 Adieke isọñ aduọhọ adʌk ubọk mme idiọọk awo,

anye afʌk afịd mme abiideikpe anyen.

Adieke imiidooho anye, ado anie awo ndin?

25 "Mme usen uwem mmi esọp ekan awo a-afegheke itọk;

ammọ efeeñe ewuọ ikịtte inemesịd ndomokeed.

26 Ammọ efrọ eboiyo usọp-usọp nte ubom e-enamma ke papirus,

nte mme ntrukpuum eduọhọ efʌk mme unam ndidia ammọ.

27 Adieke mbooho, ‘Ami ñyaafre aseeme mmi,

ñyaakpuho iso mmi, ñnyʌñ ntuaak inua imam,’

28 Ami nsʌk mbaak afịd mme ufen se ami mbọ,

sia mmediọọñọ ke afo uduudatta ke ami ndueghe.

29 Sia ekekịt ndudue ennọ miin,

ntak ami ñkpenwanake ke unana ntak-a?

30 Akpekọm ami ñkpeyet idem mmi ke atọñ

ñnyʌñ ñyet ubọk mmi ke mme ndom,

31 afo ayantop miin asịn ke utebe ube

nọ ato do kpa mme afọñ mmi ensua miin.

32 "Anye idooho awo nte ami nọ ami ñkpebọọrọ anye ikọ,

me a-akpenamma ami ye anye ida ke ikpe ke esob.

33 Akpekapado awo aba adisịn emem ke ufọọd ñnyịn awo iba,

awo se ikpiben ñnyịn ididian keed,

34 awo akpenyʌññọ adooro esañ ufen Abasi afep ke idem mmi,

mbaak idịkke amọ adindịkke aba.

35 Ndin ami ñkpaasio uyio, mbaaha anye aba,

ado naña aba idahami ye ami, ami ñkanna.