1 "Ami mmaanam edioomo ye anyen mmi

mbo ke ndiiseeghe abọikpa ke anyen use.

2 Nsoo ndin ido udeeme ñnyịn a-atooho Abasi ke anyọñ,

nsoo ido udod ñnyịn a-atooho Andikoñ Ñkan ke anyọñ?

3 Nte idooho nsobo ana anọ mme idiọọk awo,

nsobo ana anọ mme anam idiọọk?

4 Nte anye ikịtte mme usʌñ mmi

anyʌñ abat afịd ñkpadisañ mmi?

5 "Adieke ami nsañake ke abiaña

me ikpad mmi asọp abịne ñkara,

6 yak Abasi amben miin asịn ke adinen udomoñkpọ

ndin anye ayaadiọọñọ ke ami ndueghe;

7 adieke ikpadisañ mmi awakkake akpọñ usʌñ,

adieke esịd mmi akeeneke anyen mmi,

me ubọk mmi asappake,

8 ndin yak mbon mfen edia se ami ntọ,

ndin yak ewịppe mme mfịd inwañ mmi.

9 "Adieke esịd mmi akeeneke awonwaan,

me akpedo ami mmediana ke inuausʌñ mbọhọidʌñ mmi,

10 yak anwaan mmi akọk ñkpasi awo mfen,

yak ideen mfen enyʌñ enam ima ye anye.

11 Sia ñkpọ ntoro akpedo ibak,

idiọọkñkpọ a-anaaha ekpe ebiere.

12 Ado ikañ asakka ata ñkpọ tutu aben nsobo adi;

anye akpaawịppe mme idọk inwañ mmi.

13 "Adieke ami nsịnne adinam unen nnọọ nditọufọk mmi,

mme ado awodeen me awonwaan,

ke idaha ammọ ekenieghe utọk ye ami,

14 ami ndiinam die ke Abasi amambịp miin?

Nsoo ke ami ndiibọọrọ ke emaeñkoot ebo yak ndinam ibad?

15 Nte idooho anye a-akembotto miin ke idịb akenyʌñ abot ammọ?

Nte idooho kpa anye akibot ñnyịn awo iba ke idịb eka ñnyịn?

16 "Adieke ami ñkesịnne adinọ mme uweene se amọ ekeyem

me adinam yak anyen anan mme ebekpa,

17 adieke ami ñkenịmme ndomuyo mmi nnọ idem mmi ikpọọñ,

ñwuanake anye ye nditọakpa,

18 ado tọọñọ ke uyịn mmi ami ñkesibọọk ammọ nte ete abọọk nditọ,

ñnyʌñ ñkpeme mme ebekpa tọọñọ ke emana mmi,

19 adieke akenaanam ami mmekịt awo ayemme aditak ke ntak unana afọñ,

me awo unana ammiinieghe afọñ,

20 ndin esịd ammọ ikindiọññọ miin

ke adikinam ammọ ekop ufiob nto idededọñ mmi,

21 adieke akenaanam ami mmedịppe ubọk mmi mfiik nditọakpa,

ndiọọñọ mbo ke ami mmenie adudu ke esob,

22 ndin yak ubọk mmi atotto tọọñọ ke afara,

yak ubọk mmi abʌññọ tọọñọ ke itie anye ayịreke.

23 Sia ami mmaabaak nsobo a-atooho Abasi,

ndin ke ntak ndịk mmọnyọ amọ, ami ñkpekanna nnam mme ñkpọ ntoro.

24 "Adieke ami nnieghe idodanyen ke kold

me mbo ataa eti kold, ‘Afo ado ñkpọ ukpeme mmi,’

25 adieke adooho ami mmedaara ke ntak uwak inie mmi,

mme inie se ubọk mmi anwana,

26 adieke ami nseeghe utịn naña anye ayamma

me afiọñ naña anye ayamma ke mmọnyọ,

27 nọ ato do etab esịd mmi ke ndịbe

ndin ubọk mmi amaanọ ammọ ntʌminua ukpono,

28 ndin mme ñkpọ ami ediido ndiọiñkpọ se ekpe ebiere,

sia ami ñkpekedo asʌhọ nsu nnọ Abasi ke anyọñ.

29 "Adieke ami nnemme esịd mbaña iduọ asua mmi

me adinem esịd mbaña mfịna a-anye anieghe.

30 Ami ñyakka inua mmi anam idiọọk

ke adikoot isuuñọ nnọ uwem ammọ,

31 adieke akenaanam mbon ufọk mmi ibooho,

‘Anie awo ke unam Yoob akenam imiiyʌkkọke?’

32 ado ibaaha asenawo ndomokeed a-akenaaha ke esiin akonayio,

sia usʌñ ufọk mmi akesina inwañ anọ mme akaisañ,

33 akpedo ami mmedịp idiọọkñkpọ mmi naña mbon awo enam,

ke adidịp ndudue mmi ke esịd mmi

34 ke ntak a-adooho ami mmebaak atu awo

ndin ñnyʌñ nnekke mbaak mme ndudue ake mme ubon

ndin ami ndop uyio ñnyʌññọ ñwuọ esiin.

35 ("O, akpekapado ami mmenie awo se iñkop miin!

Idahami ami mmenyịmme adifaaña idem mmi, yak Andikoñ Ñkan ambọọrọ miin;

yak awo se ibo ke ami mmedue awewet ndudue mmi asịn ke ñwed.

36 Ke akpanikọ ami ñyaaben anye ñkọñọ ke afara mmi,

Ami ñkpeyaayara anye nte anyanya.

37 Ami ñyaanam ibad nnọ anye ke abaña afịd se ami ñkenam;

Ami ñkpaaben ñwọt anye nte ñwọt andikara.)

38 "Adieke isọñ mmi atuaha ayịd ambaña miin

ndin afịd mme idọk amọ enyʌñ etua ayịd,

39 adieke ami ñkediaha inie mfịdinwañ amọ ndiikpeeghe ekọmudua

me adibuuñ sịbidịd mme anamutom amọ,

40 ndin yak mbaraekpe etịppe utu ke abakpa

yak utebe mbid anyʌñ atịppe utu ke mfịd baali."

Mme ikọ Yoob e-ekweeñe.